រដ្ឋមន្ត្រីលើកឡើងថា ភាពជោគជ័យនៃផលិតកម្មស្បៀងកម្ពុជា ជំរុញដោយការពង្រីកផ្ទៃដីដាំដុះ

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា បច្ចុប្បន្ន​ កម្ពុជាមិនត្រឹមតែផលិតស្បៀងគ្រប់គ្រាន់ដើម្បីបំពេញតម្រូវការក្នុងស្រុកប៉ុណ្ណោះទេ ថែមទាំង​អាច​នាំ​ចេញ​កសិផលបាន​ទូទាំងពិភពលោកទៀត​ផង។

លោករដ្ឋមន្ត្រីបានថ្លែងថា ភាពជោគជ័យនេះ​ ត្រូវបានជំរុញដោយការពង្រីកដីបង្កបង្កើនផល តាម​រយៈ​បន្តកិច្ចខិតខំប្រឹងប្រែងបោសសម្អាត កែលម្អប្រព័ន្ធធារាសាស្ត្រ ការធ្វើឱ្យប្រសើរឡើង​នូវ​ហេដ្ឋា​រចនាសម្ព័ន្ធ និងការទទួលយកបច្ចេកវិទ្យាទំនើប រួមទាំងការអភិវឌ្ឍន៍ និងការប្រើប្រាស់ពូជ​ដំណាំ​សុទ្ធដែលប្រសើរឡើងជាដើម។

លោក ឌិត ទីណា បានថ្លែងនៅក្នុងពិធីបើក “វេទិកាអនាគតស្តីពី និរន្តរភាពប្រព័ន្ធស្បៀងអាហារ-ធានាអនាគត៖ ស្ពានឆ្លងប្រទេស ផ្លាស់ប្តូរអាហារូបត្ថម្ភ” នៅសណ្ឋាគារបុរីអង្គរ ខេត្តសៀមរាប នៅ​ព្រឹក​ថ្ងៃទី ១៧ ខែកុម្ភៈ ឆ្នាំ ២០២៥។

លោករដ្ឋមន្ត្រីបានបញ្ជាក់ថា រដ្ឋាភិបាលកម្ពុជាប្តេជ្ញាយ៉ាងរឹងមាំក្នុងការលើកកម្ពស់វិស័យកសិកម្ម និងការអភិវឌ្ឍន៍ជនបទ ដើម្បីធានាបាននូវសន្តិសុខស្បៀង និងសុវត្ថិភាពចំណីអាហារ ឆ្ពោះទៅ​រក​ប្រព័ន្ធកសិកម្មប្រកបដោយប្រសិទ្ធភាព ភាព​ធន់ និរន្តរភាព និងកំណត់សកម្មភាពដើម្បី​ធានា​និរន្តរភាព​បរិស្ថាន និងការត្រៀមខ្លួនសម្រាប់ការឆ្លើយតបទៅនឹងការប្រែប្រួលអាកាសធាតុ។

ក្នុងការរួមចំណែកអនុវត្តគោលនយោបាយ​ និងយុទ្ធសាស្រ្តគ្រប់ដំណាក់កាលរបស់រាជរដ្ឋាភិបាល​ ក្រសួងបានខិតខំបំពេញបេសកកម្មរបស់ខ្លួនយ៉ាងសកម្ម​ ក្នុងការរក្សាស្ថិរភាព ថ្លៃកសិផល​ ការ​ដាក់​ពង្រាយមន្ត្រីកសិកម្មទូទាំងប្រទេសចំនួន​ ១៦០០នាក់​ និងការចងក្រងសហគមន៍​កសិកម្ម​ទំនើប ដែលទាំងអស់នេះត្រូវបានអនុវត្តជាជំហានៗ និងសម្រេចបាននូវលទ្ធផលសំខាន់ថ្មីៗ​ជា​បន្ត​បន្ទាប់។

លោករដ្ឋមន្ត្រី បានលើកទឹកចិត្តដល់សហភាពអឺរ៉ុប(EU) អង្គការ(GIZ) និងដៃគូអភិវឌ្ឍន៍​ពាក់ព័ន្ធ បន្តនូវគំនិតផ្តួចផ្តើមបន្ថែមទៀតដើម្បីគាំទ្រប្រទេសកំពុងអភិវឌ្ឍន៍ ជាពិសេស​សម្រាប់​កម្មវិធីផ្សព្វផ្សាយ​បច្ចេកវិទ្យាឆ្លាតវៃ​ ការផ្តល់ការវិនិយោគអភិវឌ្ឍន៍បន្ថែម និងការផ្តល់ហិរញ្ញប្បទាន​ដល់ភាគីពាក់ព័ន្ធសំខាន់ៗ ការទទួលបានទីផ្សារ ការតភ្ជាប់ខ្សែចង្វាក់តម្លៃ​ ការសម្របសម្រួល​ពាណិជ្ជកម្ម​ គោលការណ៍លើកទឹកចិត្តទីផ្សារ និងឱកាសផ្សេងៗបន្ថែមផ្សេងទៀត៕