​ត្រឹមប៉ុន្មានថ្ងៃ ប្រជាជនកាណាដា​ជាង​២៥ម៉ឺននាក់​​ចុះហត្ថលេខា​លើញត្តិ​​​​ទាមទារ​ដកសញ្ជាតិ​​របស់ Elon Musk​

មនុស្សរាប់សែននាក់បានចុះហត្ថលេខាលើញត្តិទាមទារ​ឲ្យ​មាន​ការ​ដកហូតសញ្ជាតិកាណាដារបស់ Elon Musk ចំពេលមានភាពតានតឹងរវាងរដ្ឋបាល ត្រាំ និងកាណាដា។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៦ខែកុម្ភៈនេះ។

ញត្តិ​ដែល​បាន​បើក​ឲ្យ​ហត្ថលេខា​កាលពី​ប្រាំ​ថ្ងៃ​មុន​បាន​ចោទ​លោក Musk ថា​ បាន​ប្រព្រឹត្ត​ផ្ទុយ​នឹង​ផលប្រយោជន៍​ជាតិ​របស់​​កាណាដា និង​ធ្វើ​ឲ្យ​ប៉ះពាល់​ដល់​អធិបតេយ្យភាព​របស់​ខ្លួន។ នៅប្រទេសកាណាដា សញ្ជាតិអាចត្រូវបានដកហូតវិញ​បានលុះត្រាតែមាននរណាម្នាក់បានប្រព្រឹត្តការក្លែងបន្លំ មានកំហុសទាក់ទងនឹងពាក្យសុំអន្តោប្រវេសន៍ ឬសញ្ជាតិ។

ញត្តិនេះបានអះអាងថា មហាសេដ្ឋី Elon Musk ​បានប្រើប្រាស់ទ្រព្យសម្បត្តិ និងអំណាចរបស់ខ្លួន​ដើម្បីមានឥទ្ធិពល​លើ​ការបោះឆ្នោតរបស់​កាណាដា​ ហើយឥឡូវនេះលោកបានក្លាយជាសមាជិកនៃរដ្ឋាភិបាលបរទេសដែលកំពុងព្យាយាម​លុប​បំបាត់អធិបតេយ្យភាពកាណាដា។

​​ដោយ​​ការ​ចាប់ផ្តើមនៅថ្ងៃទី២០ខែកុម្ភៈ ញត្តិដែលបានចុះហត្ថលេខារួចហើយដោយជនជាតិកាណាដាជាង​២៥​ម៉ឺន​នាក់នៅតែ​បើកសម្រាប់ការចុះហត្ថលេខារហូតដល់ថ្ងៃទី២០ខែមិថុនា។

លោក Musk ដែលកើតនៅអាហ្វ្រិកខាងត្បូង មានសញ្ជាតិកាណាដា និងសហរដ្ឋអាមេរិក។ លោក Musk មានសញ្ជាតិកាណាដា តាមរយៈម្តាយរបស់គាត់ ដែលកើតនៅខេត្ត Saskatchewan ប្រទេសកាណាដា។ លោកបានឆ្លើយតបនឹងញត្តិនេះ ដោយសរសេរនៅលើ X ថា «កាណាដាមិនមែនជាប្រទេសពិតប្រាកដទេ» ប៉ុន្តែក្រោយមកលោកបានលុបចោល។

គួរបញ្ជាក់ថាភាពតានតឹងរវាងសហរដ្ឋអាមេរិក និងកាណាដាបានកើនឡើងចាប់តាំងពីការវិលត្រឡប់របស់លោក ត្រាំ ដោយប្រធានាធិបតីបានស្នើម្តងហើយម្តងទៀតថាកាណាដាអាចក្លាយជារដ្ឋរបស់សហរដ្ឋអាមេរិក និងគំរាមកំហែងពន្ធលើដែកថែប អាលុយមីញ៉ូម និងការនាំចូលផ្សេងទៀត។

មេដឹកនាំ​កាណាដា​​ប្តេជ្ញា​ប្រឆាំង​នឹង​ពន្ធគយ។ លើសពីនេះ ជនជាតិកាណាដាលុបចោលការធ្វើដំណើរនៅសហរដ្ឋអាមេរិក ពហិការមិនប្រើផលិតផលអាមេរិក និងស្រែកច្រៀងប្រឆាំងនៅឯការប្រកួតកីឡាវាយកូនគោលលើទឹកកក និងបាល់បោះថែមទៀត។

គួររម្លឹកថាលោក Musk បានផ្លាស់ទៅប្រទេសកាណាដាពីអាហ្វ្រិកខាងត្បូងនៅអាយុ១៨ ឆ្នាំ ហើយបានសិក្សានៅសាកលវិទ្យាល័យ Queen’s នៅ Kingston រដ្ឋ Ontario ។ ក្រោយមកគាត់បានធ្វើចំណាកស្រុកទៅសហរដ្ឋអាមេរិក។ខណៈលោកក៏ជាអ្នកគាំទ្រគោលនយោបាយអន្តោប្រវេសន៍ដ៏តឹងរឹងរបស់លោកត្រាំផងដែរ។

នៅក្នុងបទសម្ភាសន៍ថ្មីៗនេះ លោក Steve Bannon អតីតទីប្រឹក្សាប្រធានាធិបតី ត្រាំ បានហៅលោក Musk ថាជា «ជនអន្តោប្រវេសន៍ខុសច្បាប់»។ ប៉ុន្តែនាយកប្រតិបត្តិក្រុមហ៊ុន Tesla បានបដិសេធការចោទប្រកាន់នេះ ហើយបាននិយាយថា លោកមិនបានធ្វើការខុសច្បាប់ទេ។ បើយោងតាមជីវប្រវត្តិថ្មីៗនេះ លោកបានក្លាយជាពលរដ្ឋអាមេរិកស្របច្បាប់ក្នុងឆ្នាំ២០០២៕

អត្ថបទ៖ ប៊ុន សុភាព