សម្ដេចសភាធិការធិបតីថា ស្ត្រីមិនចង់បានតំណែងតួនាទីណាមួយគ្រាន់តែល្អមើលនោះទេ

ប្រធានរដ្ឋសភា សម្ដេចសភាធិការធិបតី ឃួន សុដារី បានលើកឡើងពីបំណងរបស់ស្ត្រីក្នុងវិស័យការងារថា ពួកគេមិនត្រូវការតួនាទីក្នុងស្ថាប័នដែលគ្រាន់តែល្អមើលទេ តែត្រូវការការទទួលស្គាល់សមត្ថភាពក្នុងកិច្ចការរបស់ខ្លួនដូចបុរស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងបានអញ្ជើញជួបសំណេះសំណាលជាមួយគណៈប្រតិភូស្ត្រីជាង៣០០នាក់ ដឹកនាំដោយរដ្ឋមន្ត្រីកិច្ចការនារី អ៊ឹង កន្ថាផាវី នៅវិមានរដ្ឋសភាកាលពីថ្ងៃទី៤ ខែមិនា អបអរសាទរទិវាអន្តរជាតិនារីលើកទី១១៤ សម្ដេចសភាធិការធិបតី ឃួន សុដារី បានលើកឡើងថា ស្ត្រីមិនមែនធ្វើការក្នុងតួនាទី ឬតំណែងណាមួយព្រោះតែខ្លួនជាភេទទន់ខ្សោយត្រូវបានលើកតម្កើននោះទេ តែជាអ្នកដែលពោរពេញដោយសមត្ថភាពបំពេញការងារ។

សម្ដេចថា៖ «ពុំមែនថាដោយសារខ្ញុំនេះស្រីអ្នកឯងត្រូវតែទទួលស្គាល់សិទ្ធិខ្ញុំហើយឱ្យខ្ញុំមានតួនាទីស្មើភាពមិនមែនទេ! ស្ត្រីអត់ត្រូវការបែបហ្នឹងទេ! គឺត្រូវធ្វើយ៉ាងមិចមានសមត្ថភាពរឹងមាំមានការទទួលខុសត្រូវខ្ពស់ហើយបំពេញការងារបានដូចបុរស»។

សម្ដេចបានជំរុញឱ្យមានការផ្ដល់ភាពអង់អាចដល់ស្ត្រីផងដែរក្នុងន័យថា រវាងបុរសនិងស្ត្រីដែលត្រូវប្រកួតប្រជែងក្នុងតំណែងមួយប្រសិនជាអ្នកទាំងពីរមានសមត្ថភាពដូចគ្នាដូច្នេះគួរលើកទឹកចិត្តដល់ស្ត្រីជាមុន។

ទាក់ទងនឹងករណីនេះសម្ដេចក៏ទទួលបានការលើកឡើងពីថ្នាក់ដឹកនាំជាបុរសមួយចំនួនដែលថា ស្ត្រីចិត្តចង្អៀតហើយសម្ដេចក៏បានការពារថាមិនមែននោះទេ ភាពតឹងតែងរបស់ស្ត្រីព្រោះតែពួកគេចង់បានភាពឥតខ្ចោះនិងគ្មានកំហុសក្នុងការងាររបស់ខ្លួន។ ជាមួយគ្នានោះសម្ដេចក៏ជំរុញដល់ស្ត្រីក្នុងតួនាទីជាអ្នកសម្រេចចិត្តឱ្យមានភាពបត់បែនក្នុងកន្លែងការងារផងដែរ។

របាយការណ៍ក្រសួងមុខងារសាធារណៈឆ្នាំ២០២៤កម្ពុជាមានមន្ត្រីរាជការសរុបជាង២២ម៉ឺននាក់ ក្នុងនោះមានស្ត្រីជាង៩ម៉ឺននាក់ដែលស្មើនឹង៤២ភាគរយ ហើយក្នុងនោះស្ត្រីជាង១ម៉ឺននាក់ត្រូវបានបម្រើរការងារក្នុងតួនាទីសម្រេចចិត្តនៅថ្នាក់ជាតិ និងក្រោមជាតិ៕

អត្ថបទដោយ ហ៊ុន សិរីវឌ្ឍន៍