មេ CSX​៖ ជោគជ័យនៃការកៀរគរទុនប្រមាណ​១០០លានដុល្លារពីផ្សារហ៊ុន​របស់​ធនាគារ​អេស៊ីលីដាបង្ហាញពីទំនុកចិត្ត​របស់វិនិយោគិន​មកលើទីផ្សារមូលបត្រកម្ពុជា

លោក ហុង សុហ៊ួរ អគ្គនាយនៃផ្សារមូលបត្រកម្ពុជា (CSX) បានថ្លែងប្រាប់កម្ពុជាថ្មីថា ការប្រមូលទុនដ៏ជោគជ័យរបស់ធនាគារអេស៊ីលីដាប្រមាណជា១០០លានដុល្លារពីការបោះផ្សាយសញ្ញាបណ្ណ​បន្ទាប់បន្សំ (Subordinating Bond) ពីផ្សារហ៊ុនកាលពីពេលថ្មីៗនេះ បង្ហាញពីការជឿជាក់ និងទំនុកចិត្តរបស់វិនិយោគក្នុងស្រុកមកលើទីផ្សារ ជាពិសេសវានឹងធ្វើឱ្យទីផ្សារកាន់តែទាក់ទាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​កាលពីថ្ងៃទី២២ ខែមករា ឆ្នាំ២០២៥ ធនាគារ អេស៊ីលីដា ដែលជាធនាគារពាណិជ្ជទីមួយដែលបានបោះផ្សាយលក់មូលបត្រកម្មសិទ្ធិជាសាធារណៈនៅផ្សារមូលបត្រកម្ពុជា (CSX) បានធ្វើបរិវិសកម្មដំណាក់កាលទី១ ប្រកបដោយភាពជោគជ័យ ដែលមានវិនិយោគិនគុណវុឌ្ឍបញ្ជាទិញសញ្ញាបណ្ណរហូតដល់ ​ ៨៥,៨៣៧ លានដុល្លារអាមេរិក។

លុះនៅថ្ងៃទី ២៤ ខែកុម្ភៈ ធនាគារ អេស៊ីលីដា​​ បានធ្វើការបោះផ្សាយសញ្ញាបណ្ណបន្ទាប់បន្សំជាផ្លូវការនៅ CSX ​ដោយបានប្រមូលទុនជាង៨៥លានដុល្លារដើម្បីយកទៅពង្រីកអាជីវកម្មរបស់ខ្លួន។​

កាលពីថ្ងៃទី៣ និងថ្ងៃទី៤ ខែមីនាថ្មីៗនេះ ​អេស៊ីលីដា ក៏នៅតែបានបន្តទទួលបានភាពជោគជ័យក្នុងការ ធ្វើបរិវិសកម្មដំណាក់កាលទី២ លើចំនួនសញ្ញាបណ្ណដែលនៅសល់ ដោយមានវិនិយោគិនគុណវុឌ្ឍបញ្ជាទិញសញ្ញាបណ្ណ រហូតដល់ ៥៦ ​៦៥០ លានរៀល ឬជាង ១៤​លានដុល្លារអា​។ ដូច្នេះ ការធ្វើ បរិវិសកម្មទាំងពីរដំណាក់កាលមានទឹកប្រាក់សរុបចំនួន ៤០០ពាន់លានរៀល ប្រមាណជា ១០០លានដុល្លារអាមេរិក។

បើយោងតាមលោក ហុង សុហ៊ួរ ការណ៍ដែលធនាគារអេស៊ីលីដាអាចកៀរគរទុនបានប្រមាណ១០០លានដុល្លារនាដើមឆ្នាំ២០២៥នេះ បើទោះបីជាធ្វើការបោះផ្សាយលក់ចំនួនពីរដង ប៉ុន្តែការបោះផ្សាយម្តងៗតែមួយថ្ងៃគឺទទួលបានការគាំទ្រយ៉ាងច្រើនពីវិនិយោគិន។

លោកថា៖«ការណ៍នេះបញ្ចាក់ឱ្យឃើញថាវិនិយោគិនក្នុងស្រុកយើងនៅមានសាច់ប្រាក់ទំនេរច្រើនដែលអាចវិនិយោគបាន។ អ្វីដែលសំខាន់នោះគឺការវិនិយោគនេះបានផ្តល់ផលចំណេញគ្រប់គ្រាន់ និងពួកគាត់មានទំនុកចិត្តលើការវិនិយោគជាពិសេសនៅលើទីផ្សារមូលបត្រកាន់តែច្រើន»។

«នេះហើយគឺជាក្តីស្រម៉ៃរបស់យើងក្នុងការបង្កើតទីផ្សារមូលបត្រតាំងពី២០១២មក ដែលយើងអាចអនុញ្ញាតិឱ្យវិនិយោគិនអាចធ្វើការកៀរគរទុនពីទីផ្សារនេះបាន និងកាន់តែច្រើនឡើងៗដើម្បីយកទៅពង្រីកអាជីវកម្ម និងទទួលបានផលយកមកបែងចែកដល់វិនិយោគិនទៅតាមប្រភេទមូលបត្រដែលពួកគាត់បានបោះផ្សាយ»។ នេះបើតាមការថ្លែងបញ្ជាក់ពីលោក ហុង សុហ៊ួរ។

បណ្ឌិត អ៊ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា ភីអិលស៊ី បាន​មាន​ប្រសាសន៍​នៅក្នុងកម្មវិធីនោះថា សញ្ញាបណ្ណបន្ទាប់បន្សំនេះ គឺជាឧបករណ៍ហិរញ្ញវត្ថុទូទៅ ដែលធនាគារជុំវិញពិភពលោក រួមទាំងធនាគារ អេស៊ីលីដា បាននិងកំពុងប្រើប្រាស់ ព្រមទាំងបានចូលរួមចំណែកក្នុងការពង្រឹង និងការពង្រីកវិសាលភាព ព្រមទាំងការបង្កើនសក្តានុពលអាជីវកម្មរបស់ធនាគារ ឱ្យកាន់តែរីកចម្រើន​ប្រកបដោយចីរភាព និងប្រសិទ្ធភាពប្រកបដោយទំនុកចិត្តពីអតិថិជន និងសាធារណជន។

លោកបានថ្លែងថា៖«ខ្ញុំបាទជឿជាក់ថា ការបោះផ្សាយសញ្ញាបណ្ណបន្ទាប់បន្សំនេះ ​និងផ្តល់ឱ្យវិនិយោគិន​ និងអតិថិជនរបស់ធនាគារនូវជម្រើសវិនិយោគមួយបន្ថែមទៀត​ជាមួយធនាគារ អេស៊ីលីដា»។

បើយោងតាមនិយ័តករមូលបត្រ​កម្ពុជា ​គិតត្រឹមថ្ងៃទី៤ខែមិនាឆ្នាំ២០២៥នេះ CSX មានក្រុមហ៊ុនចុះបញ្ជីចំនួន ២៤ ដែលមានមូលនិធិសរុបជាង ៤៧២ លានដុល្លារ។ ក្នុងចំណោមក្រុមហ៊ុនទាំង ២៤ នេះ មានក្រុមហ៊ុនចំនួន ៣ ដែលបានចុះបញ្ជីសញ្ញាប័ណ្ណបៃតង និងនិរន្តរភាព៕