ត្រាំ៖ បើ​ណាតូ​អត់​ហ៊ាន​ចំណាយ អាមេរិក​នឹង​មិន​ជួយ​ការពារ​ឡើយ

ប្រធានាធិបតីអាមេរិក លោក ដូណាល់ ត្រាំ បានអះអាងសារជាថ្មីនូវគោលជំហររបស់ខ្លួនថា សហរដ្ឋអាមេរិកនឹងមិនការពារសម្ព័ន្ធមិត្តណាតូ ដែលមិនបំពេញតាមគោលដៅចំណាយលើវិស័យការពារ​ជាតិ​របស់​ខ្លួន​នោះទេ។

ថ្លែង​ទៅ​កាន់​អ្នក​សារព័ត៌មាន​នៅ​ការិយាល័យ​ពង​ក្រពើ​កាល​ពី​ថ្ងៃ​​ព្រហស្បតិ៍​ទី​​​៦​ខែ​មីនា លោក ត្រាំ បានបង្ហាញការសង្ស័យអំពីគោលការណ៍ការពាររួមរបស់អង្គការណាតូ ដោយបញ្ជាក់ថា៖ «វា​ជា​រឿង​សមហេតុ​ផល។ ប្រសិនបើពួកគេមិនបង់ប្រាក់ ខ្ញុំនឹងមិនការពារពួកគេទេ»។

ជំហរនេះស្របទៅនឹងការរិះគន់ដ៏យូរ​ណាស់​មកហើយ​របស់លោក ត្រាំ ទៅលើសមាជិកណាតូ ដែលមិនបានរួមចំណែកដោយយុត្តិធម៌របស់ពួកគេចំពោះការចំណាយលើវិស័យការពារជាតិ។ នៅឆ្នាំ​២០១៧ លោកបានអំពាវនាវ​ឲ្យ​សម្ព័ន្ធមិត្តណាតូបង្កើនការប្តេជ្ញាចិត្តផ្នែកហិរញ្ញវត្ថុរបស់ពួកគេក្នុងការការពារ ឬផ្តល់សំណងដល់សហរដ្ឋអាមេរិក ដោយអះអាងថាប្រទេសដូចជាអាល្លឺម៉ង់ជំពាក់ «ប្រាក់ដ៏ច្រើន» សម្រាប់វិស័យការពារជាតិ។

មេដឹកនាំអឺរ៉ុប បានឆ្លើយតបទៅនឹងការទាមទាររបស់លោក ត្រាំ ដោយសន្យាបង្កើនការចំណាយលើវិស័យការពារជាតិ។ នៅក្នុងកិច្ចប្រជុំកំពូ​ល​កាលពីថ្ងៃ​ព្រហស្បតិ៍​នៅទីក្រុងប្រ៊ុចសែល មេដឹកនាំសហភាពអឺរ៉ុបបានយល់ព្រមប្រមូលប្រាក់រហូតដល់ ៨០០​ពាន់លានអឺរ៉ូ រួមទាំងប្រាក់កម្ចីចំនួន ១៥០​ពាន់លានអឺរ៉ូ សម្រាប់ការទិញរួមគ្នានៃឧបករណ៍ការពារជាតិ។ ប្រធានាធិបតីបារាំងលោក Emmanuel Macron បានសង្កត់ធ្ងន់លើការគំរាមកំហែងអត្ថិភាពដែលបង្កឡើងដោយរុស្ស៊ី និងបានពង្រីកការរារាំងនុយក្លេអ៊ែររបស់បារាំងទៅកាន់តំបន់អឺរ៉ុបផ្សេងទៀត ដែលមានបំណងសម្រាប់កិច្ចសហប្រតិបត្តិការនៅពាក់កណ្តាលឆ្នាំ​២០២៥៕

ដោយ៖ ឈាង

ចុចអាន៖ សមាជិក EU ទាំង​២៧ អនុម័ត​លើ​ការ​បង្កើន​ចំណាយ​យោធាសរុប ៨០០​ពាន់​លាន​អឺរ៉ូ