​ត្រឹម​២ថ្ងៃ នៃ​ការ​ប្រារព្ធ​ពិធី​បុណ្យ​ឆ្នេរ​ខ្សាច់ ​កោះ​ប៉ែន​ទទួល​បាន​ភ្ញៀវទេសចរណ៍ជាតិ និង​អន្តរជាតិ​ជាង​១១ម៉ឺននាក់

នៅ​ក្នុង​ឱកាសប្រារព្ធពិធីបុណ្យឆ្នេរខ្សាច់កោះប៉ែន ដើម្បី​អបអរ​ខួប ១៥ឆ្នាំ (២០១១-២០២៥) នៃការបង្កើតកន្លែងកម្សាន្ត ឆ្នេរកោះប៉ែន ស្ពានឫស្សី(ប្រដឹស) ព្រឹត្តិការណ៍ប្រដាល់គុនខ្មែរ និង​ការ​ប្រគុំតន្រ្តីទេសចរណ៍ខ្នាតយក្ស ចាប់ពីថ្ងៃទី០៨ ដល់ថ្ងៃទី០៩ ខែមីនា ខេត្តកំពង់ចាម ទទួលភ្ញៀវមកលេងកំសាន្តសរុបចំនួន ១១៤.៦៦២នាក់។ នេះបើតាមការ ឱ្យ​ដឹង​ពី លោក ស៊ាន សុគន្ធ ប្រធានមន្ទីរទេសចរណ៍ ខេត្តកំពង់ចាម នាថ្ងៃទី១០ មីនា ឆ្នាំ២០២៥។

លោក​ប្រធានមន្ទីរទេសចរណ៍ ខេត្តកំពង់ចាម ឱ្យដឹងដែរថា ក្នុងចំណោមភ្ញៀវទាំងអស់នោះ មានភ្ញៀវទេសចរណ៍ជាតិ ចំនួន ១១៤.៤០២នាក់ និងភ្ញៀវទេសចរណ៍បរទេស ចំនួន ២៦០នាក់ ។

សូមជម្រាបថា បុណ្យ “ឆ្នេរខ្សាច់កោះប៉ែន” ត្រូវបានម្ចាស់រមណីយដ្ឋាន រៀបចំរយៈពេល ១សប្ដាហ៍ ចាប់ពីថ្ងៃទី៧ ដល់ថ្ងៃទី១២ ខែមីនា នៅបរិវេណរមណីយដ្ឋានធម្មជាតិឆ្នេរខ្សាច់កោះប៉ែន ។ ការរៀបចំពិធីបុណ្យនេះឡើង ដើម្បី​លើក​កម្ពស់វិស័យទេសចរណ៍ និង​ការ​បង្កលក្ខណៈកម្សាន្តសប្បាយ ជូន​ដល់​បង​ប្អូន​ប្រជាពលរដ្ឋ នៅក្នុងខេត្ត និងក្រៅខេត្ត ក៏ដូចជា ភ្ញៀវទេសចរជាតិ និងអន្តរជាតិ មកលេងកំសាន្ត ឱ្យបានច្រើនកុះករ និងដើម្បី អបអរសាទរ គម្រប់ ១៥ឆ្នាំ នៃការបង្កើតរមណីយដ្ឋាន ឆ្នេរខ្សាច់កោះប៉ែន ផងដែរ ។

ក្នុងព្រឹត្តិការណ៍​នោះ ក៏​បាន​រៀប​ចំ​កម្មវិធីកម្សាន្តជាច្រើន ដូចជា ការប្រកួតបាល់ទាត់លើវាលខ្សាច់ ការតាំងពិព័រណ៍ ការប្រគំតន្ត្រី ប្រដាល់គុនខ្មែរ និងការបាញ់កាំជ្រួច ផងដែរ ៕

អត្ថបទ​និង​រូបភាព ​៖ ​ឡេក​ ចាន់ពេជ្រ