ព័ត៌មានអន្ដរជាតិ

«ប័ណ្ណមាស» តម្លៃ៥លានដុល្លាររបស់លោក ត្រាំ លក់មួយថ្ងៃបាន ១ ០០០សន្លឹក

បានផុស

១ year មុន

នៅ

ថ្ងៃអង្គារ ២៥ មីនា ២០២៥

ដោយ

Chheang

រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick បានប្រកាសថា រដ្ឋាភិបាលទទួលបាន ៥ពាន់លានដុល្លារក្នុងមួយថ្ងៃ ដោយលក់ប័ណ្ណមាសចំនួន ១ ០០០សន្លឹក ខណៈប័ណ្ណមាសនីមួយៗមានតម្លៃ ៥លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីដាក់លក់ «ប័ណ្ណមាស» ដែលបង្កើតឡើងដោយរដ្ឋបាលលោកប្រធានាធិបតី ដូណាល់ ត្រាំ កាលពីថ្ងៃទី២៥ខែកុម្ភៈឆ្នាំ២០២៥ ផ្តល់ឲ្យជនបរទេសដែលមានទ្រព្យសម្បត្តិស្ដុកស្ដម្ភ នូវសិទ្ធិស្នាក់នៅ និងការចូលសញ្ជាតិអាមេរិក បូករួមជាមួយឱកាសវិនិយោគដ៏ច្រើនសន្ធឹកសន្ធាប់។

នៅក្នុងបទសម្ភាសមួយជាមួយ All-In Podcast កាលពីសប្ដាហ៍មុន លោក Lutnick បានគូសបញ្ជាក់អំពីសក្តានុពលរបស់កម្មវិធី ដោយកត់សម្គាល់ថា រដ្ឋបាលអាមេរិកមានគោលបំណងបង្កើតចំណូលយ៉ាងហោចណាស់ ៥ទ្រីលានដុល្លារ ដោយការចេញលក់ប័ណ្ណមាសចំនួន ១លានសន្លឹក។ រដ្ឋមន្ត្រីពាណិជ្ជកម្មរូបនេះ បានបន្ថែមថា៖ «មានមនុស្ស ៣៧លាននាក់នៅលើពិភពលោកដែលមានសមត្ថភាពទិញប័ណ្ណនេះ…លោកប្រធានាធិបតីគិតថា យើងអាចលក់បាន១លានប័ណ្ណ»។

សូមបញ្ជាក់ថា គំនិតផ្តួចផ្តើម «ប័ណ្ណមាស» គឺជាកម្មវិធីថ្មីមួយ ដែលជំនួសកម្មវិធីវិនិយោគិនអន្តោប្រវេសន៍ «EB-5» ពីមុន។ ខណៈពេលដែលកម្មវិធី «EB-5» ទាមទារការវិនិយោគអប្បបរមាចំនួន ១,០៥លានដុល្លារ និងការបង្កើតការងារឲ្យបានយ៉ាងហោចណាស់១០កន្លែងនោះ កម្មវិធី«ប័ណ្ណមាស»ជួយសម្រួលដល់ដំណើរការនេះ ដោយផ្តោតជាចម្បងលើចំនួនទឹកប្រាក់វិនិយោគ (ជាមួយនឹងតម្រូវការ ៥លានដុល្លារ) ហើយមិនត្រូវការការបង្កើតការងារជាក់លាក់នោះទេ៕

ដោយ៖ ឈាង