គ្រូ​ព្រះ​ខ័ន​រាជ​ស្វាយរៀង ទទួលស្គាល់គុណភាពកីឡាករ ភ្នំពេញក្រោន ល្អទាំងខ្មែរ និងបរទេស

គ្រូ​បង្វឹក​របស់​ក្លិបព្រះខ័នរាជស្វាយរៀង លោក Pep Munoz បានបង្ហាញក្តីព្រួយបារម្ភ​ខ្លះៗ មុនត្រូវជួប​ជាមួយ ភ្នំពេញក្រោន នៅក្នុងការប្រកួតលីគកំពូល កម្ពុជា Cambodian Premier League នាល្ងាចថ្ងៃ សៅរិ៍ ស្អែកនេះ វេលាម៉ោង ៦ ល្ងាច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសសញ្ជាតិ អាស្ប៉ាញ វ័យ ៤៥ ឆ្នាំ បានលើកសរសើរអំពីគុណភាពកីឡាករក្រុមម្ចាស់ផ្ទះ ភ្នំពេញក្រោន បច្ចុប្បន្ន គឺល្អទាំងខ្មែរ និងបរទេស។ ជាពិសេស កីឡាករខ្មែរមួយចំនួន ដែលអាចបង្ក​ការគ្រោះថ្នាក់ដល់ក្រុមរបស់លោកបាន ហើយលោកបានលើកយកកត្តានេះ ថាជារឿងមួយ ដែលធ្វើឱ្យលោកព្រួយបារម្ភ។

ថ្លែងនៅក្នុងសន្និសីទកាសែតកាលពីព្រឹកមិញ ត្រូវនឹងថ្ងៃ សុក្រ ទី៤ ខែមេសា លោក Pep Munoz បានមានប្រសាសន៍យ៉ាងដូច្នេះថា៖ «បើនិយាយអំពីក្តីព្រួយបារម្ភសម្រាប់ការប្រកួតថ្ងៃស្អែក យើងបានដឹងអំពីគុណភាពរបស់កីឡាករខាងភ្នំពេញក្រោនគ្រប់គ្នា។ ស្ថានភាពកីឡាករម្នាក់ៗរបស់ភ្នំពេញក្រោន ទាំងកីឡាករក្នុងស្រុក និងបរទេស គឺពួកគេមានស្ថានភាពមួយ ដែលល្អ ជាពិសេស គឺកីឡាករខ្មែរមួយចំនួន។ សម្រាប់ជាក្រុមវិញ ពួកគេបានផ្លាស់ប្តូរប្រព័ន្ធលេងមួយចំនួនស្រដៀងទៅនឹងការលេងកាលពីឆ្នាំមុន។ អ្វី ដែលរឹតតែសំខាន់ ឥឡូវវាជាពេលចុងរដូវកាល ដូច្នេះកីឡាករម្នាក់ៗ មានគោលដៅរៀងៗខ្លួន។ ចឹងអ្នកដែលចូលលេងថ្ងៃស្អែក ទាំងកីឡាករស្វាយរៀង និងភ្នំពេញក្រោន នឹងផ្តល់អ្វីគ្រប់យ៉ាងនៅលើទីលាន»។

បញ្ជាក់ជាថ្មីថា នៅថ្ងៃ សៅរិ៍ ស្អែកនេះ ក្រុមព្រះខ័នរាជស្វាយរៀង នឹងធ្វើដំណើទៅកាន់កីឡដ្ឋានស្មាត អ អេស អិន របស់ ភ្នំពេញក្រោន ដើម្បីប្រកួតក្នុងសប្តាហ៍ទី ២៧ នៃខេមបូឌានព្រីមៀរ​លីគ។ ការប្រកួតនេះ ត្រូវបានគេចាត់ទុកជាការប្រកួតដ៏សំខាន់ ព្រោះប្រសិនបើក្រុមណាឈ្នះការប្រកួតនេះ នោះនឹងត្រូវឡើងទៅកាន់កាប់តំណែងកំពូលតារាង៕

អត្ថបទ៖ សេម កុសល