ភ្លើងឆេះសណ្ឋាគារប្រណីតលំដាប់ផ្កាយប្រាំនៅខេត្តឈៀងម៉ៃ ប្រទេសថៃ

អគ្គិភ័យដ៏សន្ធោសន្ធៅបានឆាបឆេះសណ្ឋាគារ Dhara Dhevi ប្រណិតលំដាប់ផ្ដាយប្រាំ​ដ៏ល្បីក្នុងខេត្តឈៀងម៉ៃប្រទេសថៃ កាលពីព្រឹកព្រលឹមថ្ងៃពុធ តែមិនទាន់មានរបាយការណ៍អ្នករងរបួស ឬស្លាប់នោះទេ។ នេះបើយោងតាមការចេញផ្សាយរបស់សារព័ត៌មា The Nation នៅថ្ងៃទី២៣ខែមេសានេះ។

យោងតាមក្រុមអ្នកពន្លត់អគ្គីភ័យ ភ្លើងបានឆេះនៅម៉ោងប្រហែល ១ និង ៥០ ​នាទី​រំលងអធ្រាត្រឈាន​ចូល​ព្រឹកថ្ងៃពុធ នៅសណ្ឋាគារ Dhara Dhevi ដែលមានទីតាំងនៅសង្កាត់ Tha Sala ស្រុក Muang ខេត្ត Chiang Mai។ សេចក្តីរាយការណ៍​បឋម​ពី​មន្ត្រី​នៅ​កន្លែង​កើតហេតុ​បញ្ជាក់​ថា អគ្គិភ័យ​បាន​ឆាបឆេះ​ពីផ្នែក​ខាងក្នុង​នៃ​អគារ​សណ្ឋាគារ ។

មូលហេតុ​ពិតប្រាកដ​នៃ​អគ្គិភ័យ​នៅ​មិនទាន់​អាច​បញ្ជាក់បាន​នៅឡើយទេ ហើយ​ទំហំ​នៃ​ការ​ខូចខាត​ក៏មិនទាន់​ត្រូវបាន​វាយតម្លៃ​នៅឡើយដែរ​។ ក្រុមអ្នកពន្លត់អគ្គិភ័យកំពុងបន្តកិច្ចខិតខំប្រឹងប្រែងដើម្បីទប់ស្កាត់ការឆាបឆេះ និងកំពុងត្រួតពិនិត្យតំបន់ជុំវិញ ដើម្បីទប់ស្កាត់កុំឱ្យរាលដាលដល់ផ្នែកផ្សេងទៀតនៃសណ្ឋាគារ។

របាយការណ៍​បឋម​បញ្ជាក់​ថា​មិន​មាន​អ្នក​របួស​ឬ​ស្លាប់​ទេ​ ហើយអាជ្ញាធរ​នឹង​បន្ត​ស៊ើបអង្កេត និង​វាយតម្លៃ​ស្ថានភាព​ដោយ​មានការ​រំពឹង​ទុក​មានព័ត៌មាន​ថ្មីៗ​បន្ថែម​ទៀត។

គួរបញ្ជាក់ថា សណ្ឋាគារ Dhara Dhevi លំដាប់ផ្កាយប្រាំ ដែលរចនាឡើងដើម្បីឆ្លុះបញ្ចាំងពីសោភ័ណភាពប្រវត្តិសាស្ត្រ Lanna ( ថៃភាគខាងជើង) ត្រូវបានសាងសង់ក្នុងឆ្នាំ ២០០២ជាមួយនឹងថវិកាចំនួន ៣ ពាន់លានបាត(៨៩.៦១ លានដុលា្លរ)នៅក្នុងស្រុក Muang ខេត្ត Chiang Mai ។ សណ្ឋាគារនេះមាន ទំហំ ១៥៣រ៉ៃ (២៤ ហិកតា) និង ១២៣ បន្ទប់ បានបើកដំណើរការក្នុងឆ្នាំ ២០០៤ ហើយត្រូវបានគ្រប់គ្រងដំបូងដោយ Mandarin Oriental Hotel Group ។

ចាប់តាំងពីបានបើកដំណើរការ សណ្ឋាគារបានប្រឈមមុខនឹងបញ្ហាហិរញ្ញវត្ថុជាបន្តបន្ទាប់។ នៅឆ្នាំ ២០១៥ ម្ចាស់ភាគហ៊ុនធំរបស់ខ្លួនបានលក់អចលនទ្រព្យនេះទៅឱ្យក្រុមហ៊ុន Inter Energy Corporation (IFEC) ។ ទោះយ៉ាងណាមានបញ្ហាប្រឈមកាន់តែស៊ីធ្ងន់ធ្ងរ ក្នុងអំឡុងពេលជំងឺរាតត្បាតកូវីដ១៩ ដែលនៅទីបំផុតនាំទៅដល់ការបញ្ឈប់ការងារយ៉ាងច្រើន៕

អត្ថបទ៖ ប៊ុន​​ សុភាព