ចិននឹងមិនលក់បង្ខូចតម្លៃក្នុងប្រទេសណាមួយនោះទេ ​

ឯកអគ្គរដ្ឋទូត​ចិន​ប្រចាំប្រទេសឥណ្ឌា លោក Xu Feihong បានសរសេរ​ក្នុងអត្ថបទមួយកាលពីថ្ងៃអង្គារថា ប្រទេសចិននឹងមិន​លក់បង្ខូចតម្លៃនូវទំនិញរបស់ខ្លួន​ក្នុងប្រទេសផ្សេងទៀត ដោយ​សារ​តែ​សង្រ្គាម​ពាណិជ្ជកម្មជាមួយ​សហរដ្ឋអាមេរិក​នោះទេ។ ​នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិកបាន​ដាក់ពន្ធ ១៤៥ ភាគរយ លើទំនិញនាំចូលពីចិន ហើយចិនបានសងសឹកវិញដោយដាក់ពន្ធ ១២៥ ភាគរយ លើទំនិញ​អាមេរិក។ ការណ៍នេះ បង្កក្ដីបារម្ភពីប្រទេសផ្សេងៗអំពីលំហូរទំនិញថោកៗចិនចូលក្នុងទីផ្សាររបស់ពួកគេ​ ដើម្បីជំនួសទីផ្សារអាមេរិក ដែលអាច​ធ្វើឱ្យប៉ះពាល់ដល់អាជីវកម្មក្នុងស្រុក។

​ក្នុងអត្ថបទវិចារណកថាចុះផ្សាយនៅថ្ងៃអង្គារនេះ លើកាសែត Indian Express ​ក្រោមចំណងជើងថា «ក្រោកឈរឡើងចំពោះការគំរាមកំហែងរបស់ទីក្រុងវ៉ាស៊ីនតោន» ​លោក​ឯកអគ្គរដ្ឋទូតចិន Xu បាននិយាយថា ​ចិនកំពុងផ្តោតលើការពង្រីកតម្រូវការក្នុងស្រុក និងជំរុញការប្រើប្រាស់។

លោក Xu បានសរសេរបន្តថា៖ «ចិនគោរពយ៉ាង​ខ្ជាប់ខ្ជួនទៅនឹងវិន័យឧបត្ថម្ភធនរបស់អង្គការពាណិជ្ជកម្មពិភពលោក (WTO) និងច្បាប់ទីផ្សារ។ យើងនឹងមិនចូលរួមក្នុងការ​លក់បង្ខូចតម្លៃទីផ្សារ ឬការប្រកួតប្រជែង​ហួសហេតុ ហើយយើងក៏នឹង​មិនរំខានដល់ឧស្សាហកម្ម និងការអភិវឌ្ឍ​សេដ្ឋកិច្ចរបស់ប្រទេសផ្សេងទៀតដែរ»៕