ប៉ាគីស្ថាន​បាញ់ទម្លាក់យន្តហោះចម្បាំងឥណ្ឌា​៥​គ្រឿង​ ខណៈ​ជនស៊ីវិលស្លាប់កើនឡើងជាបន្ត

សង្គ្រាមថ្មីនៅតំបន់កាស្មៀរបានផ្ទុះឡើង បន្ទាប់ពីឥណ្ឌាបើកប្រតិបត្តិការយោធា វាយប្រហារទឹកដីប៉ាគីស្ថាន ដោយអះអាងកំណត់គោលដៅលើជំរំភេរវករ ប៉ុន្តែបានសម្លាប់ជនស៊ីវិលចំនួន៨នាក់ហើយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា ប៉ាគីស្ថាន ក៏មិននៅស្ងៀមដែរ ដោយចាត់វិធានការក្តៅបាញ់ទម្លាក់យន្តហោះចម្បាំងឥណ្ឌាចំនួន៥គ្រឿង ក្នុងនោះមានទាំងយន្តហោះ Rafales ដែលទីក្រុងញូវដែលីទិញពីប្រទេសបារាំងផងដែរ។

តាមការចុះផ្សាយរបស់ CNN ដោយដកស្រង់ប្រភពសន្តិសុខប៉ាគីស្ថាននៅថ្ងៃពុធទី៧ខែឧសភាឆ្នាំ២០២៥, កងកម្លាំងទីក្រុងអ៊ីស្លាម៉ាបាដ បានបាញ់ទម្លាក់យន្តហោះចម្បាំងឥណ្ឌាចំនួន៥គ្រឿង និងដ្រូនមួយគ្រឿង អំឡុងការវាយប្រហារ។

ក្នុងសេចក្តីថ្លែងការណ៍, យន្តហោះដែលត្រូវបាញ់ធ្លាក់មានដូចជាយន្តហោះ​ចម្បាំង Rafale ផលិត​ដោយ​បារាំង​ចំនួន៣គ្រឿង, យន្តហោះ​ចម្បាំង MiG-29 មួយ​គ្រឿងនិង​យន្តហោះ​ចម្បាំង SU-30 មួយ​គ្រឿង ចំណែកដ្រូននោះគឺជាប្រភេទ Heron។

ទោះបីជាយ៉ាងណាក៏ដោយ ប្រភពនោះមិនបានបញ្ជាក់ពីទីតាំងនៃការបាញ់ធ្លាក់ឡើយ។

ស្របពេលជាមួយគ្នានោះ មនុស្ស៨នាក់ ត្រូវបានសម្លាប់ក្នុងនោះមានទាំងកុមារផងដែរ ខណៈ៣៥នាក់រងរបួស ក្នុងការវាយប្រហារ២៤លើកនៅ៦ទីតាំងនៃតំបន់កាស្មៀរ។

នៅតំបន់ Ahmadpur ខាងកើតនៃខេត្ត Punjab មានមនុស្សស្លាប់៥នាក់ ក្នុងនោះមានក្មេងស្រីអាយុ៣ឆ្នាំម្នាក់ ចំណែកបុរសម្នាក់ត្រូវសម្លាប់នៅទីក្រុង Muridke ក្បែររដ្ឋធានី Lahore។ ដោយឡែកនៅទីក្រុង Kotli នៃតំបន់កាស្មៀរខាងប៉ាគីស្ថានឯណោះវិញ ក្មេងស្រីអាយុ១៦ឆ្នាំម្នាក់និងមនុស្សម្នាក់ទៀតអាយុ១៨ឆ្នាំ ក៏ត្រូវបានសម្លាប់ដូចគ្នា៕

អត្ថបទ៖ សុខ សុវណ្ណ

ចុចអាន៖ សង្គ្រាម ឥណ្ឌា-ប៉ាគីស្ថាន ផ្ទុះឡើងហើយ!