ប្រាក់ចំណេញរបស់តំបន់សេដ្ឋកិច្ចពិសេសភ្នំពេញ​កើនឡើងខ្ពស់ក្នុងត្រីមាសទី១

ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ដែលជាក្រុមហ៊ុនអភិវឌ្ឍតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RPPSEZ) បានរាយការណ៍ពីការកើនឡើងយ៉ាងខ្លាំងនៃប្រាក់ចំណេញសុទ្ធសម្រាប់ត្រីមាសទី១ ឆ្នាំ ២០២៥ ដោយទទួលបាន ៨,៤លានដុល្លារ ស្មើនឹង ៥៣ដងខ្ពស់ជាង ១៥៩,០០០ ដែលបានកត់ត្រាក្នុងរយៈពេលដូចគ្នាកាលពីឆ្នាំមុន ដែលភាគច្រើនដោយសារតែការលក់អចលនទ្រព្យវិនិយោគ។

យោងតាមរបាយការណ៍របស់ RPPSEZ ផ្ញើរទៅកាន់ផ្សារមូលបត្រកម្ពុជាកាលពីល្ងាចថ្ងៃទី៨ខែឧសភា​ តំបន់សេដ្ឋកិច្ចពិសេសមួយនេះក៏ទទួលបានប្រាក់ចំណូលប្រចាំត្រីមាសក៏បានកើនឡើង ៥១២% ពីមួយឆ្នាំទៅមួយឆ្នាំ ដែលឈានដល់ ១៤,៩ លានដុល្លារ។

លោក ហាក់ សិរី ប្រធានជាន់ខ្ពស់ផ្នែកទីផ្សារ និងទំនាក់ទំនងសាធារណៈក្រុមហ៊ុនតំបន់សេដ្ឋកិច្ចពិសេសរ៉ូយ៉ាល់ភ្នំពេញ បានថ្លែងប្រាក់កម្ពុចាថ្មីកាលពីពេលកន្លងមកថា កន្លងមកជិត ២០ ឆ្នាំ ដែលបានបង្កើតតំបន់សេដ្ឋកិច្ចពិសេសភ្នំពេញចាប់តាំងពីឆ្នាំ ២០០៦ រហូតមកដល់បច្ចុប្បន្ន មានការអភិវឌ្ឍកើនឡើងជាលំដាប់។

គិតមកដល់ពេលនេះ តំបន់សេដ្ឋកិច្ចពិសេសភ្នំពេញ​ទទួលបានការវិនិយោគពីក្រុមហ៊ុន​ទូទាំង​ពិភពលោកចំនួន ១៥ ប្រទេស ដែលមានក្រុមហ៊ុនចំនួន ១១៦ ក្រុមហ៊ុន ក្នុងនោះ​ក្រុមហ៊ុនដែលមកពីប្រទេសជប៉ុនឈានមុខគេ គឺមានប្រមាណ ៤០% នៃចំនួនក្រុម​ហ៊ុនសរុប បន្ទាប់មកគឺប្រទេសចិនមានប្រមាណ ៣៣ ក្រុមហ៊ុន។

តម្លៃវិនិយោគសរុបមកពីក្រុមហ៊ុនទាំងអស់ក្នុងតំបន់សេដ្ឋកិច្ចពិសេសភ្នំពេញ មានប្រមាណ ៨២១ លានដុល្លារ ដែលភាគច្រើនវិនិយោគលើវិស័យអេឡិកត្រូនិក និងគ្រឿងអគ្គិសនីមាន ១៣ ក្រុមហ៊ុន។ ក្រៅពីនេះ មានគ្រឿងបង្គុំរថយន្ត និងការដំឡើងរថយន្ត ព្រមទាំងសម្ភារប្រើប្រាស់​ប្រ​ចាំថ្ងៃ និងផលិតភេសជ្ជៈ។

លោក ហាក់ សិរី ថ្លែងថា៖ «ក្រុមហ៊ុនដែលកំពុងវិនិយោគនៅក្នុងតំបន់សេដ្ឋកិច្ចពិសេស ភាគច្រើនជាក្រុមហ៊ុនដែលមានសក្ដានុពល ហើយមានរោងចក្រជាច្រើននៅជុំវិញពិភពលោក ដូចជា ឧទារហរណ៍ ក្រុមហ៊ុន ក្រុមហ៊ុន Minebea Mitsumi ជាក្រុមហ៊ុនផលិតគ្រឿងអេឡិកត្រូនិក ដែលត្រូវបានគេប្រើក្នុងឧបករណ៍អេឡិកត្រូនិកដូចជា ទូរស័ព្ទដៃ គ្រឿងអេឡិកត្រូនិកជាច្រើនទៀត ដែលសុទ្ធសឹងតែជាក្រុមហ៊ុនមានឈ្មោះបោះសំឡេង»។

យោងតាមក្រសួងឧស្សាហកម្ម គិតត្រឹមដំណាច់ឆ្នាំ ២០២៤ កម្ពុជាមានតំបន់សេដ្ឋកិច្ចពិសេសដែលមានរោងចក្រដំណើរការមាន​​​ចំនួន ៣០ ស្ថិតនៅក្នុង ១២ រាជធានី-ខេត្ត កើនឡើង ៤ តំបន់ ស្មើនឹង ១៥,៣៨ ភាគរយ បើធៀបនឹងឆ្នាំ ២០២៣។

ទុនវិនិយោគសរុបនៅក្នុង​វិស័យ​ឧស្សា​ហ​កម្ម មានចំនួនជាង ២០,៤៥ ពាន់​លាន​ដុល្លារ នៅក្នុងឆ្នាំ ២០២៤ កើនឡើង ១០,១៨ ភាគរយ ធៀបនឹងឆ្នាំ ២០២៣។

វិស័យឧស្សាហកម្មត្រូវបានព្យាករណ៍ថា នឹងបន្តនិន្នាការកើនឡើងក្នុងរង្វង់ ៨,៦% ក្នុងឆ្នាំ ២០​២៥ ដោយគាំទ្រដោយការរក្សាបានតុល្យភាពនៃអនុវិស័យកាត់ដេរ និងអនុវិស័យកម្មន្តសាល​មិន​មែនកាត់ដេរ៕