វិបត្តិមនុស្សធម៌កាន់តែធ្ងន់ធ្ងរនៅហ្គាហ្សា ខណៈ​​​អ៊ីស្រាអែល​បន្តបាញ់ស្រោច​​

យោធាអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់១៣នាក់ រួមទាំងកុមារ និងស្ត្រីជាច្រើននាក់ ខណៈដែលប្រទេសនេះនៅតែបន្តបង្អាក់ការនាំអាហារជំនួយចូលតំបន់ហ្គាហ្សា។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១២ខែឧសភានេះ។

ក្នុងចំណោមជនរងគ្រោះកាលពីថ្ងៃអាទិត្យ មានជនជាតិប៉ាឡេស្ទីនបីនាក់បានស្លាប់នៅក្នុងការវាយប្រហារដោយយន្តហោះគ្មានមនុស្សបើកលើរថយន្តមួយគ្រឿង និងពីរនាក់បានស្លាប់នៅក្នុងការទម្លាក់គ្រាប់បែកនៅលំនៅដ្ឋានភាគខាងត្បូងហ្គាហ្សា។ មនុស្សពីរនាក់ផ្សេងទៀតត្រូវបានសម្លាប់នៅក្នុងការបាញ់ផ្លោងដោយកាំភ្លើងធំ និបុរសម្នាក់ទៀតស្លាប់នៅជិតជំរុំជនភៀសខ្លួន Bureij កណ្តាលហ្គាហ្សា បន្ទាប់ពីយន្តហោះចម្បាំងរបស់អ៊ីស្រាអែលបានទម្លាក់គ្រាប់បែក។

ការសម្លាប់ដោយសារការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សានៅតែបន្តកើតឡើងស្របពេលដែលមិនមានអាហារ ទឹក ថ្នាំពេទ្យ ឬប្រេងឥន្ធនៈនាំចូលក្នុងទឹកដីហ្គាហ្សាអស់រយៈពេល ៧០ថ្ងៃមកហើយ ដោយសារតែការបិទផ្លូវរបស់ភាគី​អ៊ីស្រាអែល។ ប្រជាជននៅហ្គាហ្សាជាង ២,៣ លាននាក់កំពុងរស់នៅក្នុងភាពខ្វះខាត ខណៈជំនួយមនុស្សធម៌កាន់តែថមថយ។

យោងតាមតួលេខចុងក្រោយដោយក្រសួងសុខាភិបាលរបស់ហ្គាហ្សាកាលពីថ្ងៃអាទិត្យ យ៉ាងហោចណាស់មានជនជាតិប៉ាឡេស្ទីនចំនួន ៥២,៨២៩ នាក់បានស្លាប់និង ១១៩,៥៥៤ នាក់បានរងរបួសដោយការវាយប្រហារដោយយោធាអ៊ីស្រាអែល​ចាប់តាំងពីការវាយប្រហារដោយក្រុមហាម៉ាស់កាលពីថ្ងៃទី ០៧ ខែតុលា ឆ្នាំ ២០២៣ មកលើអ៊ីស្រាអែល​ភាគខាងត្បូង ដែលបានសម្លាប់មនុស្សប្រមាណ ១,១៣៩នាក់ និងបណ្តាលឱ្យមនុស្សជាង២០០នាក់ចូលទៅក្នុងហ្គាហ្សា៕

អត្ថបទ៖ ប៊ុន សុភាព