ណាតូ ប្តេជ្ញាថា ទោះយ៉ាងណា ក៏មិនទុកអ៊ុយក្រែន ចោលដែរ

មន្ត្រីយោធាកំពូលៗនៃអង្គការណាតូ បានប្រកាសថា ពួកគេនឹងមិនទុកអ៊ុយក្រែនឲ្យនៅតែឯងឡើយ ហើយនឹងផ្តល់ការគាំទ្រជារៀងដរាប ស្របពេលប្រឈមមុខជាមួយនឹងរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Anadolu, សេចក្តីប្រកាសនេះ ធ្វើឡើងក្នុងសម័យប្រជុំលើកទី១៩៣ នៃគណៈកម្មាធិការយោធាអង្គការណាតូក្នុងកម្រិតប្រធានអគ្គសេនាធិការ ដែលរៀបចំនៅទីក្រុងព្រុចសែល នៃប្រទេសបែលហ្ស៊ិកកាលពីថ្ងៃពុធទី១៤ខែឧសភាឆ្នាំ២០២៥។

ថ្លែងបើកសម័យប្រជុំ ប្រធានគណៈកម្មាធិការគឺឧត្តមនាវីត្រី Giuseppe Cavo Dragone បានសង្កត់ធ្ងន់លើភាពស្អិតរមួតក្នុងចំណោមយោធាជាសម្ព័ន្ធមិត្តនិងគូសបញ្ជាក់ពីការរួបរួមដ៏យូរអង្វែងរបស់ណាតូ។

លោកប្រកាសថា ណាតូនៅតែប្តេជ្ញាចិត្តដោយឥតងាករេក្នុងការគាំទ្រអ៊ុយក្រែន ហើយការគាំទ្របែបនេះ គឺចាំបាច់បំផុតដើម្បីធានាថា ទីក្រុងកៀវនឹងមានជំហររឹងមាំ។ ការគាំទ្រអ៊ុយក្រែនជាបន្ត គឺជាកត្តាសំខាន់ដើម្បីទប់ស្កាត់ការឈ្លានពានពីសំណាក់រុស្ស៊ីបន្ថែមទៀត។

សម័យប្រជុំនេះកើតឡើងស្របពេលប្រមុខណាតូ ម៉ាក រូតេ បានបង្ហាញសុទិដ្ឋិនិយម ចំពោះការបំបែកភាពទាល់ច្រកក្នុងកិច្ចចរចាសន្តិភាពអ៊ុយក្រែន-រុស្ស៊ី នៅឯទីក្រុងអ៊ីស្តង់ប៊ុលនៃប្រទេសតួកគី។

សូមជម្រាបថា ចាប់តាំងពីការផ្ទុះសង្គ្រាមនៅអ៊ុយក្រែនក្នុងឆ្នាំ២០២២មក ណាតូបានបង្កើនការផ្តល់ជំនួយរឹតខ្លាំងដល់អ៊ុយក្រែន ដ្បិតប្រទេសនេះមិនមែនជាសមាជិករបស់ខ្លួនក៏ដោយ។

ជំនួយទាំងនោះរួមមានសព្វាវុធ គ្រាប់រំសេវ ខែលការពារដែនអាកាស យន្តហោះគ្មានមនុស្សបើក ការចែករំលែកព័ត៌មានសម្ងាត់ និងការហ្វឹកហ្វឺនកងកម្លាំងអ៊ុយក្រែន។ មិនត្រឹមប៉ុណ្ណឹង សម្ព័ន្ធមិត្តណាតូក៏បានផ្តល់ជំនួយផ្នែកហិរញ្ញវត្ថុ មនុស្សធម៌ និងភស្តុភារយ៉ាងក្រាស់ក្រែលផងដែរ៕

អត្ថបទ៖ សុខ សុវណ្ណ

ចុចអាន៖ ប្រមុខណាតូ បញ្ជាក់ថា គ្មានសមាជិកភាពអ៊ុយក្រែន ក្នុងលក្ខខណ្ឌនៃកិច្ចព្រមព្រៀងសន្តិភាពទេ