ប្រមុខណាតូ បញ្ជាក់ថា គ្មានសមាជិកភាពអ៊ុយក្រែន ក្នុងលក្ខខណ្ឌនៃកិច្ចព្រមព្រៀងសន្តិភាពទេ

ប្រមុខអង្គការណាតូលោក ម៉ាក រូតេ បានបញ្ជាក់យ៉ាងច្បាស់ថា មិនមានសមាជិកភាពអ៊ុយក្រែនក្នុងសម្ព័ន្ធភាពយោធាដឹកនាំដោយអាមេរិកមួយនេះឡើយ ក្នុងលក្ខខណ្ឌនៃកិច្ចព្រមព្រៀងសន្តិភាពរវាងទីក្រុងកៀវនិងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ុយក្រែន តែងតែចិញ្ចឹមចិត្តចង់ចូលរួមជាមួយអង្គការណាតូ ដើម្បីធានាសន្តិសុខរបស់ខ្លួន ទាំងដែលដឹងថា រឿងនេះ ធ្វើឲ្យរុស្ស៊ីក្តៅស្លឹកត្រចៀក និងជំទាស់យ៉ាងដាច់អហង្ការក៏ដោយ។

ជុំវិញបញ្ហានេះ លោក រូតេ បានផ្តល់បទសម្ភាសទៅទូរទស្សន៍ MI Ukraina ក្នុងអំឡុងដំណើរទស្សនកិច្ចយ៉ាងភ្ញាក់ផ្អើលនៅអ៊ុយក្រែនកាលពីថ្ងៃពុធទី១៦ខែមេសាឆ្នាំ២០២៥ថា មិនមែនការសន្យាឲ្យអ៊ុយក្រែនចូលណាតូឡើយ ក្រោមកិច្ចព្រមព្រៀងពន្លត់ភ្លើងសង្គ្រាមជាមួយរុស្ស៊ី។

យ៉ាងណា លោកបង្ហើបថា មិនប្រាកដថា អ៊ុយក្រែន គ្មានថ្ងៃអាចចូលណាតូបាននោះទេ។ អ៊ុយក្រែន ប្រហែលមិនអាចប្តូរផ្លូវនេះបានឡើយ។

មួយលើកជាពីរលើក រុស្ស៊ីតែងអះអាងថា មហិច្ឆតារបស់ទីក្រុងកៀវ ក្នុងការចូលរួមជាមួយអង្គការណាតូ នេះហើយ គឺជាហេតុផលមួយក្នុងចំណោមហេតុផលដែលរុស្ស៊ីបើកប្រតិបត្តិការយោធានៅឆ្នាំ២០២២។

អព្យាក្រឹតភាពរបស់អ៊ុយក្រែន រួមជាមួយការរំសាយទ័ព និងការទទួលស្គាល់ទឹកដីដែលរុស្ស៊ីកាត់យក នៅតែជាការទាមទារដ៏សំខាន់ពីវិមានក្រឹមឡាំង សម្រាប់ការឈានដល់កិច្ចព្រមព្រៀងសន្តិភាព។

ទោះបីជាយ៉ាងណាក៏ដោយ ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី នៅតែទទូចថា សមាជិកភាពឬការធានាសន្តិសុខដូចណាតូ ត្រូវតែចងជាលក្ខខណ្ឌនៅក្នុងកិច្ចព្រមព្រៀងណាមួយ៕

អត្ថបទ៖ សុខ សុវណ្ណ

ចុចអាន៖ លោក រូតេ៖ ណាតូ មិនពាក់ព័ន្ធផែនការសន្តិភាពនៅអ៊ុយក្រែនទេ បើសមាជិកណាចង់ដាក់ទ័ព សូមបញ្ជូនទៅដោយខ្លួនឯង