កម្ពុជា និងអង់គ្លេស ពិភាក្សាពង្រឹងកិច្ចសហប្រតិបត្តិការលើវិស័យអប់រំជាមួយគ្នាចំនួន ៤ចំណុច

នៅថ្ងៃទី១៥ ខែឧសភា ឆ្នាំ២០២៥ បណ្ឌិត ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ជួបជាមួយលោក STEPHEN MORGAN រដ្ឋមន្ត្រីអប់រំកុមារតូចនៃចក្រភពអង់គ្លេស នៅប្រទេសចិន ក្នុងឱកាសចូលរួមសន្និសីទអប់រំឌីជីថលពិភពលោកឆ្នាំ២០២៥-2025 World Digital Education Conference”។ ជំនួបនេះ កម្ពុជា និងអង់គ្លេស បានពិភាក្សា ពង្រឹងកិច្ចសហប្រតិបត្តិការលើវិស័យអប់រំ ចំនួន៤ចំណុច ដើម្បីភាពល្អប្រសើរវិស័យអប់រំប្រទេសទាំង២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងអប់រំ បានឱ្យដឹងថា កិច្ចសហប្រតិបត្តិការទាំង៤ចំណុច មានដូចជា ទី១ ការអប់រំឧត្តមសិក្សា និងការបណ្តុះបណ្តាលជំនាញ រួមមានការផ្តល់អាហារូបករណ៍ ការបង្កើតបរិយាកាសគាំទ្រដល់និស្សិតកម្ពុជាទៅសិក្សានៅប្រទេសអង់គ្លេស។ បន្ថែមពីនេះ ក៏មានកម្មវិធីផ្លាស់ប្តូរសាស្រ្តាចារ្យ និងនិស្សិតរវាងប្រទេសទាំង២ និងការបើកសាកលវិទ្យាល័យអង់គ្លេសនៅកម្ពុជា ផងដែរ។ ចំណុចទី២ ពង្រឹងការអប់រំចំណេះទូទៅ ដោយផ្តោតលើការជំរុញការអនុវត្តកម្មវិធីសិក្សាអង់គ្លេស ដូចជាកម្មវិធី Cambridge នៅក្នុងកម្មវិធីសិក្សាចំណេះទូទៅកម្ពុជា, ការបើកសាលារៀនចំណេះដឹងទូទៅ និងការវិនិយោគលើវិស័យអប់រំ។

ទី៣ ការប្រើប្រាស់ AI និងបច្ចេកវិទ្យាឌីជីថល ក្នុងការរៀន និងការបង្រៀន ផ្តោតលើការអភិវឌ្ឍសមត្ថភាពគ្រូបង្រៀន និងសិស្សក្នុងការប្រើប្រាស់AI ក្នុងបរិបទយុគសម័យវ័យឆ្លាត និងការអភិវឌ្ឍប្រកបដោយចីរភាព។ ចំណែកទី៤ គឺការផ្លាស់ប្តូរចំណេះដឹង បទពិសោធ និងឧត្តមានុវត្តន៍ រវាងអ្នកធ្វើសេចក្តីសម្រេចគោលនយោបាយអប់រំ រវាងប្រទេសទាំងពីរ៕