ថៃ ព្រមានពីការឆ្លងជំងឺមួយប្រភេទទៀត

ក្រសួងសុខាភិបាលសាធារណៈ នៃប្រទេសថៃ បានចេញការព្រមានឲ្យពលរដ្ឋខ្លួនមានការប្រុងប្រយ័ត្នចំពោះជំងឺមួយប្រភេទទៀត ដែលនោះគឺជាជំងឺផ្លូវដង្ហើមមជ្ឈិមបូព៌ា (Mers)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Bangkok Post កាលពីថ្ងៃអាទិត្យទី១៨ខែឧសភាឆ្នាំ២០២៥ ការព្រមាននេះគឺផ្តោតជាពិសេសលើជនជាតិថៃ ដែលធ្វើដំណើរទៅកាន់ប្រទេសអារ៉ាប៊ីសាអូឌីត ដើម្បីចូលរួមធម្មយាត្រា Hajj ព្រោះថា ទីនោះកំពុងផ្ទុះជំងឺនេះខ្លាំង ថែមទាំងមានករណីស្លាប់ខ្លះៗរួចមកហើយដែរ។

លេខាធិការអចិន្ត្រៃយ៍នៃក្រសួងសុខាភិបាលសាធារណៈ វេជ្ជបណ្ឌិត Opas Karnkawinpong និយា​យថា Mers គឺជាជំងឺឆ្លងពីសត្វអូដ្ឋ ដែលវាយលុកខ្លាំងទៅលើប្រព័ន្ធដង្ហើមនិងរំលាយអាហាររបស់មនុស្ស។ រោគសញ្ញាមានដូចជាគ្រុនក្តៅ ក្អក និងដកដង្ហើមខ្លី។ ករណី​ធ្ងន់ធ្ងរ​អាច​នាំឲ្យកើត​ជំងឺ​រលាក​សួត ខ្សោយ​តម្រងនោម និង​អាច​ស្លាប់​បាន ជាពិសេស​ក្នុង​ចំណោម​បុគ្គល​ដែល​មាន​ជំងឺ​រ៉ាំរ៉ៃ។

ទោះបីជាយ៉ាងណាក៏ដោយ គេនៅតែមិនទាន់អាចកំណត់ច្បាស់ថាតើជំងឺនេះឆ្លងមកមនុស្សតាមរបៀបណា គ្រាន់តែគេសន្និដ្ឋានថា Mers អាចឆ្លងតាមរយៈការផឹកទឹកដោះអូដ្ឋដែលមានមេរោគ ឬការទទួលទានសាច់អូដ្ឋដែលចម្អិនមិនបានឆ្អិនល្អ។

ជាវិធានការបង្ការ ថៃបានណែនាំឲ្យពលរដ្ឋខ្លួន ចៀសឆ្ងាយពីសត្វអូដ្ឋនិងកុំចូលមន្ទីរពេទ្យនៅតំបន់ណាដែលផ្ទុះមេរោគ ព្រមទាំងនៅឆ្ងាយពីអ្នកឈឺនិងត្រូវលាងដៃ ឲ្យបានញឹកញាប់។​ ពេលវិលមកប្រទេសវិញ អាជ្ញាធរនឹងត្រូវពិនិត្យតាមដាន អ្នកធ្វើធម្មយាត្រារយៈពេល១៤ថ្ងៃ។

ការព្រមាននេះកើតឡើងស្របពេលស្ថានការណ៍ជំងឺកូវីដ១៩នៅប្រទេសថៃក៏កំពុងស្ថិតក្នុងក្តីព្រួយបារម្ភផងដែរ ពោលគឺមានករណីឆ្លងមនុស្សសរុប ៧១ ០៦៧ នាក់ និងមានអ្នកស្លាប់១៩​នាក់ ចន្លោះថ្ងៃទី​១​ខែមករាដល់ថ្ងៃទី​១៤​ខែឧសភាឆ្នាំ២០២៥។

យោងតាម​របាយការណ៍​មជ្ឈមណ្ឌលព័ត៌មានកូវីដ​១៩​របស់រាជរដ្ឋាភិបាលថៃ ករណីឆ្លងកូវីដ​១៩បានកើនឡើងខ្លាំង ជា​ពិសេស​បន្ទាប់ពី​ចប់ពិធី​​​បុណ្យសង្ក្រាន្ត​ ដោយ​ក្នុងអំឡុងពេលនោះ ចំនួនករណីឆ្លងបានកើនឡើងជាលំដាប់ ភាគ​ច្រើន​ជា​ប្រភេទ Omicron XEC ថ្មីដែលឆ្លងលឿនជាងមុន៕

អត្ថបទ៖ សុខ សុវណ្ណ

ចុចអាន៖ ស្លាប់​១៩នាក់ និង​ឆ្លងជាង​ ៧ម៉ឺន​​នាក់​នៅ​ថៃ ព្រោះ​រលកថ្មី​នៃ​ជំងឺ​កូវីដ​១៩