ព័ត៌មានអន្ដរជាតិ

អ៊ីស្រាអែលស្នើបទឈប់បាញ់ហ្គាហ្សា៦០ថ្ងៃ ជាថ្នូរនឹងការដោះលែងចំណាប់ខ្មាំងពាក់កណ្តាល

បានផុស

២ ថ្ងៃ មុន

នៅ

ថ្ងៃចន្ទ ១៩ ឧសភា ២០២៥

ដោយ

Chheang

អ៊ីស្រាអែល បានស្នើបទឈប់បាញ់រយៈពេល៦០ថ្ងៃនៅតំបន់ហ្គាហ្សាស្ទ្រីប ជាថ្នូរនឹងការដោះលែងចំណាប់ខ្មាំងអ៊ីស្រាអែលដែលនៅរស់ប្រហែលពាក់កណ្តាលដែលត្រូវបានចាប់ខ្លួនដោយក្រុមហាម៉ាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មានអ៊ីស្រាអែល KAN កាលពីថ្ងៃអាទិត្យទី១៨ខែឧសភា សំណើនេះត្រូវបានលើកឡើងក្នុងអំឡុងពេលការចរចានៅទីក្រុងដូហានៃប្រទេសកាតា ពាក់ព័ន្ធនឹងការដោះលែងចំណាប់ខ្មាំង១០នាក់ស្មើនឹងប្រហែលពាក់កណ្តាលនៃចំណាប់ខ្មាំងជនជាតិអ៊ីស្រាអែលចំនួន២០នាក់ដែលត្រូវគេប៉ាន់ស្មានថានៅមានជីវិតក្នុងតំបន់ហ្គាហ្សា។ ជាការដោះដូរ អ៊ីស្រាអែលនឹងយល់ព្រមលើបទឈប់បាញ់រយៈពេល៦០ថ្ងៃ និងដោះលែងអ្នកទោសប៉ាឡេស្ទីនមួយចំនួនធំ រួមទាំងអ្នកដែលត្រូវកាត់ទោសអស់មួយជីវិតផងដែរ។

កិច្ចព្រមព្រៀងនេះ ក៏រួមបញ្ចូលការពិភាក្សាអំពីអនាគតនៃជម្លោះ រួមទាំងការរំសាយអាវុធរបស់ក្រុមតស៊ូប៉ាឡេស្ទីន និងការបណ្តេញមេដឹកនាំរបស់ពួកគេ ដែលទាំងនេះសុទ្ធតែជាលក្ខខណ្ឌអ៊ីស្រាអែលបានសង្កត់ធ្ងន់ជាប់លាប់ តែត្រូវក្រុមហាម៉ាសបដិសេធ ដោយនិយាយថា ខ្លួននឹងមិនបោះបង់ចោលការតស៊ូប្រដាប់អាវុធនោះទេ ដរាបណាអ៊ីស្រាអែលនៅតែបន្តកាន់កាប់ទឹកដីប៉ាឡេស្ទីន។

ក្រុមហាម៉ាស មិនបានឆ្លើយតបជាផ្លូវការចំពោះសំណើនេះឡើយ។ ទោះបីជាយ៉ាងណាក៏ដោយ របាយការណ៍ថ្មីៗនេះបង្ហាញថា ក្រុមហាម៉ាសក៏មានបំណងស្នើបទឈប់បាញ់៦០ថ្ងៃ និងការដោះលែងអ្នកទោសប៉ាឡេស្ទីនពីភាគីអ៊ីស្រាអែលផងដែរ ដោយខ្លួននឹងដោះលែងចំណាប់ខ្មាំងចំនួន៩នាក់។

បេសកជនពិសេសអាមេរិក លោក Steve Witkoff ដែលចូលរួមយ៉ាងសកម្មក្នុងការចរចា បានជំរុញឲ្យភាគីទាំងពីរទទួលយកសំណើដែលបានធ្វើបច្ចុប្បន្នភាពនេះ ហើយសង្ឃឹមថា កិច្ចព្រមព្រៀងមួយនេះអាចត្រួសត្រាយផ្លូវសម្រាប់ដំណោះស្រាយពេញលេញចំពោះជម្លោះនៅហ្គាហ្សា៕

ដោយ៖ ឈាង