ណាសា ព្រមានពីព្យុះព្រះអាទិត្យ ដែលនឹងជះឥទ្ធិពលមកផែនដី ប៉ុន្មានថ្ងៃទៀត

ជាមួយនឹងការសង្កេតឃើញព្រះអាទិត្យកំពុងបញ្ចេញសកម្មភាពខុសប្រក្រតី ក្រោយការផ្ទុះដ៏ធំកាលពីសប្តាហ៍មុន ដែលបញ្ចេញកម្តៅខុសប្លែកពីធម្មតានោះ ពេលនេះអង្គការណាសា បានព្រមានជាថ្មីថា ព្រះអាទិត្យនឹងបញ្ចេញព្យុះមួយទៀត បោះពួយមកផែនដីនៅប៉ុន្មានថ្ងៃខាងមុខ ដែលអាចបណ្តាលឲ្យរំខានឬកាត់ផ្តាច់ដល់ប្រព័ន្ធទំនាក់ទំនង នាវាចរណ៍ និងបណ្តាញថាមពលនៅជុំវិញពិភពលោកតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ណាសាបានចេញការព្រមាននេះ បន្ទាប់ពីសង្កេតឃើញព្រះអាទិត្យមានលេចចេញនូវតំបន់ខ្មៅ ដែលជាធម្មតាតំបន់បែបនេះគឺជាកន្លែងប្រមូលផ្តុំកម្លាំងមុនពេលបញ្ចេញជាព្យុះកម្តៅម៉ាញ៉េទិច ជះឥទ្ធិពលមកលើផែនដី បង្កផលប៉ះពាល់ចាប់ពីច្រើននាទីរហូតដល់ទៅរាប់ម៉ោងឯណោះ។

កាលពីសប្តាហ៍មុន ព្រះអាទិត្យបានលេចចេញចំណុចខ្មៅជាមួយការផ្ទុះអណ្តាតភ្លើងដែលគេហៅថា X2.7 ក្នុងកម្រិតខ្ពស់រួចទៅហើយ ដោយកាលនោះវាបានជះឥទ្ធិពលដល់តំបន់នានាចាប់ពីអឺរ៉ុប អាស៊ី និងមជ្ឈិមបូព៌ា ព្រមទាំងភាគខាងកើតសហរដ្ឋអាមេរិក ផងដែរ។

យ៉ាងណា សកម្មភាពរបស់ព្រះអាទិត្យមិនថមថយឡើយ ដោយវានៅតែកញ្ជ្រោលខ្លាំង ដូច្នេះទើបអង្គការណាសា ព្រមានឲ្យមានការប្រុងប្រយ័ត្ន ទោះមិនបញ្ជាក់ពេលវេលាច្បាស់លាស់ក៏ដោយ។

ទន្ទឹមនឹងការវាយប្រហារនេះ ព្យុះអាទិត្យក៏នឹងបង្កើតឲ្យមានបាតុភូតពន្លឺពណ៌បៃតង «Northern Lights» នៅរដ្ឋមួយចំនួនរបស់អាមេរិកផងដែរ ដូចជា Alaska, Washington, Idaho, Montana, North Dakota, South Dakota, Minnesota, Michigan, Wisconsin, Maine និង New York។ 

សូមជម្រាបថា រាល់ឆ្នាំ ព្យុះកម្តៅតែងវាយប្រហារភពផែនដីជានិច្ច ជាពិសេសនៅខែមេសាដល់ខែឧសភា ជាពេលវដ្តព្រះអាទិត្យ ឈានដល់ចំណុចកំពូល។

ឥទ្ធិភពរបស់វាតែងរំខានដល់ប្រព័ន្ធទំនាក់ទំនង ក៏ដូចជា GPS ហើយក៏បណ្តាលឲ្យសីតុណ្ហភាពភពផែនដី ហក់ឡើងខ្ពស់ផងដែរ៕

អត្ថបទ៖ សុខ សុវណ្ណ

ចុចអាន៖ ព្យុះព្រះអាទិត្យជះឥទ្ធិពលមកផែនដី, ទ្វីបអាហ្វ្រិក រងគ្រោះខ្លាំងជាងគេ