ប៉ូលិសវៀតណាម ស៊ើបអង្កេត DJ មួយរូប ក្រោយផ្សាយផលិតផលសម្រកទម្ងន់បំភ្លើសការពិត

លោក Chu Quoc Thinh អនុប្រធាននាយកដ្ឋានសុវត្ថិភាពចំណីអាហារ (ក្រសួងសុខាភិបាល) កាលពីនៅថ្ងៃទី ២៣ ខែឧសភាបាននិយាយថា អង្គភាពនេះកំពុងពិនិត្យមើលខ្លឹមសារផ្សាយពាណិជ្ជកម្មខុសច្បាប់ដែលសង្ស័យថា DJ Ngan 98 (ឈ្មោះពិត Vo Thi Ngoc Ngan) បានពេលណែនាំផលិតផលសម្រកទម្ងន់បភ្លើសពីការពិត។

យោងតាមកាសែត Laborer បានដកស្រង់សម្ដីអនុប្រធាននាយកដ្ឋានសុវត្ថិភាពចំណីអាហាថា ផលិតផលខាងលើត្រូវបានប្រកាសតាមបទប្បញ្ញត្តិ ប៉ុន្តែខ្លឹមសារផ្សាយពាណិជ្ជកម្មកំពុងត្រូវបានត្រួតពិនិត្យឡើងវិញ ដោយសារមានការសង្ស័យថាប្រើប្រាស់លើសពីការអនុញ្ញាត។ ប្រសិនបើមានការបំពានណាមួយត្រូវបានរកឃើញ អង្គភាពនឹងដោះស្រាយយ៉ាងតឹងរ៉ឹង។

អ្នកតំណាងនៃនាយកដ្ឋានសុវត្ថិភាពចំណីអាហារក៏បាននិយាយផងដែរថា យោងតាមបទប្បញ្ញត្តិ អាហារការពារសុខភាពត្រូវតែមានខ្លឹមសារផ្សាយពាណិជ្ជកម្មរបស់ពួកគេត្រូវបានបញ្ជាក់មុនពេលចេញផ្សាយ។ ទោះជាយ៉ាងណាក៏ដោយ ថ្មីៗនេះ បុគ្គលជាច្រើនបានបំពានច្បាប់ដោយការផ្សព្វផ្សាយផលិតផលដែលមិនបានផ្សព្វផ្សាយ ឬបង្ហោះខ្លឹមសារដែលមិនមានការយល់ព្រមតាមអំពើចិត្ត ថែមទាំងផ្តល់ការអះអាងមិនពិតទៀតផង។

នាយកដ្ឋានសុវត្ថិភាពចំណីអាហារនឹងបន្តត្រួតពិនិត្យវេទិកាប្រព័ន្ធផ្សព្វផ្សាយសង្គម និងដោះស្រាយការផ្សាយពាណិជ្ជកម្មមិនពិតភ្លាមៗដើម្បីការពារអ្នកប្រើប្រាស់។

ដោយឡែក យោងតាមសារព័ត៌មាន ​​VTC News ផលិតផលសម្រកទម្ងន់សំខាន់ៗចំនួន ៣ ដែលណែនាំដោយ DJ Ngan 98 គឺមានដូចជា៖ Super Detox X3, X7 Plus និង X1000 ។ ផលិតផលទាំងនេះត្រូវបានលក់នៅលើវេទិកាបណ្តាញទំនាក់ទំនងសង្គម និងវេទិកាពាណិជ្ជកម្មអេឡិចត្រូនិកជាច្រើន ជាមួយនឹងតម្លៃចាប់ពីជាច្រើនរយពាន់ទៅជិតមួយលានដុងក្នុងមួយប្រអប់។ នៅក្នុងវីដេអូផ្សព្វផ្សាយជាច្រើន ឌីជេរវ័យ២៧ឆ្នាំ បានអះអាងថា នាងបានប្រើផលិតផលនេះរយៈពេល ៦ ខែ ហើយធានាថាមិនមានផលប៉ះពាល់ ឬឡើងទម្ងន់ឡើយ។

ជាពិសេស ផលិតផលទាំងនេះជួយឲ្យអ្នកប្រើប្រាស់ស្រកទម្ងន់បានយ៉ាងឆាប់រហ័ស ដោយមិនចាំបាច់តមអាហារ ឬហាត់ប្រាណសូម្បីតែអ្នកអាចស្រកទម្ងន់បាននៅពេលដេកបន្ទាប់ពីញ៉ាំឬអាចស្រកទម្ងន់បានសូម្បីតែពេលកំពុងគេង។ វេទិកាកម្សាន្ត និងអ្នកប្រើប្រាស់ជាច្រើនបានរិះគន់ការផ្សាយពាណិជ្ជកម្មនេះថាបំផ្លើសក្នុងនាមជាបុគ្គលមានឥទ្ធិពលនិងជាការបំភាន់យ៉ាងច្បាស់។ ឧប្បត្តិហេតុនេះកាន់តែមានភាពចម្រូងចម្រាសនៅពេលដែលវីដេអូលាតត្រដាងអំពីស្ត្រីម្នាក់ឈ្មោះ H. បានបង្ហាញខ្លួនដោយចោទប្រកាន់ផលិតផលសម្រកទម្ងន់ Ngan 98 ថា មានផ្ទុកសារធាតុហាមឃាត់ Sibutramine ។

Sibutramine គឺជាសារធាតុដែលធ្លាប់ប្រើក្នុងថ្នាំព្យាបាលជំងឺធាត់ ប៉ុន្តែត្រូវបានហាមប្រាមក្នុងប្រទេសជាច្រើន រួមទាំងប្រទេសវៀតណាមផងដែរ ដោយសារតែហានិភ័យនៃសម្ពាធឈាមឡើងខ្ពស់ រំខានដល់ចង្វាក់បេះដូង ដាច់សរសៃឈាមខួរក្បាល និងរហូតដល់ស្លាប់។

ស្រ្តីឈ្មោះ H. បាននិយាយថា គាត់បានទិញទំនិញហើយនាំផលិតផលមកធ្វើតេស្ត។ ប៉ុន្តែក្រោយមក Ngan 98 បានបដិសេធភ្លាមៗ ដោយអះអាងថា H. មានចេតនាដាក់រូបនាងសម្រាប់ការទិញផលិតផលពីប្រភពផ្សេង ហើយបានបង្ហាញថា H. គឺជាបុគ្គលិករបស់អ្នកជំនួញគ្រឿងសំអាងនៅ Can Tho ដែលជាគូប្រជែងរបស់នាង។

ក្រោយមក DJ Ngan 98 ថែម​ទាំង​បាន​ទៅ Can Tho ដើម្បី​តទល់​ផ្ទាល់។ នៅលើទំព័រផ្ទាល់ខ្លួនរបស់នាង នាងបានអះអាងថា ផលិតផលរបស់ខ្លួនមានសុវត្ថិភាព មានសារធាតុផ្សំពីរុក្ខជាតិដូចជា ផ្សិតលីងជឺ ស្លឹកឈូក ផ្លែ Garcinia hawthorn ដើម្បីជួយដុតបំផ្លាញជាតិខ្លាញ់លើស និង កម្ចាត់ជាតិពុល។

ទោះជាយ៉ាងណា ទាក់ទិននឹងឧបទ្ទវហេតុរបស់ឌីជេស្រីរូបនេះ នៅល្ងាចថ្ងៃទី ២២ ខែឧសភា លោកស្រី Pham Khanh Phong Lan ប្រធាននាយកដ្ឋានសុវត្ថិភាពចំណីអាហារនៃទីក្រុងហូជីមិញបញ្ជាក់ថា អធិការនៃនាយកដ្ឋានបានធ្វើការជាមួយ នាង Vo Thi Ngoc Ngan នាព្រឹកថ្ងៃដដែល។ អាជ្ញាធរ​បាន​ទទួល​ឯកសារ​ដែល​នាង​បាន​ផ្តល់​ឲ្យ​ហើយ​នឹង​បន្ត​ផ្ទៀងផ្ទាត់​ករណី​នេ៕

អត្ថបទ៖ សាង ស្រីល័ក្ខ

ចុចអាន៖ការ​លើក​ឡើង​របស់បវរ​កញ្ញា Thuy Tien ៣​ឆ្នាំ​មុន ដូចទស្សន៍ទាយអនាគតខ្លួនឯងយ៉ាងច្បាស់