ស្ថានការណ៍នាពេលនេះនៅ មីយ៉ាន់ម៉ា ចាប់តាំងពីរដ្ឋប្រហារ

នៅប្រទេសមីយ៉ាន់ម៉ាប្រជាជនកំពុងកាន់ទុក្ខ បន្ទាប់ពីថ្ងៃដ៏ថ្លុកឈាមបំផុតរបស់ប្រទេសចាប់តាំងពីការធ្វើរដ្ឋប្រហារយោធាកាលពីខែកុម្ភៈ ខណៈយោធានៅតែបង្កើនការបង្ក្រាបរបស់ខ្លួនទៅលើក្រុមបាតុករ ។

ក្រុមសិទ្ធិមនុស្សក្នុងតំបន់និយាយថា មនុស្ស ១១៤ នាក់ត្រូវបានសម្លាប់កាលពីថ្ងៃសៅរ៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហ្វូងមនុស្សជាច្រើនបានប្រមូលផ្តុំគ្នានៅក្នុងពិធីបុណ្យសពសម្រាប់ក្មេងប្រុសអាយុ ១៣ ឆ្នាំកាលពីថ្ងៃអាទិត្យ ខណៈពួកគេបានគោរពដោយប្រើម្រាមដៃបីដែលជានិមិត្តរូបនៃការតស៊ូនឹងរដ្ឋប្រហារ ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ក្មេងប្រុសនេះកំពុងលេងនៅក្បែរផ្ទះរបស់គេក្នុងទីក្រុងយ៉ាំងហ្គោន នៅពេលដែលត្រូវបានបាញ់ដោយកម្លាំងសន្តិសុខ ។

សមាគមជំនួយសម្រាប់អ្នកទោសនយោបាយ (AAPP) និយាយថា មនុស្សជាង ៤៥០ នាក់ត្រូវបានសម្លាប់នៅក្នុងអំពើហិង្សា ចាប់តាំងពីយោធាបានកាន់កាប់ប្រទេស ។

ទន្ទឹមនោះអង្គការជនជាតិមួយនៅភាគអាគ្នេយ៍នៃរដ្ឋ Karen និយាយថា ប្រជាជនជាង ៣,០០០ នាក់បានចាប់ផ្តើមភៀសខ្លួនទៅកាន់ប្រទេសជិតខាងថៃដោយសារតែការវាយប្រហារតាមអាកាសពីយោធា ។

ទូរទស្សន៍រដ្ឋបានរាយការណ៍កាលពីយប់ថ្ងៃអាទិត្យថា កងកម្លាំងជីវពលបានវាយប្រហារទៅលើប៉ុស្តិ៍យោធាមួយកាលពីថ្ងៃសៅរ៍ ។ វាត្រូវបានគេមើលឃើញថាជាការវាយប្រហារដែលត្រូវបានអនុវត្តដោយក្រុមប្រដាប់អាវុធជនជាតិភាគតិច Karen ។

ទីប្រឹក្សាពិសេសរបស់អង្គការសហប្រជាជាតិ (UN) ស្តីពីការទប់ស្កាត់អំពើប្រល័យពូជសាសន៍ និងប្រធានសិទ្ធិមនុស្សរបស់ UN បាននិយាយថា សហគមន៍អន្តរជាតិមានការទទួលខុសត្រូវក្នុងការការពារប្រជាជនមីយ៉ាន់ម៉ា ។ ពួកគេបានថ្កោលទោសចំពោះសកម្មភាពរបស់កងកម្លាំងសន្តិសុខថាជាមនុស្សកំសាក និងឃោរឃៅ ។

ស្របពេលជាមួយគ្នានេះរដ្ឋាភិបាលសហរដ្ឋអាមេរិកកំពុងធ្វើការលើផែនការដើម្បីដាក់ទណ្ឌកម្មបន្ថែមលើប្រទេសមីយ៉ាន់ម៉ា ។ ប្រធានាធិបតីអាមេរិក Joe Biden បាននិយាយថា “វាគួរឲ្យខ្លាចណាស់ វាពិតជាគួរឲ្យស្អប់ខ្ពើមណាស់” ។

បន្ថែមពីនេះប្រមុខការពារជាតិមកពី ១២ ប្រទេសរួមទាំងសហរដ្ឋអាមេរិក អង់គ្លេស និងជប៉ុនបាននិយាយនៅក្នុងសេចក្តីថ្លែងការណ៍រួមថា “យោធាអាជីពមានតួនាទីទទួលខុសត្រូវចំពោះការការពារ មិនបង្កអន្តរាយដល់ប្រជាជនដែលខ្លួនបម្រើឡើយ” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ វីដេអូខ្លោចចិត្ត! ក្មេងប្រុសមីយ៉ាន់ម៉ា ទ្រហោយំលើមឈូសមិត្តសំឡាញ់ ដែលត្រូវកងទ័ពបាញ់ស្លាប់ពេលលេងជាមួយគ្នាក្រៅផ្ទះ

ចុចអាន ៖ ភាគ​ច្រើន​ក្មេងកំពុងលេង​មុខផ្ទះ​ត្រូវបានសម្លាប់នៅមីយ៉ាន់ម៉ា​ក្នុង​ថ្ងៃ​ថ្លុក​ឈាមបំផុត