ព័ត៌មានអន្ដរជាតិ

ថៃចាប់ជនបរទេស១៣នាក់ ពីបទរត់ការឆបោក សំដៅលើជនជាតិអូស្ត្រាលី

បានផុស

១ year មុន

នៅ

ថ្ងៃពុធ ១៨ មិថុនា ២០២៥

ដោយ

ប៉ូលិសថៃដោយមានការសម្របសម្រួលជាមួយប៉ូលិសសហព័ន្ធអូស្ត្រាលី បានចាប់ខ្លួនជនបរទេសចំនួន១៣ នាក់នៅក្នុង ខេត្ត Samut Prakan ប្រទេសថៃ ដោយចោទប្រកាន់ថា បានធ្វើប្រតិបត្តិការឆបោកតាមមជ្ឈមណ្ឌលហៅទូរស័ព្ទដែលបានបោកប្រាស់ជនជាតិអូស្ត្រាលីចំនួន ១៤០០០នាក់ ដែលមានទឹកប្រាក់ប្រមាណជាង ១លានដុល្លារ (៤០ លានបាត) តាមរយៈការវិនិយោគកម្ចីក្លែងក្លាយ។ នេះបើយោងតាមការចេញផ្សាយរបស់សារព័ត៌មាន The Nation កាលពីថ្ងៃទី១៧ខែមិថុនា។

ជនសង្ស័យដែលត្រូវបានចាប់ខ្លួន (រូបភាព៖ The Nation)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យរួមមានជនជាតិអូស្ត្រាលី៥នាក់ អង់គ្លេស៦នាក់ កាណាដាម្នាក់ និងអាហ្វ្រិកខាងត្បូងម្នាក់។ ពួកគេត្រូវបានចាប់ខ្លួននៅផ្ទះជួលដ៏ប្រណីតមួយដែលបានបំប្លែងទៅជាការិយាល័យក្លែងក្លាយ។

អាជ្ញាធរថៃបានរឹបអូសកុំព្យូទ័រ ទូរស័ព្ទ និងស្គ្រីបដែលប្រើដើម្បីបញ្ឆោតជនរងគ្រោះ។ ជនសង្ស័យទាំងនេះបានចូលប្រទេស ថៃតាមទិដ្ឋាការទេសចរណ៍ ហើយប្រឈមនឹងការចោទប្រកាន់ពីបទឆបោកនិងធ្វើការដោយគ្មានការអនុញ្ញាត។ ទិដ្ឋាការរបស់ពួកគេនឹងត្រូវបានដកហូត ហើយឈ្មោះពួកគេនឹងត្រូវដាក់ក្នុងបញ្ជីខ្មៅ។

មេក្រុមពីរនាក់ជាជនជាតិអូស្ត្រាលីម្នាក់ និងអង់គ្លេសម្នាក់ស្ថិតក្នុងចំណោមអ្នកដែលត្រូវចាប់ខ្លួន។ ប៉ូលិសជឿថាការបោកប្រាស់នេះបានដំណើរការជាអន្តរជាតិអស់រយៈពេលពីរទសវត្សរ៍មកហើយ ហើយត្រូវបានបង្កើតឡើងវិញនៅក្នុងប្រទេស ថៃកាលពីឆ្នាំមុន បន្ទាប់ពីបានបិទនៅក្នុងប្រទេសឥណ្ឌូនេស៊ី។ មន្ត្រីអូស្ត្រាលីបានបញ្ជាក់ថា ការបោកប្រាស់បានបង្កការខូចខាតផ្នែកហិរញ្ញវត្ថុយ៉ាងធ្ងន់ធ្ងរ ជាពិសេសក្នុងរយៈពេល ៤ឆ្នាំចុងក្រោយនេះ៕