អភិបាលខេត្តបាត់ដំបង ណែនាំអាជ្ញាធរភូមិ ឃុំ បន្តដាំដើមឈើតាមដងផ្លូវ

អភិបាលខេត្តបាត់ដំបង លោក សុខ លូ បានណែនាំដល់អាជ្ញាធរភូមិ ឃុំ ស្រុក ត្រូវបន្តដាំដើមឈើតាមដងផ្លូវ ដើម្បីបង្កើនភាពបៃតងនៅតាមមូលដ្ឋានរៀងៗខ្លួន និងជាផ្នែកមួយជួយលើកកម្ពស់សោភ័ណភាពតាមដងផ្លូវ។
ការដាំដើមឈើតាមដងផ្លូវ សាលារៀន មន្ទីរពេទ្យ ទីសាធារណៈនិង វត្តអារាម គឺជាផ្នែកមួយក្នុងការបណ្ដុះគំនិតដល់យុវជន និងប្រជាពលរដ្ឋគ្រប់ស្រទាប់វណ្ណៈ ឱ្យចេះស្រឡាញ់ព្រៃឈើ រួមគ្នាថែរក្សាព្រៃឈើ ដើម្បីជួយកាត់បន្ថយការឡើងកម្ដៅក្នុងសហគមន៍ ក៏ដូចជាការជួយលើកកម្ពស់សោភណភាព ក្នុងភូមិទាំងមូលឱ្យមានភាពបៃតងស្រស់ គ្រប់រដូវកាលថែមទៀតផង។

ការលើកទឹកចិត្តឱ្យដាំដើមឈើនេះ នាឱកាសលោក សុខ​ លូ អញ្ជើញជាគណៈអធិបតីក្នុងពិធីកប្រុងពលីបើកការដ្ឋានស្ថាបនាផ្លូវ និងកីឡដ្ឋានស្រុកបាណន់ នៅថ្ងៃទី ២១​ខែមិថុនា ឆ្នាំ ២០២៥។ ផ្លូវដែលបើកការដ្ឋាននេះស្ថាបនាជាផ្លូវបេតុង១ខ្សែប្រវែង៤៦០ម៉ែត្រ ទទឹង៨ម៉ែត្រ កម្រាស់០,១៥ម៉ែត្រ ផ្លូវថ្មើរជើង២ខ្សែប្រវែង៩២០ម៉ែត្រ ទទឹង២,៣០ម៉ែត្រ ស្ថិតនៅឃុំឈើទាល ស្រុកបាណន់។

មានប្រសាសន៍ក្នុងឱកាសនោះ លោក សុខ លូ បានថ្លែងការកោតសរសើរដល់ការខិតខំអភិវឌ្ឍរបស់មូលដ្ឋានស្រុក មានដូចជាផ្លូវថ្នល់ សាលារៀន មន្ទីរពេទ្យ និងវត្តអារាមជាដើម។ ទន្ទឹមនឹងនេះលោកលើកទឹកចិត្តដល់អាជ្ញាធរភូមិ ឃុំ ស្រុក ត្រូវបន្តដាំដើមឈើតាមដងផ្លូវ ដើម្បីបង្កើនភាពបៃតង និងលើកកម្ពស់សោភ័ណភាពតាមដងផ្លូវ។

លោកបញ្ជាក់ថា ៖«បច្ចុប្បន្នរាជរដ្ឋាភិបាលកម្ពុជាក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី បានខិតខំខ្លាំងណាស់ឱ្យរដ្ឋបាលថ្នាក់ក្រោមជាតិជំរុញការអភិវឌ្ឍន៍នៅតាមមូលដ្ឋាន ជាពិសេសការអភិវឌ្ឍន៍ ផ្លូវថ្នល់ សាលារៀន សួនច្បារ និងការរៀបចំសណ្តាប់ធ្នាប់សាធារណៈសំដៅបម្រើផលប្រយោជន៍សាធារណៈជូនបងប្អូនប្រជាពលរដ្ឋ»។ ក្រៅពីនេះ លោកអភិបាលខេត្តស្នើដល់បងប្អូនប្រជាពលរដ្ឋចូលរួមផ្សព្វផ្សាយ និងចៀសឆ្ងាយពីគ្រឿងញៀន និងត្រូវចូលរួមថែរក្សាអនាម័យបរិស្ថាន ក្នុងភូមិ ឃុំ តាមលំនៅដ្ឋានឱ្យបានល្អប្រសើរ។

ឆ្លៀតក្នុងឱកាសនោះ លោក សុខ លូ បានផ្សព្វផ្សាយស្តីពីសុវត្ថិភាពចរាចរណ៍ផ្លូវគោក ជូនដល់បងប្អូនប្រជាពលរដ្ឋ ក្នុងគោលបំណងលើកកម្ពស់ការយល់ដឹងអំពីសុវត្ថិភាពចរាចរណ៍ដើម្បីចូលរួម ទប់ស្កាត់ ក៏ដូចជាកាត់បន្ថយចំនួនអ្នកស្លាប់ និងរបួសដោយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប ដោយបើកបរបង្កើនការប្រុងប្រយ័ត្ន រក្សាសណ្តាប់ធ្នាប់ និងមានការយោគយល់អធ្យាស្រ័យគ្នាទៅវិញទៅមក៕