លោក ខូវ ឆាយ ទទួលស្គាល់១សប្តាហ៍ជាង ១០០ ប្រកួត តែងមានកំហុសខ្លះពីមន្ត្រី​ដាក់​ពិន្ទុ

លោក ខូវ ឆាយ ប្រធានសហព័ន្ធប្រដាល់គុនខ្មែរ បានទទួលស្គាល់អំពីកំហុសឆ្គងមួយចំនួនរបស់មន្ត្រីក្រោមបង្គាប់របស់លោកដោយជៀសមិនផុត ដោយសារ​ការ​ប្រកួត​មាន​ច្រើន​ជា​រៀង​រាល់​សប្តាហ៍។

ការទទួលស្គាល់បែបនេះ បន្ទាប់ពីការប្រកួតប្រដាល់គុនខ្មែរ នាមួយរយៈចុងក្រោយ តែងមានភាពចម្រូងចម្រាស់លើការដាក់ពិន្ទុ​របស់​ចៅក្រម និង​ស្នងការ​ប្រកួត​លើ​ កីឡាករ ដែលជាហេតុធ្វើឱ្យមានការរិះគន់មហាជន។ ជាពិសេស ការប្រកួតដែលធ្វើឱ្យមហាជនចាប់អារម្មណ៍ខ្លាំងបំផុត គឺការប្រកួត​​ដែល​កីឡាករ​ រិទ្ធី សូសែង ​បាន​ឈ្នះ​កីឡាករ​ ថងបាង កាលថ្ងៃទី ២៤ ខែ ឧសភា ឆ្នាំ ២០២៥, ពេជ្រ អទិទេព ឈ្នះ វ៉ាន់ វឿន កាលពីថ្ងៃទី ១៤ ខែ មិថុនា និងថ្មីៗនេះ សែន ច័ន្ទឬទ្ធីសក្តិ បាន​ចាញ់ ប៉ែនកាក់ រាជសីហ៍។

ជុំវិញភាពចម្រូងចម្រាស់នៃការដាក់ពិន្ទុមួយរយៈចុងក្រោយ មិន​ត្រឹម​តែ​ជាកង្វល់សម្រាប់អ្នកគាំទ្រទូទៅ​ប៉ុណ្ណោះ​ទេ សូម្បី​​លោក​ឧត្តម​សេនីយ៍ឯក​ ជួន ណារិន្ទ ស្នងការរាជ​ធានី​ភ្នំពេញ ក៏ចាប់អារម្មណ៍លើរឿងនេះដែរ។ លោក​បាន​បង្ហោះសារនៅលើបណ្តាញសង្គម ដោយទទូចស្នើសុំឱ្យអាជ្ញាកណ្តាល ចៅក្រម និងមន្ត្រីដឹកនាំការប្រកួត​ប្រកាន់​ភ្ជាប់​នូវ​គោលការណ៍​យុត្តិធម៌ បច្ចេកទេស និង​សុជីធម៌​ ចំព៉​ការប្រកួតដ៏ធំរវាង ពេជ្រ សម្បត្តិ និង សុខ ធី នៅថ្ងៃទី ២៨ ខែ មិថុនា ខាងមុខ។

លោក ជួន ណារិន្ទ បានបង្ហោះសារនៅលើបណ្តាញសង្គមយ៉ាងដូច្នេះថា៖ «ខ្ញុំអ្នកគាំទ្រគុនខ្មែរម្នាក់​ប៉ុន្មានថ្ងៃនេះសង្គេតឃើញតាមបណ្ដាញសង្គមបង្ហោះវាយប្រហារគ្នាច្រើនរឿងការកាត់ក្ដីដែលមិនគួរឱ្យកើតមានឡើង។ ខ្ញុំសង្ឃឹមថាការប្រកួតរវាង ប្អូន សុខ ធី និង ប្អូន ពេជ្រ សម្បត្តិ ថ្ងៃខាងមុខប្រកួតប្រកបដោយបច្ចេកទេស និងយុត្តិធម៌ ក្រមសីលធម៌ វិជ្ជាជីវៈ ដើម្បីបង្ហាញឱ្យពិភពលោកបានស្គាល់ក្បាច់គុនខ្មែរយើង»។

បន្ទាប់ពីឃើញសាររបស់លោក ជួន ណារិន្ទ លោក ខូវ ឆាយ បានចូលទៅបញ្ចេញមតិក្នុងការបង្ហោះនោះ ដោយសរសេរអំពីការទទួលខុសត្រូវយ៉ាងម៉ឺងម៉ាត់ថា៖ «ខ្ញុំបាទទទួលស្គាល់ថា ការដឹកនាំការប្រកួតដែលមានជាង១០០ប្រកួតក្នុង​១សប្តាហ៍ តែងតែមានករណីកំហុសកើតឡើងដោយមន្ត្រីដឹកនាំប្រកួតមួយចំនួនដោយជៀសមិនផុត។ យ៉ាងណាសហព័ន្ធក៏មានវិធានការ និងយន្តការគ្រប់គ្រង និងត្រួតពិនិត្យកិច្ចការមន្ត្រី អាជ្ញាកណ្ដាល ចៅក្រម យ៉ាងម៉ត់ចត់ និងល្អិតល្អន់ ដើម្បីធានាបាននូវការដោះស្រាយដោយតម្លាភាព និងយុត្តិធម៌ជូនកីឡាករ កីឡាការិនី ស្របទៅតាមបទបញ្ជាប្រកួតរបស់សហព័ន្ធ»។

បន្ថែមពីនេះទៀតលោកខូវ ឆាយ បានបង្ហាញពីការប្តេជ្ញាចិត្តអនុវត្តតួនាទីរបស់ខ្លួនក្នុងសហព័ន្ធគុនខ្មែរយ៉ាងម៉ឺងម៉ាត់ថា៖ «ក្នុងនាមថ្នាក់ដឹកនាំសហព័ន្ធកីឡាប្រដាល់គុខ្មែរ ខ្ញុំបាទសូមទទួលខុសត្រូវយ៉ាងម៉ឺង​ម៉ាត់ លើការអនុវត្តតួនាទីភារកិច្ចរបស់ខ្លួន ចំពោះមុខសម្តេចថ្នាក់ដឹកនាំ ក្រសួងអប់រំ យុវជន និងកីឡា ដែលជាអាណាព្យាបាលសហព័ន្ធ និងថ្នាក់ដឹកនាំគ្រប់កំរិត ព្រមទាំងមហាជនគាំទ្រវិស័យកីឡាប្រដាល់គុនខ្មែរទាំងអស់»។

យ៉ាងណាមិញ បន្ទាប់ពីមានការទទូចស្នើសុំពីឧត្តមសេនីយ៍ឯក ជួន ណារិន្ទ និងការប្តេជ្ញាយ៉ាងម៉ឺងម៉ាត់របស់លោក ខូវ ឆាយ បានធ្វើឱ្យអ្នកគាំទ្រគុនខ្មែរទាំងឡាយហាក់មានការស្ងប់ចិត្ត និងកំពុងរង់ចាំការប្រកួតដ៏ធំរវាង ពេជ្រ សម្បត្តិ និងសុខ ធី នៅថ្ងៃទី ២៨ ខែ មិថុនា យ៉ាងអន្ទះសារ៕

អត្ថបទ៖ កុសល