នយោបាយ

ប្រធានបក្សប្រជាជនណែនាំដល់មន្ត្រីបក្សឱ្យមានភាពស្អាតស្អំ

បានផុស

១ year មុន

នៅ

ថ្ងៃសៅរ៍ ២៨ មិថុនា ២០២៥

ដោយ

ប្រធានគណបក្សប្រជាជនកម្ពុជា សម្ដេចតេជោ ហ៊ុន សែន បានណែនាំដល់មន្ត្រីគណបក្សឱ្យមានភាពរឹងមាំ ស្មោះត្រង់ ស្អាតស្អំ ចំពោះប្រជាជន ហាមដាច់ខាតធ្វើឱ្យប៉ះពាល់ដល់ប្រយោជន៍ប្រជាជន និងតាំងខ្លួនជាចៅហ្វាយនាយរបស់ប្រជាជននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីខួបកំណើតបក្សលើកទី៧៤ ព្រឹកថ្ងៃទី២៨ ខែមិថុនា ឆ្នាំ២០២៥នេះ សម្ដេចតេជោ ហ៊ុន សែន មានប្រសាសន៍ថាជ័យជម្នះរបស់គណបក្សគឺអាស្រ័យលើការគាំទ្ររបស់ប្រជាពលរដ្ឋ ហើយបក្សប្រជាជនត្រូវធានាពីការគាំទ្ររបស់ប្រជាពលរដ្ឋចំពោះខ្លួនបន្តទៀតដោយបន្តបម្រើ ពឹងផ្អែក និងរៀនសូត្រពីប្រជាជន។ សម្ដេចបន្ថែមថាមន្ត្រីគណបក្សត្រូវតែរឹងមាំ និងស្អាតស្អំប្រកបដោយសមភាពគុណធម៌និងសីលធម៌។

សម្ដេចថា៖ «ភាពជាក់ស្ដែងបានបង្ហាញថាប្រជាពលរដ្ឋគាំទ្រតួនាទីដឹកនាំរបស់គណបក្សគាំទ្រគណបក្សប៉ុន្ដែមិនសប្បាយចិត្តឡើយចំពោះទង្វើខុសឆ្គងរបស់មន្ត្រីមួយចំនួនអាស្រ័យហេតុនេះមន្ត្រីគ្រប់រូបត្រូវធ្វើអំពើល្អ មិនធ្វើឱ្យប៉ះពាល់ដល់សិទ្ធិនិងប្រយោជន៍របស់ប្រជាជន មិនត្រូវមានឥរិយាបថជាចៅហ្វាយនាយរបស់ប្រជាជននោះឡើយ»។

ក្នុងឱកាសនៃខួបបង្កើតគណបក្សនេះសម្ដេចតេជោក៏បានថ្លែងបញ្ជាក់ពីប្ដេជ្ញាចិត្តរបស់គណបក្សក្នុងការដឹកនាំរដ្ឋដោយកសាងសេដ្ឋកិច្ច ប្រជាធិបតេយ្យ សមធម៌សង្គម ប្រជាជនមានការងារធ្វើគ្រប់គ្រាន់និងសុខភាពល្អ ចៀសផុតពីភាគក្រីក្រផងដែរ។

គួរឱ្យដឹងផងដែរថាគណបក្សប្រជាជនកម្ពុជាត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ ដើម្បីរំដោះជាតិចេញពីអាណានិគមនិយមបារាំង។ ក្នុងថ្ងៃទី៧ ខែមករា ឆ្នាំ១៩៧៩ គណបក្សនេះបានដឹកនាំវាយផ្ដួលរំលំខ្មែរក្រហមចេញពីអំណាចនឹងបានដឹកនាំកម្ពុជារហូតបច្ចុប្បន្នយ៉ាងរឹងមាំ៕