កីឡា

កីឡាតេក្វាន់ដូ ITF បញ្ចប់ការប្រកួតជើងឯកអាស៊ីអាគ្នេយ៍ជាផ្លូវការ កម្ពុជា លេខ១ ម៉ាឡេស៊ី លេខ២ វៀតណាម លេខ៣

បានផុស

១ ម៉ោង មុន

នៅ

ថ្ងៃអង្គារ ១ កក្កដា ២០២៥

ដោយ

ការប្រកួតជ្រើសរើសជើងឯកអាស៊ីអាគ្នេយ៍ លើកទី២ រយៈពេល ៣ថ្ងៃកន្លងទៅនេះបានបិទបញ្ចប់ជាផ្លូវការហើយកាលពីល្ងាចថ្ងៃទី៣០ ខែមិថុនា ឆ្នាំ២០២៥ ដោយប្រទេសកម្ពុជា ជាប់ចំណាត់ថ្នាក់លេខ១ ចំណែកលេខ២ បានលើប្រទេសម៉ាឡេស៊ី និងលេខ៣ បានលើប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផាន់ វណ្ណរ័ត្ន

លោក ផាន់ វណ្ណរ័ត្ន អនុប្រធានសហព័ន្ធតេក្វាន់ដូ ITF បានឲ្យដឹងថា នេះជាមោទកភាពមួយសម្រាប់ក្រុមតេក្វាន់ដូ ITF កម្ពុជា និងជាមោទកភាពចំពោះកម្ពុជាដែលធ្វើជាម្ចាស់ផ្ទះការប្រកួតជ្រើសរើសជើងឯកអាស៊ី លើកទី២ ទទួលបានជោគជ័យយ៉ាងធំធេង។

ទិដ្ឋភាពបិទការប្រកួត

អនុប្រធានខាងលើបន្ថែមទៀតថា បណ្ដាប្រទេសចូលរួមទាំងអស់មានចិត្តសប្បាយរីករាយ និងពេញចិត្តជាខ្លាំងដែលបានមកចូលរួមការប្រកួតនៅលើកនេះ។ ដោយសារតែម្ចាស់ផ្ទះកម្ពុជាទទួលស្វាគមន៍ភ្ញៀវបានល្អ យកចិត្តទុកដាក់ និងមានជាកម្មវិធីទេសចរណ៍កម្សាន្តផ្សេងៗដូចនេះ។ ក្រៅពីនេះបណ្ដាប្រទេសទាំងនោះសរសើរពីកម្ពុជារៀបចំការប្រកួតបានល្អ និងមានការសហការណ៍គ្នាគ្រប់ជាន់ថ្នាក់។

ទិដ្ឋភាពបិទការប្រកួត

បញ្ជាក់ដែរថា ការប្រកួតតេក្វាន់ដូ ITF ជ្រើសរើសជើងឯកអាស៊ីអាគ្នេយ៍ លើកទី២ ដែលចាប់ផ្ដើមពីថ្ងៃទី២៨ ដល់ ៣០ ខែមិថុនា ឆ្នាំ២០២៥ បានបញ្ចប់ជាផ្លូវការហើយក្រោមអធិបតីភាពលោក ថោង ខុន ប្រធានគណៈកម្មាធិការជាតិអូឡាំពិកកម្ពុជា លោក កែវ រ៉េមី ប្រធានតេក្វាន់ដូ ITF កម្ពុជា និងថ្នាក់ដឹកនាំជាច្រើនរូប។ ចំណាត់ថ្នាក់លេខ១ បានលើកម្ពុជា ឈ្នះមេដាយសរុប ៩០គ្រឿង មាស ៤៨ ប្រាក់ ៣៦ សំរឹទ្ធ៦។ ចំណាត់ថ្នាក់លេខ២ ម៉ាឡេស៊ី ឈ្នះមេដាយសរុប ៥០គ្រឿង មាស ១១ ប្រាក់ ១៧ សំរឺទ្ធ ២២។ ចំណាត់ថ្នាក់លេខ៣ វៀតណាម ឈ្នះមេដាយសរុប ៣២គ្រឿង មាស ២ ប្រាក់ ៥ សំរឹទ្ធ ២៥។ ការប្រកួតនេះមានប្រទេសចូលរួមសរុបទាំងអស់មាន ៦ កម្ពុជា វៀតណាម ម៉ាឡេស៊ី សិង្ហបុរី ហ្វីលីពីន ឥណ្ឌូណេស៊ី៕