ខាត់ ស្រីច័ន្ទ លើកចំណុចពិសេសរបស់ វត្តី និង កូនអាន ដែលធ្លាប់ធ្វើដើម្បីលើកមុខប្រទេសជាតិ

ដោយមើលឃើញពីការខិតខំប្រឹងប្រែងក្នុងការចូលរួមផ្សព្វផ្សាយលើកស្ទួយវប្បធម៌របស់អ្នកសិល្ប:ខ្មែរ ២ដួង អ្នកគ្រប់គ្រង និងរៀបចំកម្មវិធីប្រកួត Miss Mera Cambodia 2024 កញ្ញា ខាត់ ស្រីច័ន្ទ បានលើកសរសើរនូវចំណុចពិសេសរបស់ពួកគេដែលធ្លាប់ធ្វើកន្លងមក។

អ្នកសិល្ប:ស្រីទាំង ២ដួង ដែលធ្វើឱ្យកញ្ញា ខាត់ ស្រីច័ន្ទ បង្ហាញការកោតសរសើរ និងលើកពីចំណុចពិសេសដែលពួកគេមានរៀងៗខ្លួន នោះគឺកញ្ញា ពេជ្រ វត្តីសារ៉ាវឌ្ឍី និងនាដការីរបាំបុរាណកញ្ញា សុគា គីមលាង ហៅ កូនអាន ដែលបាននិងកំពុងបង្ហាញវត្តមានចូលប្រកួតកម្មវិធីសម្រស់ Miss Universe Cambodia 2025 ។

កញ្ញា ខាត់ ស្រីច័ន្ទ ថា បេក្ខភាពរូបស្រស់ទាំងពីរដួងនេះ សុទ្ធតែធ្លាប់បានលេីកមុខមាត់ កម្ពុជា រួចមកហេីយ ដ្បិតតាមបែបផ្សេងគ្នាក៏ដោយ ដែលសុទ្ធសឹងតែធ្វើឡើងក្នុងគោលបំណងតែមួយ គឺដេីម្បីកម្ពុជា ខណៈរឿងដែលអ្នកទាំងពីរធ្វេីគឺជាលះបង់យ៉ាងធំបំផុតសម្រាប់ប្រទេស ទាំងកម្លាំងកាយចិត្តនិងប្រាក់ផ្ទាល់ខ្លួន។

អតីតអ្នកគ្រប់គ្រង់កម្មវិធីប្រកួតសម្រស់រូបនេះ គូសបញ្ជាក់ថា “សម្រាប់ វត្តី នាងបានទទួលរងខ្យល់បក់បោកយ៉ាងខ្លាំង យ៉ាងណាក៏នៅតែអាចបន្តដំណេីរបានយ៉ាងរលូនដោយមិនរុញរៀនោះទេ”។

ខាត់ ស្រីច័ន្ទ បន្តថា “ទោះជាមានរឿងអ្វីក៏ខ្ញុំនៅចាំពាក្យថា នាងខ្ញុំនឹងធ្វេីឱ្យកម្ពុជាមានតែកិត្តិយស គឺនាងធ្វេីបាន ខ្ញុំមិនបានឃេីញថានាងបានធ្វេីឱ្យប៉ះពាលដល់កិត្តិយសជាតិនោះទេ រឿងខ្លះ យេីងនិយាយបាន ព្រោះយេីងមិនបានជួបដោយផ្ទាល់។ ថ្មីៗ នេះខ្ញុំបានឃេីញថា មានអ្នកប្រមាថមេីលងាយនាងដោយមិនហ៊ានសូម្បីនិយាយដោយផ្ទាល់ជាមួយនាងសោះ គ្រប់យ៉ាងដែលធ្វេីគឺមានហេតុផល សូមគិតដល់ពេលដែលនាងបានលះបង់ផង”។

ខាត់ ស្រីច័ន្ទបាននិយាយទៀតថា បេីសម្រាប់ គីមលាង វិញ គឺខ្លួនហ៊ាននិយាយថា Perfect សម្រាប់គ្រប់យ៉ាង នាងមិនដែលសូម្បីបង្កស្នាមខ្មៅបន្តិចសោះឡេីយ ហេីយនាងរឹងមាំប្រឈមនឹងវិថីដ៏ថ្មីសម្រាប់នាង ក្នុងបំណងដ៏ធំសម្រាប់ជីវិតនាង និងទទួលយកគ្រប់យ៉ាងដែលបាននិយាយនាងជាអប្សរាក្នុងជីវិតពិតហើយ សម្រាប់ខ្ញុំអ្នកទាំងពីរសាកសមឥតខ្ចោះ៕ ចាន់រ៉ា