ព័ត៌មានអន្ដរជាតិ

ប្រទេសក្រិកបិទតំបន់ទេសចរណ៍ល្បីល្បាញ ដោយសារអាកាសធាតុក្តៅខ្លាំងលើស៤០អង្សាសេ

បានផុស

១០ ខែ មុន

នៅ

ថ្ងៃពុធ ៩ កក្កដា ២០២៥

ដោយ

ប្រទេសក្រិកបានបិទ «Acropolis» ដែលជាតំបន់ទេសចរណ៍ប្រវត្តិសាស្ត្រដ៏ល្បីល្បាញ នៅទីក្រុងអាថែននិងផ្អាកការធ្វើការងារក្រៅផ្ទះ ដោយសារមានរលកកម្ដៅខ្លាំងរហូតដល់លើស៤០អង្សាសេ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៩ខែកក្កដានេះ។

ទិដ្ឋភាពAcropolis ត្រូវបានបិទ (រូបភាព៖ AP)

តំបន់ទេសចរណ៍បន្ទាយបុរាណ Acropolis នឹងត្រូវបិទរហូតដល់ម៉ោង ៥ល្ងាច ដើម្បីរក្សាសុវត្ថិភាពភ្ញៀវទេសចរ និងកម្មករពីកម្ដៅដ៏ខ្លាំង ខណៈសីតុណ្ហភាពបែបនេះជារលកកម្ដៅដ៏ធំទីពីរហើយក្នុងប្រទេសក្រិកចាប់តាំងពីចុងខែមិថុនាមក ដោយសីតុណ្ហភាពរំពឹងថានឹងឡើងដល់កំពូលនៅកម្រិត ៤២អង្សាសេនៅតំបន់មួយចំនួន។

ជាមួយគ្នានេះរដ្ឋាភិបាលក្រិកក៏បានអនុវត្តការផ្អាកការងារពីថ្ងៃត្រង់ដល់ម៉ោង៥ល្ងាចក្នុងតំបន់មួយចំនួនផងដែរ ដែលប៉ះពាល់ដល់ការងារក្រៅផ្ទះដូចជាការងារសំណង់ និងការងារដឹកជញ្ជូនអាហារ។ លើសពីនេះគ្រោះថ្នាក់ទាក់ទងនឹងភ្លើងនៅតែមានកម្រិតខ្ពស់ ដោយអាជ្ញាធរបានដោះស្រាយភ្លើងឆេះព្រៃរាប់សិបកន្លែងជារៀងរាល់ថ្ងៃ និងចេញការជូនដំណឹងនៅទូទាំងទីក្រុងអាថែន និងតំបន់ផ្សេងៗទៀត។

ទេសចរដើរកម្សាន្តក្នុងអំឡុងពេលអាកាសធាតុក្ដៅខ្លាំង (រូបភាព៖ AP)

ក្រៅពីក្រិក ប្រទេសផ្សេងៗទៀតក្នុងតំបន់អឺរ៉ុបក៏កំពុងប្រឈមនឹងបញ្ហារលកកម្ដៅខ្លាំងនិងបញ្ហាអាកាសធាតុផ្សេងទៀតផងដែរ ដោយប្រទេសប្រទេសស៊ែប៊ីបានរាយការណ៍ថា មានភ្លើងឆេះព្រៃចំនួន៦២០ទីតាំង ចំពេលមានកម្ដៅនិងខ្យល់បក់ខ្លាំង។

ចំណែកប្រទេសក្រូអាស៊ីវិញ បានប្រឈមនឹងព្យុះបណ្ដាលមនុស្សរងរបួស មានទឹកជំនន់ និងដាច់ចរន្តអគ្គិសនី។ ចំណែកប្រទេសហុងគ្រី និងស្លូវ៉ាគីឯណោះវិញ ខ្យល់ព្យុះកំបុតត្បូងបានបោកបក់បំផ្លាញអគារ ដាច់ខ្សែភ្លើង និងផ្អាកសេវាកម្មដឹកជញ្ជូនផងដែរ៕