ពលរដ្ឋថៃ នៅព្រំដែនសឹងគ្រប់ជ្រុង កំពុងរស់នៅមិនបានសុខ មានតែភាពភ័យខ្លាច

ប្រទេសថៃកំពុងវឹកវរទាំងស្ថានភាពនយោបាយផ្ទៃក្នុងនិងជម្លោះជាមួយអ្នកជិតខាង។ មន្ត្រីធំៗនៅបាងកក កំពុងឈ្លោះគ្នាលើបញ្ហានានានិងរឿងចម្រូងចម្រាស់ជាច្រើន ធ្វើឲ្យប្រទេសញាំញីដោយវិបត្តិ រីឯប្រជាជនក៏រស់នៅមិនបានសុខដែរ ជាពិសេសពលរដ្ឋនៅតាមព្រំដែនតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលថៃមិនព្យាយាមស្វែងរកដំណោះស្រាយដោយសន្តិវិធីឡើយ ហើយខំបង្កើតសត្រូវដោយមិនខ្វល់ពីសុខទុក្ខរបស់ប្រជាជន។ ជាក់ស្តែងពលរដ្ឋនៅតាមព្រំដែនសឹងតែគ្រប់ជ្រុង កំពុងរស់នៅដោយភាពភ័យខ្លាចដូចជានៅជាប់ព្រំដែនកម្ពុជា មីយ៉ាន់ម៉ា ម៉ាឡេស៊ីជាដើម។

នៅព្រំដែនកម្ពុជា

ទង្វើដ៏គឃ្លើននិងការឈ្លានពានរបស់ថៃ ចង់លេបយកទឹកដីកម្ពុជា ធ្វើឲ្យពលរដ្ឋរបស់ខ្លួនរងទុក្ខវេទនា ជាពិសេសតាមរយៈការបិទជាឯកតោភាគីនូវព្រំដែនដែលធ្លាប់តែសុខសាន្ត ធ្វើឲ្យប៉ះពាល់ដល់របរចិញ្ចឹមជីវិតរបស់ប្រជាជនយ៉ាងខ្លាំង ឈានដល់ការធ្វើបាតុកម្មទាមទារឲ្យយោធា បើកព្រំដែនវិញទៀតផង។

លើសពីនេះ ការបង្កើននិងចល័តទ័ពរបស់ថៃ ធ្វើឲ្យអ្នកនៅព្រំដែនរស់នៅទាំងព្រួយចិត្តខ្លាចផ្ទុះអាវុធ ដល់ថ្នាក់អ្នកខ្លះជីកលេណដ្ឋាននិងខ្លះទៀតបានជម្លៀសចេញរួចហើយ។ ម្យ៉ាងទង្វើរបស់ថៃនាពេលចុងក្រោយនេះនៅប្រាសាទតាមាន់ធំរបស់កម្ពុជា ធ្វើឲ្យពលរដ្ឋខ្លួនឆោឡោរត់បាតជើងសព្រាត។ 

នៅព្រំដែនមីយ៉ាន់ម៉ា

ប្រជាជនថៃនៅជាប់ព្រំដែនមីយ៉ាន់ម៉ា ជាពិសេសខេត្ត Tak និង Mae Hong Son កំពុងរស់នៅដោយភាពភ័យខ្លាចយ៉ាងខ្លាំង ដោយសារតែការវាយប្រហារនិងជម្លោះប្រដាប់អាវុធក្នុងប្រទេសមីយ៉ាន់ម៉ា។

ប្រជាជនថៃនៅតាមព្រំដែនរងការគំរាមកំហែងដោយផ្ទាល់ពីការវាយប្រហារកាំភ្លើងធំ ការបាញ់ផ្លោង និងការវាយប្រហារតាមអាកាសដោយយន្តហោះចម្បាំង និងដ្រូនរបស់កងទ័ពមីយ៉ាន់ម៉ា។

លើសពីនេះ ជម្លោះក៏បង្ខំឲ្យជនស៊ីវិលមីយ៉ាន់ម៉ារាប់ម៉ឺននាក់រត់ភៀសខ្លួនឆ្លងដែនមករកទីជម្រកសុវត្ថិភាពក្នុងដីថៃ ដែលដាក់សម្ពាធលើធនធាននិងសន្តិសុខមូលដ្ឋានផងដែរ។

ជម្លោះនៅមីយ៉ាន់ម៉ា ក៏រំខានដល់ពាណិជ្ជកម្មឆ្លងដែននិងសេដ្ឋកិច្ចមូលដ្ឋាន ធ្វើឲ្យជីវភាពរស់នៅរបស់ប្រជាជនថៃនៅតាមព្រំដែនកាន់តែពិបាកផងដែរ។

នៅព្រំដែនម៉ាឡេស៊ី

នៅខេត្តភាគខាងត្បូងដូចជា Yala, Pattani និង Narathiwat មានក្រុមបះបោរជាច្រើន កំពុងប្រើប្រាស់អំពើហិង្សាដើម្បីទាមទារស្វ័យភាព ឬឯករាជ្យ។ ទីនោះតែងកើតមានការបំផ្ទុះគ្រាប់បែកនៅទីផ្សារ តាមដងផ្លូវ លើរថយន្តយោធា ឬនៅទីសាធារណៈ។ មិនត្រឹមប៉ុណ្ណឹង ក៏មានការដុតបំផ្លាញសាលារៀន ឬប៉ុស្តិ៍ប៉ូលិសញឹកញាប់ផងដែរ។

ប្រជាជនថៃនៅតាមខេត្តទាំងនេះរស់នៅដោយភាពភ័យខ្លាចប្រចាំថ្ងៃ ដោយសារតែគ្មាននរណាម្នាក់ដឹងឡើយថាការវាយប្រហារនឹងកើតឡើងនៅពេលណាឬទីណា។ ពួកគេរស់នៅដោយមានការភ័យខ្លាចជាប់ជានិច្ចពេលចេញពីផ្ទះ៕

អត្ថបទ៖ សុខ សុវណ្ណ

ចុចអាន៖ ថៃ ថា មីនដែលទាហានខ្លួនជាន់ ទើបបង្កប់ថ្មីៗ ផ្ទុយពីការអះអាងរបស់ Boonsin Phadklang