មន្ត្រី​បច្ចេកទេស​កសិកម្ម​ឃុំ​ត្រពាំងបី ​អនុវត្ត​ប្រព័ន្ធ​កសិកម្ម​ចម្រុះ​ជួយ​លើក​កម្ពស់​គុណភាពដី​និង​ជីវភាព​កសិករ​កាន់​តែ​ប្រសើរ

កំពត ៖ នៅ​ថ្ងៃ​ទី១៧ ខែកក្កដា ឆ្នាំ២០២៥នេះ លោក ជឺម ង៉ុយ មន្ត្រីជំនាញកសិកម្ម និងប្រជាកសិករនៅក្នុងឃុំត្រពាំងបី ស្រុកឈូក ខេត្តកំពត បាន​បញ្ជាក់​ឱ្យ​ដឹង​ថា ការ​ធ្វើ​កសិកម្ម​ចម្រុះ(ដាំន្លែ រួមផ្សំ និងចិញ្ចឹមសត្វច្រើនមុខនៅលើដីតែមួយ) ផ្តល់​នូវ​អត្ថប្រយោជន៍ច្រើនយ៉ាង ដូច​បង្កើន​គុណ​ភាព​ដី ជំរុញ​កំណើនទិន្នផលនិងគុណភាពចំណីអាហារ ធន់នឹងទីផ្សារ និងជួយលើកកម្ពស់ជីវភាពកសិករ​ឱ្យ​កាន់​តែ​ប្រសើរ។

ពួក​គាត់​លើក​ទឹក​ចិត្ត​ឱ្យចូលរួមអនុវត្តប្រព័ន្ធកសិកម្មចម្រុះ​ឱ្យបានកាន់តែច្រើន ដើម្បីជួយជំរុញវិស័យកសិកម្ម និងទេសចរណ៍ខេត្តកំពត។

លោក ជឺម ង៉ុយ មន្ត្រីបច្ចេកទេសកសិកម្មឃុំត្រពាំងបីលោក បានបញ្ជាក់ឱ្យដឹងថា ការ​អនុវត្តប្រព័ន្ធកសិកម្មចម្រុះពិតល្អ និងមានអត្ថប្រយោជន៍ច្រើនយ៉ាង។ ហើយ​បើ​តាម​ការសង្កេតឃើញជាក់ស្តែង កសិករក្នុងឃុំរបស់លោក ដែលធ្វើកសិកម្មចម្រុះ គឺមានជីវភាពល្អប្រសើរ ជាងកសិករដែលដាំដំណាំ ឬចិញ្ចឹមសត្វ តែមួយមុខៗ។

ប្រជាពលរដ្ឋធ្វើកសិកម្មចម្រុះបានប្រាប់​ឱ្យ​ដឹង​ថា ពួកគាត់ដាំដំណាំច្រើនប្រភេទ រួមមាន៖ ដូង ខ្នុរ ស្វាយ ចេក ល្ហុង ត្រកួន សណ្តែកគួរ ពោត ត្រប់  ម្ទេស និងចិញ្ចឹមមាត់ទា ជ្រូក គោ ត្រីជាដើម  ដោយយកលាមកសត្វធ្វើជីសម្រាប់ដាំបន្លែនិងដំណាំ  ហើយយកបន្លែ និងផ្លែឈើ សម្រាប់ធ្វើចំណីឲ្យសត្វ និងត្រីវិញ ជាលក្ខណៈវិលជុំដោយកាត់បន្ថយការប្រើជីគីមី ហើយក្នុងករណីដំណាំ ឬបន្លែមួយណាគ្មានទីផ្សារ ក៏មិនសូវមានប៉ះពាល់ដល់ជីវភាពដែរ។

កសិករទាំងនោះបានបញ្ជាក់ថា ការធ្វើកសិកម្មចម្រុះដូចពូកគាត់ មិនជាមានអីនោះទេ តែអាចមានជីវភាពរស់នៅសមរម្យ ដូចគេដូចឯង។

តាម​ការ​បញ្ជាក់​របស់​មន្ត្រី​កសិកម្មឃុំត្រពាំងបី ថាឃុំនេះមានប្រជាពលរដ្ឋចំនួន ១៦០៣គ្រួសារ ក្នុងនោះអ្នកដែលប្រកបរបរកសិកម្មស្ទើរទាំងអស់ ប៉ុន្តែអ្នកដែលអាចអនុវត្តប្រព័ន្ធកសិកម្មចម្រុះបាន ប្រហែលជាង១០% ប៉ុណ្ណោះ។

លោក ជឺម ង៉ុយ មន្ត្រី​បច្ចេកទេសកសិកម្ម​ឃុំត្រពាំងបី​ បានលើកទឹកចិត្ត​ឱ្យកសិករចូលរួមអនុវត្តប្រព័ន្ធកសិកម្មចម្រុះ​ឱ្យ​បាន​កាន់តែច្រើន ដើម្បីជួយលើកកម្ពស់ជីវភាព ជំរុញវិស័យកសិកម្ម ពិសេសទាក់ទាញទេសចរណ៍​ឱ្យ​មក​លេងខេត្តកំពតកាន់តែច្រើន៕

ដោយ ៖ សឹង រ៉ាត់