ថៃជួបគ្រោះជាបន្តបន្ទាប់! លើកនេះបាក់ផ្លូវហាយវ៉េ មិនទាន់ដឹងមានមនុស្សស្លាប់ឬអត់?

ប្រទេសថៃជួបគ្រោះជាបន្តបន្ទាប់ ដោយនៅថ្ងៃព្រហស្បតិ៍ទី៣១ខែកក្កដាឆ្នាំ២០២៥ មានហេតុការណ៍បាក់ស្រុតផ្លូវហាយវ៉េនៅស្រុក Mae Sot នៃខេត្ត Tak ខណៈមនុស្សស្លាប់និងរបួសមិនទាន់ត្រូវបានបញ្ជាក់។ 

ហេតុការណ៍ដ៏រន្ធត់នេះបានកើតឡើងនាវេលាពេលព្រឹក ខណៈអាជ្ញាធរក្នុងតំបន់ប្រាប់អ្នកសារព័ត៌មានថា ពួកគេឮសំឡេងលាន់ខ្លាំងនៅពេលបាក់ផ្លូវចុះទៅក្រោមជម្រៅ២.៥ម៉ែត្រ។

ភ្លាមៗក្រោយកើតហេតុ អាជ្ញាធរបានប្រកាសឲ្យអ្នកបើកបរ រកផ្លូវវាង ខណៈមន្ទីរសាធារណការខេត្ត Tak បានបញ្ជូនមន្ត្រីឲ្យមកមើលនិងតាមដានស្ថានភាព២៤ម៉ោង រួចដោះស្រាយបញ្ហា។

ហេតុការណ៍នេះកើតឡើងស្របពេលស្រុក Mae Sot នៃខេត្ត Tak ជាពិសេសតំបន់ផ្សារ Rim Moei ដែលជាច្រកព្រំដែនសំខាន់ជាមួយមីយ៉ាន់ម៉ា កំពុងជួបប្រទះទឹកជំនន់យ៉ាងធ្ងន់ធ្ងរ។

កម្រិតទឹកបានឡើងខ្ពស់ជាង២ម៉ែត្រ ធ្វើឲ្យរថយន្តតូចៗមិនអាចធ្វើដំណើរឆ្លងកាត់បានទេ ហើយនេះជាការជន់លិចលើកទីពីរក្នុងខែកក្កដា។

ទឹកទន្លេ Moei បានឡើងផុតច្រាំង ជន់លិចផ្លូវនិងសហគមន៍នៅតាមដងទន្លេ។ ផ្លូវជាច្រើនត្រូវបានលិចទឹកនិងអាចមិនអាចឆ្លងកាត់បាន ដែលរំខានដល់ការធ្វើដំណើរ៕

អត្ថបទ៖ សុខ សុវណ្ណ

ចុចអាន៖ ថៃជួបគ្រោះទៀតហើយ! ផ្ទុះរោងចក្រកាំជ្រួច ស្លាប់មនុស្ស៩នាក់