ថៃកំពុងតាមដានស្ថានការណ៍ ខណៈយន្តហោះចម្បាំងមីយ៉ាន់ម៉ា ទម្លាក់គ្រាប់បែកនៅរដ្ឋ Kayah ឥតឈប់

យោងតាមប្រភពពីមន្ត្រីជាន់ខ្ពស់ការ៉ែនបានឲ្យដឹងថា នៅព្រឹកថ្ងៃពុធទី២០ខែសីហាឆ្នាំ២០២៥ យោធាមីយ៉ាន់ម៉ា បានបញ្ជូនយន្តហោះចម្បាំងទៅទម្លាក់គ្រាប់បែកបន្ថែមទៀតលើលើតំបន់ Mawshiw ក្នុងរដ្ឋ Kayah ដែលស្ថិតនៅជាប់ខេត្ត Mae Hong Son របស់ថៃ ខណៈកងថៃឯណោះ ក៏កំពុងតាមដានស្ថានការណ៍យ៉ាងយកចិត្តទុកដាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Khaosod​ ចុះផ្សាយថា កងទ័ពអាកាសមីយ៉ាន់ម៉ា បានបង្ហោះដ្រូនមកឈ្លបយកការណ៍ រួចក៏បញ្ជូនយន្តហោះចម្បាំង ទម្លាក់គ្រាប់បែកបណ្តាលឲ្យមនុស្ស៥នាក់រងរបួស។

អ្នកភូមិ Lor Ka Lo បានបញ្ជាក់ពីការមើលឃើញដ្រូនយោធាមួយគ្រឿងហោះយ៉ាងខ្ពស់ ដោយសន្មត់ថា ដ្រូននោះគឺកំពុងតាមដានចលនារបស់កងទ័ពការ៉ែននៅក្នុងតំបន់។

ការប្រយុទ្ធគ្នាយ៉ាងខ្លាំងក្លានៅក្នុងរដ្ឋ Kayah នេះ បានបង្កើនហានិភ័យនៃអំពើហិង្សា ដែលអាចនឹងរាលដាលដល់ទឹកដីថៃ ខណៈថៃក៏បារម្ភដែរថា យន្តហោះចម្បាំងមីយ៉ាន់ម៉ាអាចនឹងបំពានដែនអាកាសរបស់ខ្លួនដោយចៃដន្យ ក្នុងអំឡុងពេលធ្វើប្រតិបត្តិការយោធា។

ការវាយប្រហារថ្មីនេះកើតឡើង បន្ទាប់ពីមានសេចក្តីរាយការណ៍ថា តួលេខមនុស្សស្លាប់ក្នុងការទម្លាក់គ្រាប់បែកពីសំណាក់របបយោធាមីយ៉ាន់ម៉ា ក្នុងរដ្ឋ Kayah តាំងពីថ្ងៃអាទិត្យ បានកើនឡើងដល់៣២នាក់ហើយ។

តាមការចុះផ្សាយរបស់ Irrawaddy, ក្នុងចំណោមមនុស្សស្លាប់ ក៏រួមមានទាំងស្រ្តី៨នាក់និងកុមារ២នាក់ផងដែរ ខណៈមេដឹកនាំការ៉ែន អះអាងថា នេះគឺជាការវាយប្រហារអាកាសដ៏សាហាវបំផុតលើរដ្ឋ Kayah។

ទន្ទឹមនោះ ក្រុមប្រឹក្សាប្រតិបត្តិបណ្តោះអាសន្នរដ្ឋ Kayah បានអំពាវនាវដល់សហគមន៍អន្តរជាតិរួមទាំងអង្គការសហប្រជាជាតិនិងអាស៊ានផងដែរ សូមធ្វើសកម្មភាពដើម្បីឆ្លើយតបទៅឧក្រិដ្ឋកម្មសង្គ្រាមរបស់របបយោធា៕

អត្ថបទ៖ សុខ សុវណ្ណ

ចុចអាន៖ មនុស្សស្លាប់កើនច្រើនឡើងៗ ដោយការទម្លាក់គ្រាប់បែក​ នៅមីយ៉ាន់ម៉ា