ថៃ រងទុក្ខផ្ទួនៗ ឆេះអគារពាណិជ្ជកម្មនៅកណ្តាលក្រុងបាងកក ចំពេលព្យុះក៏កំពុងវាយប្រហារខ្លាំង

អគ្គិភ័យយ៉ាងសន្ធោសន្ធៅ បានឆាបឆេះអគារកម្ពស់៣ជាន់មួយនៅកណ្តាលក្រុងបាងកក ខណៈភ្លាមៗមិនទាន់ដឹងថាមានមនុស្សរងគ្រោះប៉ុន្មាននាក់ឬខូចខាតអ្វីខ្លះនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Khaosod, អគ្គិភ័យឆាបឆេះអគារពាណិជ្ជកម្ម នៅម៉ោង១២:៣០នាទីថ្ងៃត្រង់ ថ្ងៃពុធទី២៧ខែសីហាឆ្នាំ២០២៥ ក្នុងខ័ណ្ឌ Khlong San ធ្វើឲ្យអ្នកនៅក្នុងនោះ រត់ចែកជើងគ្នា។

សាក្សីនៅកន្លែងកើតហេតុប្រាប់ថា ពួកគេឃើញភ្លើងឆេះចេញពីជាន់ទី៣ ខណៈអាជ្ញាធរដាក់ការសង្ស័យទៅលើការទុស្សេខ្សែភ្លើង ជាដើមចមបង្កអគ្គិភ័យ។

អគ្គិភ័យនេះកើតឡើងស្របពេលថៃ កំពុងរងការវាយប្រហារយ៉ាងដំណំដោយព្យុះ Kajiki បង្កជាគ្រោះទឹកជំនន់ បំណាក់ដី ភ្លៀងផ្គរនិងរន្ទះ ទូទាំងប្រទេស។

ហេតុការណ៍ដ៏រន្ធត់គឺនៅខេត្តឈៀងម៉ៃ ដែលទីនោះផ្ទះពលរដ្ឋ៥ខ្នងត្រូវដីភ្នំបាក់សង្កត់ ខណៈមនុស្ស២នាក់ក៏បាត់បង់ជីវិតរីឯជាង១០នាក់ទៀតរងរបួស។

មិនត្រឹមប៉ុណ្ណឹង ព្យុះ Kajiki ក៏គំរាមកំហែងទីក្រុងប៉ាតាយ៉ា ជាមួយភ្លៀងធ្លាក់ជញ្ជ្រំនិងខ្យល់បក់ខ្លាំងផងដែរ ខណៈខេត្តភាគខាងជើង និងភាគឦសាន កំពុងរងគ្រោះធ្ងន់ធ្ងរដោយសារបំណាក់ដីនិងទឹកជំនន់។

នាយកដ្ឋានឧតុនិយមថៃបានចេញសេចក្តីជូនដំណឹងដល់ប្រជាពលរដ្ឋក្នុងខេត្ត Chiang Rai, Nan, Nong Khai, Nakhon Phanom, Ranong និងខេត្តផ្សេងទៀតឲ្យមានការប្រុងប្រយ័ត្នខ្ពស់។ ចំណែកទីក្រុងបាងកក និងតំបន់នៅជិតៗ ក៏ត្រូវជួបព្យុះផ្គររន្ទះបន្តអូសបន្លាយជាច្រើនថ្ងៃទៀតដែរ៕

អត្ថបទ៖ សុខ សុវណ្ណ

ចុចអាន៖ បំណាក់ដីនិងទឹកជំនន់ ធ្វើឲ្យបាក់ស្ពានជាប់គាំងទេសចរក្នុងល្អាងភ្នំ ខេត្ត Mae Hong Son ប្រទេសថៃ