ក្នុងរយៈពេល៥ឆ្នាំចុងក្រោយនេះ សិស្ស-និស្សិតកម្ពុជាសិក្សានៅអាមេរិកមានកំណើន៥៥% ខ្ពស់ជាងគេក្នុងតំបន់អាស៊ីបូព៌ា

ក្នុងរយៈពេល ៥ ឆ្នាំចុងក្រោយនេះ កម្ពុជាមានកំណើន ៥៥% នៃចំនួនសិស្ស និស្សិតសិក្សានៅសហរដ្ឋអាមេរិក ខណៈ កំណើននៃភាគរយនេះគឺខ្ពស់លើសគេនៅក្នុងតំបន់អាស៊ីបូព៌ា និងប៉ាស៊ីហ្វិក។

ជាមួយនឹងកំណើនយ៉ាងឆាប់រហ័សនេះ ស្ថានទូតសហរដ្ឋអាមេរិកនៅភ្នំពេញ បានរៀបចំពិព័រណ៍ការសិក្សានៅសហរដ្ឋអាមេរិក ដែលហៅថា EducationUSA ប្រចាំឆ្នាំ ២០២៥ ចំនួន២លើក ដោយលើកទី១ នៅខេត្តសៀមរាប ថ្ងៃទី ០៨ ខែកញ្ញា និងលើកទី២ នៅភ្នំពេញ នៅថ្ងៃទី ១០ ខែកញ្ញា ដើម្បីតភ្ជាប់និស្សិតកម្ពុជា ជាមួយស្ថាប័នអប់រំនៅសហរដ្ឋអាមេរិក និងផ្តល់ឱកាសសម្រាប់ការចូលរួមក្នុងកម្មវិធីផ្លាស់ប្តូរគ្នាផ្នែកសិក្សាអប់រំ។ ពិព័រណ៍សិក្សានេះ បានផ្តល់ឱកាសដល់សិស្ស-និស្សិតកម្ពុជា ស្វែងយល់បន្ថែមពីការសិក្សានៅសហរដ្ឋអាមេរិក និងការស្នើសុំអាហារូបករណ៍សិក្សានៅទីនោះ។ នេះបើតាមសេចក្តីប្រកាសព័ត៌មានស្ថានទូតអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅខេត្តសៀមរាប លោកស្រី Sara Feuerstein ប្រធានស្តីទីផ្នែកកិច្ចការសាធារណៈរបស់ស្ថានទូតអាមេរិក និងលោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប បានអញ្ជើញបើកព្រឹត្តិការណ៍នេះ ដែលមានអ្នកចូលរួមជាង ៩០០ នាក់។ អ្នកស្រី Feuerstein បានថ្លែងថា៖ «តាមរយៈពិព័រណ៍ EducationUSA និស្សិតកម្ពុជាមានឱកាសពិសេស ក្នុងការសិក្សានៅសហរដ្ឋអាមេរិក ដែលជំរុញការយល់ដឹងទៅវិញទៅមក និងផ្តល់លទ្ធភាពឲ្យមនុស្សជំនាន់ក្រោយអាចរួមចំណែកដល់ការរីកចម្រើនជាសាកល»។

នៅរាជធានីភ្នំពេញ លោកភារធារីស្ថានទូតអាមេរិក Benjamin Chiang និងលោក សោម រតនា អនុរដ្ឋលេខាធិការនៃក្រសួងអប់រំ យុវជន និងកីឡា បានប្រកាសបើកពិព័រណ៍ និងសំណេះសំណាលជាមួយតំណាងនៃសាកលវិទ្យាល័យនិមួយៗ ក្នុងពេលទស្សនាស្តង់ពិព័រណ៍នានា។ ជារៀងរាល់ឆ្នាំ  ពិព័រណ៍ EducationUSA ផ្តល់ឱកាសដ៏មានតម្លៃសម្រាប់និស្សិតកម្ពុជាស្វែងយល់ពីឱកាសសិក្សាបន្ត នៅសហរដ្ឋអាមេរិក។ លោកភារធារីស្ថានទូត Benjamin Chiang បានមានប្រសាសន៍ថា ៖​ «ការប្តេជ្ញាចិត្តរបស់កម្ពុជាចំពោះការអប់រំ និងកិច្ចសហការអន្តរជាតិ បង្ហាញពីបំណងប្រាថ្នារបស់យុវជនកម្ពុជា ក្នុងការចូលរួមជាមួយពិភពលោក»។

ក្នុងពិព័រណ៍នៅឆ្នាំនេះ អ្នកចូលរួមបានស្វែងយល់ព័ត៌មានអំពីអាហារូបករណ៍ និងកម្មវិធីផ្លាស់ប្តូរទស្សនកិច្ចសិក្សានានា ដែលឧបត្ថម្ភថវិកាដោយសហរដ្ឋអាមេរិក ស្វែងយល់អំពីដំណើរការសុំទិដ្ឋាការពីមន្រ្តីកុងស៊ុល​នៃស្ថានទូតអាមេរិក និងធ្វើទំនាក់ទំនងដោយផ្ទាល់ជាមួយតំណាង ដែលមកពីស្ថាប័នអប់រំចំនួន ១០ នៅសហរដ្ឋអាមេរិក។ អ្នកតំណាងទាំងនេះបានចែករំលែកព័ត៌មានលម្អិតអំពីកម្មវិធីសិក្សា លក្ខណៈសម្បត្តិអាចចូលរៀនបាន និងដំណើរការដាក់ពាក្យចូលរៀន ដែលជំរុញឱ្យនិស្សិតបោះជំហានបន្ទាប់ដើម្បីសម្រេចគោលដៅសិក្សារបស់ពួកគេ។

សាកលវិទ្យាល័យ និងមហាវិទ្យាល័យដែលចូលរួមក្នុងពិព័រណ៍ការសិក្សា EducationUSA ២០២៥ នេះរួមមាន ៖  Bryant University, Clark College , Edmonds College , Foothill College , Iowa State University of Science and Technology, Kent State University ,    Lake Washington Institute of Technology , Middle Tennessee State University , Minnesota State University – Mankato , Seattle Colleges  Shoreline Community College , University of Arizona ។

សាកលវិទ្យាល័យដែលបានតំណាងនៅក្នុងពិធីនេះ ស្ថិតនៅក្នុងទីក្រុងធំ និងតូច មានរាប់ពីសាកលវិទ្យាល័យធំ ទៅសាកលវិទ្យាល័យតូច ទាំងផ្នែកសាធារណៈ និងឯកជន ពីសាកលវិទ្យាល័យសិក្សា ៤ឆ្នាំ ទៅមហាវិទ្យាល័យសហគមន៍សិក្សា ២ ឆ្នាំ។ ទាំងនេះបង្ហាញពីជម្រើសនានា សម្រាប់និស្សិតក្នុងការស្វែងរកការអប់រំដែលសមស្របនឹងចំណាប់អារម្មណ៍ និងគោលដៅរបស់ពួកគេ។

ក្នុងរយៈពេលពេញឆ្នាំមួយ ស្ថានទូតអាមេរិកនៅភ្នំពេញបានផ្សព្វផ្សាយឱកាសសម្រាប់ការសិក្សា តាមរយៈមជ្ឈមណ្ឌលប្រឹក្សាអប់រំ EducationUSA ដោយឥតគិតថ្លៃនៅភ្នំពេញនាមជ្ឈមណ្ឌល AmCam Exchange និងខេត្តសៀមរាប នៅសាកលវិទ្យាល័យបញ្ញាសាស្ត្រ ក៏ដូចជាសេវាកម្ម EducationUSA នៅគ្រប់បណ្ណាល័យអាមេរិក ។

មជ្ឈមណ្ឌលទាំងនេះផ្តល់ការណែនាំដោយផ្ទាល់ខ្លួន និងដោយឥតគិតថ្លៃ រាប់ពីដំណើរការដាក់ពាក្យសុំចូលរៀន ដល់ការរកសៀវភៅ និងឯកសារត្រៀម។ ស្ថានទូតអាមេរិកក៏ផ្តល់ផងដែរ នូវកម្មវិធីផ្លាស់ប្តូរផ្នែកការសិក្សាអប់រំ និងអាហារូបករណ៍ រៀបចំព្រឹត្តិការណ៍ទៀងទាត់តាមរយៈ បណ្ណាល័យអាមេរិក ទាំងបួនរបស់យើងនៅខេត្តបាត់ដំបង កំពង់ចាម រាជធានីភ្នំពេញ និងខេត្តសៀមរាប និងបានចុះផ្សព្វផ្សាយព័ត៌មាននៅតាមសាលានៅទូទាំងប្រទេសកម្ពុជា៕