ព័ត៌មានអន្ដរជាតិ

ជនជាតិចិនសម្រុកចេញពីថៃទៅវៀតណាម ដោយសារបារម្ភពីសុវត្ថិភាព

បានផុស

១០ ខែ មុន

នៅ

ថ្ងៃពុធ ២៤ កញ្ញា ២០២៥

ដោយ

Chheang

ការព្រួយបារម្ភអំពីសុវត្ថិភាព ការកើនឡើងថ្លៃចំណាយ និងការប្រកួតប្រជែង បានធ្វើឲ្យភ្ញៀវទេសចរចិនជាច្រើនសម្រេចផ្លាស់ប្តូរទិសដៅធ្វើដំណើររបស់ពួកគេពីប្រទេសថៃទៅកាន់ប្រទេសវៀតណាមជំនួសវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ព័ត៌មានជាច្រើន បង្ហាញថា ការណ៍នេះបានជំរុញឲ្យវិស័យទេសចរណ៍វៀតណាមមានការកើនឡើង ខណៈទេសចរដែលចូលប្រទេសថៃបានធ្លាក់ចុះយ៉ាងគំហុក។

ឧប្បត្តិហេតុ និងកត្តាជាច្រើន បានធ្វើឲ្យកេរ្តិ៍ឈ្មោះប្រទេសថៃអសោចក្នុងចំណោមអ្នកធ្វើដំណើរចិន ខណៈមន្ត្រី និងប្រតិបត្តិករទេសចរណ៍ថៃកំពុងព្យាយាមដោះស្រាយអំពីបញ្ហានេះ។

ការចាប់ជំរិតបុគ្គលល្បី៖ ការចាប់ជំរិតដែលត្រូវបានផ្សព្វផ្សាយជាសាធារណៈលើតារាសម្តែងចិន Wang Xing នៅដើមឆ្នាំ២០២៥ គឺជាការរារាំងដ៏សំខាន់មួយ។ Wang ត្រូវបានគេល្បួងទៅប្រទេសថៃ ហើយបន្ទាប់មកត្រូវបានជួញដូរទៅជាក្រុមឆបោកតាមអ៊ីនធឺណិតក្នុងប្រទេសមីយ៉ាន់ម៉ា។ ព័ត៌មាននេះបានសាយភាយយ៉ាងទូលំទូលាយលើបណ្តាញសង្គមចិន និងបន្តបង្កការភ័យខ្លាចមកដល់សព្វថ្ងៃ។
ភាពយន្ត «No More Bets»៖ ភាពយន្តចិនឆ្នាំ២០២៣ «No More Bets» បានពណ៌នាអំពីការជួញដូរមនុស្ស និងការបោកប្រាស់តាមអ៊ីនធឺណិតនៅក្នុងតំបន់អាស៊ីអាគ្នេយ៍។ ភាពយន្តនេះបានបង្កើនការភ័យខ្លាចសុវត្ថិភាពក្នុងចំណោមទស្សនិកជនចិន ហើយឧប្បត្តិហេតុចាប់ជំរិតក្នុងជីវិតពិតបានរឹតបង្កើនការព្រួយបារម្ភមួយកម្រិតទៀត។
ការបោកប្រាស់ និងការក្លែងបន្លំ៖ ភ្ញៀវទេសចរចិនបានត្អូញត្អែរអំពីការបោកប្រាស់ និងឧក្រិដ្ឋកម្មជាច្រើន រួមទាំងការយកប្រាក់លើសដោយអ្នកបើកបរតាក់ស៊ី និងអ្នកលក់ដូរពីជនបរទេសនៅតាមតំបន់ទេសចរណ៍សំខាន់ៗ។ មានរបាយការណ៍ផងដែរអំពីក្រុមឧក្រិដ្ឋជនចិន ដែលប្រតិបត្តិការមជ្ឈមណ្ឌលបោកប្រាស់នៅក្នុងតំបន់។
ការកើនឡើងថ្លៃទំនិញ និងសេវាកម្ម៖ ការឡើងថ្លៃក្រោយជំងឺរាតត្បាតសម្រាប់សណ្ឋាគារ អាហារ និងការដឹកជញ្ជូន បានធ្វើឲ្យប្រទេសថៃលែងសូវមានតម្លៃសមរម្យដូចមុន ដោយបំផ្លាញកេរ្តិ៍ឈ្មោះរបស់ខ្លួនដែលធ្លាប់ជាគោលដៅទេសចរណ៍មានតម្លៃសមរម្យសម្រាប់បរទេស។ ការឡើងថ្លៃប្រាក់បាតថៃធៀបនឹងប្រាក់យ័នចិន ក៏បានធ្វើឲ្យការធ្វើដំណើរទៅកាន់ប្រទេសថៃមានតម្លៃថ្លៃជាងមុនផងដែរ។

ព្រោះតែបែបនេះហើយទើបលំហូរនៃអ្នកទេសចរចិនកំពុងកើនឡើងយ៉ាងច្រើនសន្ធឹកនៅក្នុងប្រទេសវៀតណាមវិញ នាឆ្នាំ២០២៥។ អ្នកវិភាគទីផ្សារបានព្យាករថា ប្រទេសវៀតណាមអាចទាក់ទាញភ្ញៀវទេសចរបានចំនួន ២២,៦លាននាក់នៅត្រឹមដំណាច់ឆ្នាំនេះ។

ការធ្លាក់ចុះនៃភ្ញៀវទេសចរចិននៅថៃ បានជះឥទ្ធិពលសេដ្ឋកិច្ចក្នុងស្រុកយ៉ាងខ្លាំង ជាមួយនឹងការធ្លាក់ចុះនៃប្រាក់ចំណូល និងសណ្ឋាគារចាប់ផ្ដើមបិទបន្តកន្ទុយគ្នា។ ឧស្សាហកម្មទេសចរណ៍ថៃ កំពុងជួបការលំបាកក្នុងការទទួលបានទំនុកចិត្តពីភ្ញៀវឡើងវិញ ហើយអាជ្ញាធរទេសចរណ៍បានចាប់ផ្តើមយុទ្ធនាការដើម្បីលើកកម្ពស់សុវត្ថិភាពរបស់ប្រទេស៕

ដោយ៖ ឈាង