ព័ត៌មានអន្ដរជាតិ

ថៃប្តូរប្រធានគណៈកម្មការព្រំដែនចម្រុះ(JBC) ថៃ ជំនួស លោក Prasas Prasasvinitchai

បានផុស

៨ ខែ មុន

នៅ

ថ្ងៃពុធ ១ តុលា ២០២៥

ដោយ

រដ្ឋាភិបាលថៃទំនងផ្លាស់ប្តូរប្រធានគណៈកម្មការព្រំដែនចម្រុះ (JBC) របស់ខ្លួននៅថ្ងៃទី២ខែតុលា ជំនួសលោក Prasas Prasasvinitchai ដែលផុតអាណត្តិ និងដែលបានធ្វើជាសហប្រធានដឹកនាំកិច្ចប្រជុំចុងក្រោយលើកទី៦ នៃគណៈកម្មការព្រំដែនចម្រុះថៃ-កម្ពុជា ស្តីពីការបោះបង្គោលព្រំដែនគោក (JBC) កាលថ្ងៃទី១៤ខែមិថុនា២០២៥ នៅរាជធានីភ្នំពេញ។

លោក Prasas Prasasvinitchai ប្រធានគណៈកម្មការព្រំដែនចម្រុះថៃ ដែលផុតអាណត្តិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់នាយករដ្ឋមន្ត្រីថៃ លោក អានុទីន ចានវិរៈគុល (Anutin Charnvirakul) នៅថ្ងៃទី១ខែតុលានេះ បន្ទាប់ពីអ្នកសារព័ត៌មានថៃ បានសួរសំណួរអំពីការចប់អាណត្តិរបស់ Prasas Prasasvinitchai និងបេក្ខជនដែលត្រូវមកចូលជំនួសប្រធានបច្ចុប្បន្ន។

យោងសារព័ត៌មានថៃ Khaosod លោក អានុទីន បានឆ្លើយតបថា ក្រុមប្រឹក្សាសន្តិសុខជាតិ (NSC) នឹងរៀបចំកិច្ចប្រជុំនៅថ្ងៃទី២តុលា ដើម្បីពិភាក្សាលើបញ្ហានេះ ហើយបេក្ខជនថ្មីដែលត្រូវជំនួសលោក Prasas Prasasvinitchai ក៏ត្រូវបានបញ្ជាក់រួចរាល់ដែរ ប៉ុន្តែលោក អានុទីន មិនអាចបង្ហើបអត្តសញ្ញាណអ្នកថ្មីនោះទេ ដោយត្រូវរង់ចាំរហូតដល់ចប់កិច្ចប្រជុំនៅថ្ងៃទី២តុលា។

លោក Prasas Prasasvinitchai មានប្រវត្តិស៊ីជម្រៅពាក់ព័ន្ធនឹងអាជីពការទូតនៅកម្ពុជាក្នុងរយៈពេលជាង១ទសវត្សរ៍ចុងក្រោយនេះ ជាពិសេស ក្រោយពេលដែលរដ្ឋាភិបាលថៃដឹកនាំ ដោយអតីតនាយករដ្ឋមន្ត្រី Abhisit Vejjajiva ដែលកើតចេញពីមេដឹកនាំក្រុមអាវលឿងប្រឆាំងនយោបាយរបស់លោក ថាក់ស៊ីន ស៊ីណាវ៉ាត្រ។

អតីតនាយករដ្ឋមន្ត្រីថៃ លោក Abhisit Vejjajiva ដែលដឹកនាំរដ្ឋាភិបាលចម្រុះថៃ ចន្លោះឆ្នាំ២០០៨ ដល់ឆ្នាំ២០១១ បានតែងតាំង លោក Prasas Prasasvinitchai ជាឯកអគ្គរាជទូតថៃប្រចាំនៅភ្នំពេញនៅក្នុងឆ្នាំ២០០៩ ក្នុងអំឡុងពេលដែលការទូតកម្ពុជានិងថៃមានភាពតានតឹងជាខ្លាំង និងជាពេលវេលាដែលមានការផ្ទុះអាវុធបង្ហូរឈាមជាហូរហែ។

ក្រោយការតែងតាំង និងកាន់តួនាទីជាប្រមុខការទូតប្រចាំទីក្រុងភ្នំពេញមិនបានប៉ុន្មាន លោក Prasas Prasasvinitchai ត្រូវបានរដ្ឋាភិបាលថៃកោះហៅទៅកាន់ប្រទេសថៃវិញនៅចុងឆ្នាំ២០០៩ ដែលជាការតវ៉ារបស់រដ្ឋាភិបាលរបស់ លោក Abhisit Vejjajiva ចំពោះនាយករដ្ឋមន្ត្រីកម្ពុជា សម្តេច ហ៊ុន សែន ដែលកាលនោះបានតែងតាំងអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ (Thaksin Shinawatra) ដែលរបួតអំណាចដោយរដ្ឋប្រហារ និងកំពុងនិរទេសខ្លួននៅក្រៅប្រទេស ជាទីប្រឹក្សាផ្ទាល់ផ្នែកសេដ្ឋកិច្ច។

ប៉ុន្តែក្រោយរយៈពេល៩ខែនៃការដកទូតចេញទៅវិញទៅមក កម្ពុជានិងថៃបានរកច្រកចេញឃើញបន្ថយភាពតានតឹងផ្នែកការទូត បន្ទាប់ពី លោក ថាក់ស៊ីន ស៊ីណាវ៉ាត្រ បានលាឈប់ពីតំណែងជាទីប្រឹក្សាផ្ទាល់របស់សម្តេច រដ្ឋមន្ត្រី ហ៊ុន សែន លោក Prasas Prasasvinitchai ក៏ត្រូវបានទទួលការតែងតាំងឱ្យវិលមកស្តារទំនាក់ទំនងការទូតជាមួយកម្ពុជាកាលខែសីហាឆ្នាំ២០១០។

កាលពេលនោះ លោក ថាក់ស៊ីន ស៊ីណាវ៉ាត់ បានសុំលាលែងពីតំណែងដោយលើកហេតុផលថា លោកជួបការលំបាកផ្ទាល់ខ្លួន ដើម្បីបំពេញតួនាទីរបស់លោកឲ្យបានពេញលេញ ទើបលោកបានសម្រេចចិត្តលាឈប់ពីមុខតំណែងរបស់លោកនៅកម្ពុជា។

ឯកអគ្គរាជទូតថៃរូបនេះ ត្រូវបានមជ្ឈដ្ឋានអ្នកនយោបាយថៃ ជាពិសេសក្រសួងការបរទេសថៃ ទទួលស្គាល់ថា ជាអ្នកការទូតមានចំណេះដឹងជ្រៅជ្រះពីកម្ពុជាក្នុងកិច្ចចរចាបោះបង្គោលព្រំដែន។ យោងតាមការផ្សាយរបស់ The Nation កាលខែកញ្ញាឆ្នាំ២០១១ លោក Prasas Prasasvinitchai ត្រូវបានគេចាត់ទុកថាជាអ្នកមានចំណេះដឹងជាពិសេសអំពីការបោះបង្គោលព្រំដែន។

ឯកសារក្រសួងការបរទេសថៃ បានឲ្យដឹងថា លោក Prasas Prasasvinitchai បានធ្វើជាសហប្រធានគណៈកម្មការព្រំដែនចម្រុះថៃ-កម្ពុជា (ភាគីថៃ) បានដឹកនាំកិច្ចប្រជុំលើកទី៦ នៃគណៈកម្មការចម្រុះថៃ-កម្ពុជា ស្តីពីការបោះបង្គោលព្រំដែនគោក (JBC) ជាមួយ ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែននៅរាជធានីភ្នំពេញ។

ក្នុងកិច្ចប្រជុំនោះ ភាគីទាំងពីរបានសង្កត់ធ្ងន់លើសារៈសំខាន់នៃគណៈកម្មការចម្រុះថៃ-កម្ពុជាស្តីពីការបោះបង្គោលព្រំដែនគោក (JBC) ដែលជាយន្តការសំខាន់ក្នុងការចរចាបញ្ហាព្រំដែនរវាងភាគីទាំងពីរ និងធ្វើការរួមគ្នាឆ្ពោះទៅរកដំណោះស្រាយដោយសន្តិវិធី ដូចមានចែងក្នុងអនុស្សរណៈនៃការយោគយល់គ្នាឆ្នាំ ២០០០ រវាងរដ្ឋាភិបាលនៃព្រះរាជាណាចក្រថៃ និងរដ្ឋាភិបាលនៃព្រះរាជាណាចក្រកម្ពុជា ស្តីពីការវាស់វែង និងការបោះបង្គោលព្រំដែនគោក។ លើសពីនេះ កិច្ចប្រជុំនឹងដើរតួនាទីយ៉ាងសំខាន់ក្នុងការកាត់បន្ថយភាពតានតឹង និងដាក់មូលដ្ឋានសម្រាប់ដំណោះស្រាយប្រកបដោយនិរន្តរភាព៕

រ៉ាន់ រើយ