សេចក្ដីជូនដំណឹង

អ្នកឧកញ៉ា ឈុន លាង និង អ្នកឧកញ៉ា សំ អាង ព្រមទាំងក្រុមគ្រួសារ ថ្លែងអំណរគុណញាតិមិត្ត ដែលបានចូលរួមពិធីបុណ្យសព សីលវិសុទ្ធសិរីរចនា នាង ហ៊ុច អគ្គមហាឧបាសិកាពុទ្ធសាសនូបត្ថម្ភក៍

បានផុស

២ years មុន

នៅ

ថ្ងៃចន្ទ ១៨ ធ្នូ ២០២៣

ដោយ

អ្នកឧកញ៉ា ឈុន លាង និងអ្នកឧកញ៉ា សំ អាង តំណាងក្រុមគ្រួសារសពសីលវិសុទ្ធសិរីរចនា នាង ហ៊ុច អគ្គមហាឧបាសិកាពុទ្ធសាសនូបត្ថម្ភក៍ បានផ្ញើសារថ្លែងអំណរគុណយ៉ាងជ្រាលជ្រៅបំផុតគោរពជូន សម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ញាតិមិត្តជិតឆ្ងាយ ដែលបានចូលរួមគោរពវិញ្ញាណក្ខន្ធ ដាក់កម្រងផ្កា និងជូនសារចូលរួមរំលែកទុក្ខដ៏ក្រៀមក្រំ ចំពោះការបាត់បង់ សីលវិសុទ្ធសិរីរចនា នាង ហ៊ុច អគ្គមហាឧបាសិកាពុទ្ធសាសនូបត្ថម្ភក៍។ទឹកចិត្តដ៏ថ្លៃថ្លា និងកាយវិការដ៏ប្រពៃខាងលើនេះ គឺជាកម្លាំងចិត្តដ៏ធំធេង និងជាសមានចិត្តស្រលាញ់រាប់អានដ៏ជ្រាលជ្រៅបំផុត ចំពោះក្រុមគ្រួសាររបស់យើងខ្ញុំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សីលវិសុទ្ធសិរីរចនា នាង ហ៊ុច អគ្គមហាឧបាសិកាពុទ្ធសាសនូបត្ថម្ភក៍ បានទទួលមរណភាព កាលពីថ្ងៃអាទិត្យ ១៣ រោច ខែកត្តិក ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី ១០ ខែធ្នូ ឆ្នាំ ២០២៣ វេលាម៉ោង ៩ និង ១៨ នាទីព្រឹក ក្នុងជន្មាយុ ៩១ ឆ្នាំ ដោយជរាពាធ។ ពិធីបុណ្យសព និងបុណ្យខួបគម្រប់ ៧ ថ្ងៃ និង ១០០ ថ្ងៃ បានប្រព្រឹត្តទៅ និងបញ្ចប់ដោយរលូនសមរម្យតាមគន្លងប្រពៃណីខ្មែរ និងព្រះពុទ្ធសាសនា។

យើងខ្ញុំ សូមបួងសួងដល់គុណបុណ្យព្រះរតនត្រ័យកែវទាំងបី ព្រមទាំងបារមីវត្ថុស័ក្តិសិទ្ធិទាំងឡាយក្នុងលោក សូមប្រសិទ្ធពរជ័យ បវរសួស្ដី ជ័យមង្គល វិបុលសុខ គោរពជូន សម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ញាតិមិត្តជិតឆ្ងាយ ភ្ញៀវកិត្តិយសទាំងអស់ និងសូមបានសមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ ទន្ទឹមនឹងនេះ យើងខ្ញុំ គោរពសូមការយោគយល់អធ្យាស្រ័យដោយក្តីអនុគ្រោះបំផុត ចំពោះកំហុសឆ្គងជាយថាហេតុក្នុងប្រការណាមួយ៕