ព័ត៌មានអន្ដរជាតិ

ប្រធានាធិបតីអ៊ីរ៉៉ង់ ឲ្យកែទម្រង់អ៊ីរ៉ង់ដើម្បីកសាងអ៊ីរ៉ង់ប្រឈមសត្រូវ

បានផុស

១០ នាទី មុន

នៅ

ថ្ងៃអង្គារ ២១ កក្កដា ២០២៦

ដោយ

ប្រធានាធិបតីសាធារណៈរដ្ឋអ៊ីស្លាមអ៊ីរ៉ង់ លោក Masoud Pezeshkian បានជំរុញការដោះស្រាយបញ្ហារបស់ប្រទេសជាតិរបស់លោក ឆ្ពោះទៅរកការកែទម្រង់ដើម្បីប្រឈមជាមួយសត្រូវក្នុងរយៈពេលវែង ដោយផ្តើមចេញការកែទម្រង់ចេញពីថ្នាក់ក្រោម។

ប្រធានាធិបតីសាធារណៈរដ្ឋអ៊ីស្លាមអ៊ីរ៉ង់ លោក Masoud Pezeshkian។ facebook

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអ៊ីរ៉ង់ដែលកំពុងស្ថិតនៅក្នុងជម្លោះប្រដាប់អាវុធជាមួយសហរដ្ឋអាមេរិក និងអ៊ីស្រាអែល អស់រយៈពេលជាង៤ខែទៅហើយ ប៉ុន្តែភាគីជម្លោះមិនទាន់អាចរកដំណោះស្រាយសមស្របសម្រាប់ដោះស្រាយដោយសន្តិភាពនោះទេ ដោយភាគីទាំងពីរនៅតែបង្កើនការដាក់សម្ពាធលើគ្នាទៅវិញទៅមក។

លោក Masoud Pezeshkian បានបង្ហោះសារលើបណ្តាញសង្គម ដោយសរសេរថា៖ «ថ្ងៃនេះ សត្រូវទាំងឡាយកំពុងប្រឹងប្រែងព្យាយាមគ្រប់យ៉ាងដើម្បីទប់ស្កាត់ការរីកចម្រើនរបស់ប្រទេស ប៉ុន្តែជាមួយការដោះស្រាយនិងភាពសកម្មនៃសមត្ថភាពប្រជាជនទាំងអស់ យើងអាចឆ្លងកាត់កាលៈទេសៈទាំងនេះ»។

ប្រធានាធិបតីអ៊ីរ៉ង់ បានទទួលស្គាល់ថា រដ្ឋាភិបាលតែឯងមិនអាចដោះស្រាយបញ្ហាទាំងឡាយនោះទេ ព្រះវិហារសាសនា ក្រុមនៅថ្នាក់ក្រោម និង រដ្ឋបាលមូលដ្ឋាន ត្រូវតែចូលរួមក្នុងរឿងទាំងអស់នេះ។

ក្នុងការប្រយុទ្ធគ្នាចុងក្រោយចំនួន១០ថ្ងៃនេះ សហរដ្ឋអាមេរិកបានវាយប្រហារអ៊ីរ៉ង់តាមផ្លូវអាកាសដោយបំផ្លាញសមត្ថភាពយោធារបស់អ៊ីរ៉ង់ ដ្រូន ទីតាំងបាញ់មីស៊ីល និង ហេដ្ឋារចនាសម្ព័ន្ធយោធាជាច្រើននៅភាគខាងត្បូងអ៊ីរ៉ង់ ជាពិសេសជុំវិញច្រកសមុទ្រហ័រមូស។ នេះបើយោងតាមបញ្ជាការកណ្តាលរបស់អាមេរិក (CENTCOM)

តាមសេចក្តីរាយការណ៍របស់ West Asia News Agency (WANA) ដោយស្រង់ប្រភពពីក្រសួងសុខាភិបាលអ៊ីរ៉ង់ ប្រជាជនអ៊ីរ៉ង់ជាង៥០នាក់បានសម្លាប់ ហើយ ជាង៥០០នាក់បានរងរបួសពីការវាយប្រហាររបស់សហរដ្ឋអាមេរិក។ ស្របជាមួយគ្នានោះដែរ យោធាអាមេរិកក៏មានបាត់បង់ជីវិត និង របួសមួយចំនួនពីការវាយប្រហាររបស់អ៊ីរ៉ង់។

ប្រឈមសង្គ្រាមដែលពិបាករកផ្លូវបញ្ចប់ដោយសន្តិវិធីក្នុងរយៈពេលខ្លី លោក Masoud Pezeshkian បានលើកឡើងថា៖ «យើងត្រូវតែកែការយល់ឃើញ និង ពង្រីកទស្សនៈវិស័យរបស់យើង។ ប្រសិនបើយើងមិនមើលឃើញស្ថានភាពបច្ចុប្បន្នជាទីបញ្ចប់នៃផ្លូវដើរ និងប្តេជ្ញាដើម្បីធ្វើឲ្យវាប្រសើរឡើង យើងនឹងទៅដល់ទីតាំងដ៏មានតម្លៃនៃប្រជាជាតិអ៊ីរ៉ង់»។

លោក បន្តថា៖«យើងត្រូវតែដោះស្រាយសម្រាប់វិធានការបច្ចុប្បន្ន កែទម្រង់បែបបទប្រើប្រាស់ និងបង្កើនផលិតភាព ជាគន្លឹះដើម្បីដោះស្រាយបញ្ហា»។ ដោយពឹងផ្អែកលើសមត្ថភាពថ្នាក់មូលដ្ឋាន បញ្ហាជាច្រើើនអាចត្រូវបានដោះស្រាយ ដោយគ្មានពឹងផ្អែកពីខាងក្រៅ»៕

រ៉ាន់ រើយ