ឥណ្ឌូណេស៊ីគ្រោងបង្កើតមជ្ឈមណ្ឌលហិរញ្ញវត្ថុអន្តរជាតិ ដើម្បីទាក់ទាញការវិនិយោគបរទេស

រដ្ឋាភិបាលឥណ្ឌូណេស៊ីគ្រោងបង្កើតមជ្ឈមណ្ឌលហិរញ្ញវត្ថុអន្តរជាតិ ដើម្បីទាក់ទាញការវិនិយោគផ្ទាល់ពីបរទេស ពង្រឹងវិស័យហិរញ្ញវត្ថុ និងជំរុញកំណើនសេដ្ឋកិច្ចរបស់ប្រទេស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

មជ្ឈមណ្ឌលហិរញ្ញវត្ថុទាំងនេះ នឹងផ្តោតលើការទាក់ទាញធនាគារអន្តរជាតិ ធនាគារវិនិយោគ ក្រុមហ៊ុនគ្រប់គ្រងទ្រព្យសម្បត្តិ (Wealth Management) ព្រមទាំងក្រុមហ៊ុនជួលយន្តហោះ និងនាវា ឱ្យមកបណ្តាក់ទុននៅឥណ្ឌូណេស៊ី។

ដើម្បីទាក់ទាញវិនិយោគិន រដ្ឋាភិបាលនឹងផ្តល់ការលើកទឹកចិត្តផ្នែកពន្ធ រួមទាំងការលើកលែងពន្ធលើប្រាក់ចំណូលសាជីវកម្មរហូតដល់ ៥០ ឆ្នាំ សម្រាប់វិនិយោគិនដែលបំពេញលក្ខខណ្ឌកំណត់។

មន្ត្រីឥណ្ឌូណេស៊ីបានឱ្យដឹងថា ទ្រព្យសម្បត្តិរបស់ក្រុមគ្រួសារអ្នកមានៗបំផុតនៅលើពិភពលោក ដែលគ្រប់គ្រង​ជាលក្ខណៈក្រុមហ៊ុនគ្រួសារ (Family Offices) មានប្រមាណ ៣,២ ទ្រីលានដុល្លារ ហើយប្រហែល ៦៥% ក្នុងនោះ កំពុងស្វែង​រកទីតាំងថ្មីសម្រាប់វិនិយោគ។ ឥណ្ឌូណេស៊ីមានគោលដៅទាក់ទាញទុនទាំងនេះឱ្យចូលមកក្នុងប្រទេស។

រដ្ឋាភិបាលមិនទាន់កំណត់ទីតាំងសម្រាប់មជ្ឈមណ្ឌលហិរញ្ញវត្ថុដំបូងនៅឡើយទេ ប៉ុន្តែកោះបាលីត្រូវបានលើកឡើងថា ជាជម្រើសមួយ។ គម្រោងនេះត្រូវបានរំពឹងថា អាចទាក់ទាញការវិនិយោគបានរហូតដល់ ៥០០ ទ្រីលានរូពី (ប្រមាណ ២៧,៩ ​ប៊ីលានដុល្លារអាមេរិក)។

ជាមួយគ្នានេះ រដ្ឋាភិបាលក៏នឹងបង្កើតស្ថាប័នត្រួតពិនិត្យ ស្ថាប័នគ្រប់គ្រង និងតុលាការពិសេស ដើម្បីដោះស្រាយវិវាទដែលកើតឡើងក្នុងមជ្ឈមណ្ឌលហិរញ្ញវត្ថុទាំងនេះ។ អាជីវកម្មនៅក្នុងមជ្ឈមណ្ឌលក៏នឹងត្រូវបានអនុញ្ញាតឱ្យប្រើប្រាស់រូបិយប័ណ្ណបរទេសក្នុងប្រតិបត្តិការផងដែរ៕