សេដ្ឋកិច្ច

កម្ពុជានាំចូលពីម៉ាឡេស៊ីកើនឡើងខ្ពស់ ស្របពេលជម្លោះព្រំដែនកម្ពុជា-ថៃ

បានផុស

៩ ខែ មុន

នៅ

ថ្ងៃពុធ ២២ តុលា ២០២៥

ដោយ

ការនាំចូលទំនិញរបស់កម្ពុជាពីប្រទេសម៉ាឡេស៊ីមានទឹកប្រាក់ជាង៧០០លានដុល្លារក្នុងរយៈពេល៩ខែ កន្លងមកនេះ ដោយមានកំណើនជិត២៥% ខណៈអ្នកជំនាញលើកឡើងថា កំណើននៃការនាំចូលពីម៉ាឡេស៊ីឆ្លុះបញ្ចាំងអំពីការបង្វែរទិសនាំចូលរបស់កម្ពុជាពីប្រទេសថៃ។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ការដោះដូរទំនិញកម្ពុជា-ម៉ាឡេស៊ីសម្រេចបានទំហំទឹកប្រាក់ ៨០៧ លានដុល្លារ នៅក្នុងរយៈពេល៩ ខែ ឆ្នាំ ២០២៥ កើនឡើង ២២,៣៦ ភាគរយ ធៀបនឹងរយៈពេលដូចគ្នានៅឆ្នាំ ២០២៤ ដែលមានទំហំ ៦៥៩ លានដុល្លារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតចាប់ពីខែមករា ដល់ខែកញ្ញា ឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-ម៉ាឡេស៊ី ចំនួន ៨០៧ លានដុល្លារ ក្នុងនោះកម្ពុជានាំទំនិញចេញទៅម៉ាឡេស៊ីមានទំហំទឹកប្រាក់ ១០៣ លានដុល្លារកើនឡើង ៧,៩២ ភាគរយ ចំណែកឯម៉ាឡេស៊ីនាំចូលមកវិញមានតម្លៃ ៧០៣ លានដុល្លារ កើនឡើង ២៤,៨២ ភាគរយ។

ប្រទេសម៉ាឡេស៊ី គឺជាដៃគូពាណិជ្ជកម្មធំជាងគេទី ១១ របស់កម្ពុជា បន្ទាប់ពីប្រទេសចិន អាមេរិក វៀតណាម ថៃ ជប៉ុន កាណាដា អាល្លឺម៉ង់ អេស៉្បាញ ចក្រភពអង់គ្លេស និងឥណ្ឌូនេស៊ី។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច ប្រាប់កម្ពុជាថ្មីថា ដោយសារប្រជាពលរដ្ឋពហិការទំនិញថៃ ខណៈកម្ពុជាបង្វែរការផ្គត់ផ្គង់ពីបណ្តាប្រទេសមួយចំនួន ជាពិសេសនៅក្នុងតំបន់អាស៊ាន ដូចជាឥណ្ឌូនេស៊ី ម៉ាឡេស៊ី និងវៀតណាម ចិនជាដើម។

យោងតាមក្រសួងពាណិជ្ជកម្ម នៅក្នុងឆ្នាំ២០២៤ ពាណិជ្ជកម្មទ្វេភាគីកម្ពុជា-ម៉ាឡេស៊ី មានទឹកប្រាក់សរុប ៨៦៥,៥២ លានដុល្លារ កើនឡើង ៣៦,៩% ធៀបនឹងឆ្នាំ ២០២៣ ក្នុងនោះទំនិញម៉ាឡេស៊ីនាំចូលកម្ពុជា មានតម្លៃ ៧១៨ លានដុល្លារ កើន ៣៦,២% ចំណែកកម្ពុជានាំទៅម៉ាឡេស៊ី មានតម្លៃ ១៤៧,៣៩ លានដុល្លារ កើនឡើង ៤០,៣%៕

អត្ថបទ៖ ឡេង ដេត