ចិនមិននាំចូលសណ្ដែកសៀង​ពីអាមេរិកសោះ ២ ខែជាប់ៗគ្នា

ប្រទេសចិន​បាន​បន្តមិននាំចូលសណ្ដែកសៀងពីសហរដ្ឋអាមេរិកសោះកាលពីខែតុលា ដែលជាការមិននាំចូល ២ ខែជាប់ៗគ្នា ខណៈងាកទៅទិញពីប្រទេសនៅអាមេរិកខាងត្បូង ចំពេលដែលមាន​បញ្ហាពាណិជ្ជកម្ម​ជាមួយក្រុងវ៉ាស៊ីនតោន។

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ​ទិន្នន័យពីអគ្គរដ្ឋបាលគយចិន​ចេញផ្សាយនៅថ្ងៃព្រហស្បតិ៍​នេះ បាន​បង្ហាញថា ការនាំចូលសណ្តែកសៀង​ពីអាមេរិកក្នុងខែតុលា បានធ្លាក់ចុះដល់សូន្យ ធៀបនឹង ៥៤១ ៤៣៤ តោន ក្នុងរយៈពេលដូចគ្នាកាលពីឆ្នាំំមុន។ ​

ការមិននាំចូលនេះ កើតឡើងក្រោយ​ចិន​ដាក់ពន្ធខ្ពស់លើទំនិញ​កសិកម្មអាមេរិក ដើម្បីជាការឆ្លើយតបទៅនឹង​ពន្ធខ្ពស់របស់លោកប្រធានាធិបតី ដូណាល់ ត្រាំ ដែលដាក់លើចិន​កាល​ពីដើមឆ្នាំនេះ។

ផ្ទុយពីអាមេរិក ការនាំចូលសណ្ដែកសៀងពីប្រេស៊ីល បាន​កើនឡើងជិត ៣០% ដល់ប្រមាណ ៧,១២ លាន​តោន ដោយស្មើនឹង​ប្រមាណ ៧៥% នៃការនាំចូលសណ្ដែកសៀងរបស់ចិន​សរុប ខណៈការនាំចូល​ពី​អាហ្សង់ទីន​ មាន​ប្រមាណ ១,៥៧ លានតោន។ ​

ចាប់ពីខែមករា ដល់ខែតុលា ចិនបាននាំចូលសណ្តែកចំនួន ៧០,៨១ លានតោនពីប្រេស៊ីល និង ៤,៤៦ លានតោនពីអាហ្សង់ទីន។ ទោះបីការនាំចូលពីអាមេរិករបស់ចិនធ្លាក់ចុះប៉ុន្មានខែចុងក្រោយ​ក្ដី ការទិញប៉ុន្មានខែមុនដើមឆ្នាំ ២០២៥ ​​មានរហូតដល់ទៅ ១៦,៨២ លានតោន ដែល​កើនឡើង ១១,៥%។ នេះបើយោងតាមទិន្នន័យគយចិន​។

ការណ៍គួរឱ្យ​កត់សម្គាល់នោះគឺថា កាលពីចុងខែតុលា លោក ត្រាំ បាន​ជួបដោយ​ផ្ទាល់ជាមួយ​ប្រធានាធិបតី​ចិន លោក ស៊ី ជីនពីង។ កាលនោះ សេតវិមានបានអះអាងថា ចិន​បាន​ព្រមព្រៀងទិញសណ្ដែកសៀងអាមេរិកឡើងវិញ ១២ លានតោន ខណៈចិន​មិនបាន​បញ្ជាក់ពីតួលេខណាមួយនោះទេ៕