សេដ្ឋកិច្ច

ពាណិជ្ជកម្មរបស់កម្ពុជា ជាមួយប្រទេសអាស៊ានមានទឹកប្រាក់ជិត ១៥ ពាន់លានដុល្លារ ក្នុងរយៈពេល ១១ ខែ

បានផុស

៧ ខែ មុន

នៅ

ថ្ងៃអង្គារ ២៣ ធ្នូ ២០២៥

ដោយ

ការដោះដូរទំនិញរបស់កម្ពុជាជាមួយបណ្ដាប្រទេសជាសមាជិកអាស៊ាន សម្រចបាននូវទំហំទឹកប្រាក់ជិត ១៥ ពាន់លានដុល្លារ កើនឡើង ៣,៧៦% នៅក្នុងរយៈពេល ១១ ខែ ឆ្នាំ ២០២៥ ធៀបនឹងរយៈពេលដូចគ្នា នៅឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រសួងពាណិជ្ជកម្ម គិតចាប់ពីខែមករា ដល់ខែវិច្ឆិកា ឆ្នាំ២០២៥ កម្ពុជាបាននាំចេញទំនិញមានតម្លៃ ៥,១៣ ពាន់លានដុល្លារ កើនឡើង ៨,៨៩% ទៅកាន់បណ្ដាប្រទេសជាសមាជិក ASEAN រួមមាន ប្រទេសឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី ថៃ ព្រុយណេ វៀតណាម ឡាវ និងប្រទេសភូមា។ ចំណែក ការនាំចូលពីប្រទេសជាសមាជិកមានទឹកប្រាក់ប្រមាណ ៩,៨០ ពាន់លានដុល្លារ កើនឡើង ១,២៦%។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច ប្រាប់កម្ពុជាថ្មីនៅថ្ងៃអង្គារ៍ទី ២១ ខែ តុលា ឆ្នាំ ២០២៥ ថា កម្ពុជាមានការតភ្ជាប់ពោលគឺទើបតែដាក់ឱ្យដំណើរការព្រលានអន្តរជាតិតេជោ និងការចុះកិច្ចព្រមព្រៀងពាណិជ្ជកម្មសេរី ជាមួយតំបន់ និងអន្តរជាតិជាច្រើន ធ្វើឱ្យពាណិជ្ជកម្មរបស់កម្ពុជាមានភាពល្អប្រសើរ។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម មានប្រសាសន៍ថា ការកើនឡើងនៃការដោះដូរទំនិញរបស់កម្ពុជាជាមួយប្រទេសសមាជិកអាស៊ានឆ្លុះបញ្ជាំងពីការងើបឡើងវិញនៃតម្រូវការក្នុង ក្នុងតំបន់ និងពិភពលោក។

កម្ពុជាបាននាំចេញកសិផល សម្លៀកបំពាក់ ស្បែកជើង កាបូប គ្រឿងអេឡិចត្រូនិក និង កង់ ទៅកាន់ប្រទេសអាស៊ាន ខណៈដែលការនាំចូលមានដូចជាចំណីអាហារ ភេសជ្ជៈ ឧបករណ៍អគ្គិសនី និងអេឡិចត្រូនិក សម្ភារសំណង់ គ្រឿងយន្តកសិកម្ម និងយានជំនិះ៕

អត្ថបទ៖ ឡេង ដេត