សេដ្ឋកិច្ច

សហរដ្ឋអាមេរិក នៅតែជាទីផ្សារនាំចេញធំជាងគេរបស់កម្ពុជា

បានផុស

២ ខែ មុន

នៅ

ថ្ងៃពុធ ១១ កុម្ភៈ ២០២៦

ដោយ

សហរដ្ឋអាមេរិកនៅតែជាទីផ្សារនាំចេញទំនិញធំជាងគេរបស់កម្ពុជាដែលសម្រេចបាននូវទំហំទឹកប្រាក់ ១,២៨ ពាន់លានដុល្លារ នៅក្នុងខែមករា ឆ្នាំ ២០២៦ កើនឡើង ៤៧,៦% ប្រៀបធៀបនឹងរយៈពេលដូចគ្នាកាលពីឆ្នាំមុន។

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា នៅក្នុងខែមករា ឆ្នាំ ២០២៦ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបាន ១,៣២ ពាន់លានដុល្លារ កើនឡើង ៤៨% ក្នុងនោះកម្ពុជានាំចេញទៅអាមេរិក មានទំហំ ១,២៨ ពាន់លានដុល្លារ កើន ៤៧,៦% ចំណែកអាមេរិកនាំចូលមកវិញ មានតម្លៃជិត ៣៩ លានដុល្លារ កើន ៦៣,៥%។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកឯអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា កម្ពុជាបានចរចាយ៉ាងស្វិតស្វាញសម្រេចបានការបញ្ចុះអត្រាពន្ធពី ៤៩% មក ១៩%។

លោក ប៉ែន សុវិជាតិ លើកឡើងថា៖ «ការរក្សាបាននូវទីផ្សារអាមេរិក ដែលជាទីផ្សារធំមួយសម្រាប់ការនាំចេញសម្លៀកបំពាក់ វាយនភណ្ឌ ស្បែកជើង សម្ភារធ្វើដំណើរ របស់កម្ពុជា។ ការរក្សាបាននេះ ធ្វើបានតាមរយៈការចរចាពាណិជ្ជកម្មយ៉ាងស្វិតស្វាញប្រកបដោយជោគជ័យរបស់រាជរដ្ឋាភិបាលកម្ពុជា ឈានទៅដល់ការសម្រេចបានអត្រាពន្ធ ១៩%»។

លោកបណ្ឌិត គី សិរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា យល់ឃើញថា កម្ពុជាត្រូវបង្កើនពិពិធកម្មទីផ្សារដើម្បីត្រៀមខ្លួនពីហានិភ័យផ្សេងៗ ខណៈទំនិញកម្ពុជាភាគច្រើនពឹងផ្អែកលើទីផ្សារអាមេរិក។

លោកបន្ថែមថា កម្ពុជាត្រូវអភិវឌ្ឍកម្លាំងពលកម្ម ដោយត្រូវបង្កើតជំនាញឱ្យបានច្រើន លើកទឹកចិត្តឱ្យយុវជនចូលរៀនជំនាញវិជ្ជាជីវៈ ដើម្បីឱ្យពួកគាត់មានជំនាញច្បាស់លាស់ក្នុងការចូលបម្រើការងារ។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបាន ១៣,១៤ ពាន់លានដុល្លារ កើនឡើង ២៩,២៤% ក្នុងនោះ កម្ពុជានាំចេញទៅអាមេរិក មានតម្លៃ ១២,៧៣ ពាន់លានដុល្លារ កើនឡើង២៨,៤៨% ចំណែកអាមេរិកនាំចូលមកវិញ មានតម្លៃ ៤១៧ លានដុល្លារ កើនឡើង ៥៧,៨៣%៕

អត្ថបទ៖ ឡេង ដេត