សេដ្ឋកិច្ច

ខេត្តបាត់ដំបងប្រមូលផលបន្លែជួយដល់ជនភៀសសឹក និងកងទ័ព លើកទី១ បានជាង ១ ពាន់តោន

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

លោក អ៉ិន សុវណ្ណមុន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង បានគូសបញ្ជាក់ឱ្យដឹងថា គិតត្រឹមថ្ងៃទី១៧ ខែកុម្ភៈ ឆ្នាំ២០២៦ នេះបរិមាណផលបន្លែទាំង ៣ ទីតាំងដែលដាំដុះនៅមណ្ឌលសុវត្ថិភាពជនភៀសសឹក ប្រមូលផលបានសរុបជាង ១ ពាន់តោនហើយយកទៅជួយកងទ័ព ក៏ដូចជាជនភៀសសឹកនៅក្នុងខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុប្រធានមន្ទីរកសិកម្ម លោក អ៉ិន សុវណ្ណមុន្នី បានថ្លែងប្រាប់ «កម្ពុជាថ្មី» ឱ្យដឹងថា បរិមាណផលបន្លែទាំង ៣ កន្លែងប្រមូលសរុបបានជាង ១ ពាន់តោន (១ ៤៦៥ គីឡូក្រាម) ក្នុងនោះផ្តល់ជូនកងទ័ពបានសរុបចំនួន ៧៣៥ គីឡូក្រាម, ៣០ គីឡូក្រាម ផ្តល់ជូនសមាជិកក្រុមប្រឹក្សាឃុំ, ៣០ គីឡូក្រាម ផ្តល់ជូនប្រជាពលរដ្ឋ និង ២០ គីឡូក្រាមទៀត ជូនដល់ព្រះសង្ឍ។

ចំណោមទិន្នផលបន្លែទាំងជាង ១ ពាន់តោន ដែលប្រមូលបានរួមមាន ខាត់ណាដើម ប្រមូលបានចំនួន ៣៨០ គីឡូក្រាម, ស្ពៃក្រញ៉ាញ់ ប្រមូលផលបាន ៣៦៥ គីឡូក្រាម, ស្ពៃតឿ ១១០ គីឡូក្រាម, ស្ពៃចង្កឹះ ២៤០ គីឡូក្រាម, ផ្កាស្ពៃខៀវ ចំនួន ២០ គីឡូក្រាម, ប៉េងបោះធំ ចំនួន ១០ គីឡូក្រាម និងត្រកួន ចំនួន ៣២០ គីឡូក្រាម។

ជាមួយគ្នានេះ លោក អ៉ិន សុវណ្ណមុន្នី បានបន្ថែមដែរថា សម្រាប់ទីតាំងដាំដុះបន្លែសម្រាប់ជួយទៅដល់ភៀសសឹកក៏ដូចជាកងទ័ពនេះ មន្ទីរកសិកម្មខេត្តបាននិងកំពុងបន្តដាំដុះជាបន្តបន្ទាប់បន្ថែមទៀត ហើយអាចនឹងប្រមូលផលក្នុងពេលឆាប់ៗខាងមុខនេះផងដែរ៕