សេដ្ឋកិច្ច

ទីផ្សារដំឡូងមីកម្ពុជាស្ទុះឡើងវិញ ដោយសារតម្រូវការសកល

បានផុស

៤ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

តម្លៃទីផ្សារដំឡូងមីស្រស់របស់កម្ពុជា បានស្ទុះងើបឡើងវិញដល់ជាង ៣០០ រៀល ក្នុងមួយគីឡូក្រាម ចាប់តាំងពីដើមខែកុម្ភៈ ឆ្នាំ ២០២៦ បន្ទាប់ពីបានធ្លាក់ចុះជាង ១០០ រៀល ក្នុងមួយគីឡូក្រាម ក្នុងរយៈពេល ២ ឆ្នាំ ជាប់ៗគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អិល ឈិញ ប្រធានសមាគមកសិករដំឡូងមីខ្មែរ ប្រាប់កម្ពុជាថ្មីថា តម្លៃដំឡូងមីស្រស់បានកើនឡើងវិញដល់ជាង ៣០០ រៀល ក្នុងមួយគីឡូក្រាម ចាប់តាំងពីដើមខែកុម្ភៈ ឆ្នាំ ២០២៦ ដោយសារការកើនឡើងនៃតម្រូវការសកល។

លោក អិល ឈិញ បញ្ជាក់ថា៖ «តម្លៃដំឡូងមីស្រស់នៅភាគខាងជើង ២៩០ រៀល ក្នុងមួយគីឡូ នៅភូមិភាគកណ្ដាល មានខេត្តកំពង់ធំ ខេត្តកំពង់ចាម ឡើងដល់ ៤០០ រៀល ក្នុងមួយគីឡូ និងភាគខាងលិចមានខេត្តបាត់ដំបង ខេត្តប៉ៃលិន ឡើងដល់ជាង ៣០០ រៀល ក្នុងមួយគីឡូក្រាម»។

បើតាមប្រធានសមាគមដំឡូងមី នៅក្នុងឆ្នាំ ២០២៦ កសិករភាគច្រើនធ្វើដំឡូងមីស្ងួត ដែលទទួលបានតម្លៃខ្ពស់ រហូតដល់ជាង ៦០០ រៀល ក្នុងមួយគីឡូក្រាម។ ទីផ្សារដំឡូងមីកម្ពុជា មានប្រទេសវៀតណាម ចិន និងការប្រើប្រាស់ក្នុងស្រុក។

អ្នកស្រី សុខ ឃឿន កសិករដាំដុះដំឡូងមីនៅស្រុកបាណន់ ខេត្តបាត់ដំបង បានប្រាប់ឱ្យដឹងថា ផលដំឡូងមីឆ្នាំនេះលូតលាស់ល្អ និងប្រមូលផលបានច្រើនជាងឆ្នាំមុនស្របពេលទីផ្សារក៏ល្អផងដែរ។

កសិកររូបនេះ អះអាងថា ដំឡូងមីស្រស់ឆ្នាំនេះលក់បានតម្លៃ ២៣០ រៀលក្នុង ១ គីឡូក្រាម ខណៈឆ្នាំមុនលក់បាន ១៥០ រៀល ក្នុងមួយគីឡូក្រាម។

រាជរដ្ឋាភិបាលបានខិតខំជំរុញ និងពង្រីកទីផ្សារនាំចេញដំឡូងមីរហូតដល់ប្រមាណ ១០ លានតោន ទៅកាន់ទីផ្សារអន្តរជាតិនៅក្នុងឆ្នាំ ២០២៥។

នៅក្នុងខែមករា ឆ្នាំ ២០២៦ កម្ពុជានាំចេញដំឡូងមីសម្រេចបាន ១៦១ លានដុល្លារ កើនឡើង ៩២,២៩% ប្រៀបធៀបនឹងរយៈពេលដូចគ្នាកាលពីឆ្នាំមុន។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ កម្ពុជារកចំណូលបាន ៦៤៦ លានដុល្លារ ពីការនាំចេញដំឡូងមី ធ្លាក់ចុះ ១៤,៤៨% ប្រៀបធៀបនឹងឆ្នាំ ២០២៤។

បរិមាណនាំចេញដំឡូងមីស្រស់មានចំនួន ៣ ១០៥ ៥០០ តោន ធ្លាក់ចុះ ៩,៨២% នៅក្នុងឆ្នាំ ២០២៥ រីឯចំណិតដំឡូងមីក្រៀមបានកើនឡើង ៦២,២២% ដែលមានចំនួន ១ ៥៦៥ ៩៤០ តោន ប្រៀបធៀបឆ្នាំ ២០២៤៕

អត្ថបទ៖ ឡេង ដេត