ព័ត៌មានអន្ដរជាតិ

ម៉ាឡេស៊ីចាប់កប៉ាល់ ២ គ្រឿង សង្ស័យថាបានផ្ទេរប្រេងម៉ាស៊ូតខុសច្បាប់ ៧០០ ០០០ លីត្រ

បានផុស

៣ ខែ មុន

នៅ

ថ្ងៃចន្ទ ១៣ មេសា ២០២៦

ដោយ

ទីភ្នាក់ងារអនុវត្តច្បាប់សមុទ្រម៉ាឡេស៊ី (MMEA) បាននិយាយថា ខ្លួនបានចាប់កប៉ាល់ដឹកប្រេង ២ គ្រឿង ដោយចោទប្រកាន់ថាបានផ្ទេរប្រេងម៉ាស៊ូតប្រហែល ៧០០ ០០០ លីត្រ ឱ្យគ្នាដឹកដោយខុសច្បាប់ ចេញពីរដ្ឋប៉េណាង កាលពីចុងសប្តាហ៍មុន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាប់កប៉ាល់ទាំង២គ្រឿង ធ្វើឡើងខណៈម៉ាឡេស៊ីបង្កើនការបង្ក្រាបលើការគេចពន្ធប្រេងឥន្ធនៈ ចំពេលដែលកង្វះខាត និងការរំខាននៃការផ្គត់ផ្គង់ប្រេងបានកើនឡើងកាន់តែខ្លាំងទៅៗ នៅទូទាំងតំបន់អាស៊ីអាគ្នេយ៍ ដែលបណ្តាលមកពីសង្គ្រាមនៅមជ្ឈិមបូព៌ា។

លោក Muhammad Suffi Mohd Ramli នាយក MMEA ប្រចាំរដ្ឋប៉េណាង បាននិយាយថា អាជ្ញាធរម៉ាឡេស៊ីបានត្រួតពិនិត្យមើល ក្រោយមានព័ត៌មានស៊ើបការណ៍សម្ងាត់អំពីកប៉ាល់ទាំងនោះ ដែលចុះចតលើដែនទឹកក្បែរកោះ Bagan Ajam កាលពីថ្ងៃសៅរ៍។

បើតាមលោក Muhammad Suffi ការត្រួតពិនិត្យបានរកឃើញថា កប៉ាល់ទាំង ២ ស្ថិតនៅជាប់គ្នា ហើយសង្ស័យថាបានផ្ទេរប្រេងម៉ាសូតពីមួយទៅមួយដោយគ្មានការអនុញ្ញាត។ លោកគូសបញ្ជាក់ថា ការផ្ទេរប្រេងម៉ាស៊ូត Euro 5 នោះ មានប្រហែល ៧០០ ០០០ លីត្រ ខណៈចំនួនសរុបដែលរឹបអូសបានមានប្រហែល ៨០០ ០០០ លីត្រ ក្នុងតម្លៃប្រហែល ១,៣៧ លានដុល្លារ។

ជាមួយគ្នានោះ អាជ្ញាធរក៏បានចាប់ខ្លួនសមាជិកនាវិកចំនួន ២២ នាក់ផងដែរ ដែលមានជនជាតិម៉ាឡេស៊ី មីយ៉ាន់ម៉ា រុស្ស៊ី ហ្វីលីពីន និងឥណ្ឌូណេស៊ី។ យ៉ាងណាមិញ MMEA មិនបានបញ្ជាក់ពីប្រភពដើមនៃកប៉ាល់ដឹកប្រេង ប្រេងម៉ាស៊ូត ឬគោលដៅនៃប្រេងឥន្ធនៈនោះទេ។

គួរគូសបញ្ជាក់ថា ដែនទឹកម៉ាឡេស៊ីត្រូវបានគេដឹងថាជាកន្លែងល្បីខាងផ្ទេរប្រេងខុសច្បាប់ពីកប៉ាល់មួយទៅកប៉ាល់មួយទៀត។ អាជ្ញាធរម៉ាឡេស៊ីបាននិយាយកាលពីខែកក្កដា ឆ្នាំមុនថា ពួកគេនឹងអនុវត្តច្បាប់ពាក់ព័ន្ធដោយមានភាពតឹងរ៉ឹងជាងមុន៕