UNIDO ​សិក្សាឃើញការផ្លាស់ប្តូរលក្ខខណ្ឌ​ទីផ្សារនាំចេញផលិតផលកាត់ដេរ ​និង​សម្ភារធ្វើដំណើរ​

ការសិក្សាបឋមរបស់អង្គការអភិវឌ្ឍន៍ឧស្សាហកម្មអង្គការសហប្រជាជាតិ (UNIDO)​ បានបង្ហាញពីការផ្លាស់ប្តូរ​លក្ខខណ្ឌតម្រូវផ្នែកនិរន្តរភាព និងអនុលោមភាព នៅក្នុងទីផ្សារនាំចេញសំខាន់ៗ ដែលនឹងទាមទារ​កិច្ច ខិត​ខំប្រឹង​ប្រែងរួម ដើម្បីជួយឱ្យ “ឧស្សាហកម្មកាត់ដេរ ស្បែកជើង និងសម្ភារធ្វើដំណើរ” របស់កម្ពុជារក្សា​បាននូវភាព​ប្រកួត​ប្រជែង។​

​គណៈប្រតិភូអង្គការ ​UNIDO ​បាន​ធ្វើ​បទបង្ហាញអំពីលទ្ធផលនៃការសិក្សាស្តីពីការវេចខ្ចប់ប្រកបដោយនិរន្តរភាព និងការអភិវឌ្ឍសេដ្ឋកិច្ចចក្រាក្នុងឧស្សាហកម្មកាត់ដេរ ស្បែកជើង និងសម្ភារធ្វើដំណើរ ​របស់កម្ពុជា ជូនដល់​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។​

​ការសិក្សាបានបង្ហាញពីការផ្លាស់ប្តូរលក្ខខណ្ឌតម្រូវក្នុងទីផ្សារសំខាន់ៗ ជាពិសេសទីផ្សារសហភាពអឺរ៉ុប សហរដ្ឋអាមេរិក ចក្រភពអង់គ្លេស និងកាណាដា ដែលក្រុមហ៊ុនបញ្ជាទិញកំពុង​ទាមទារកាន់តែខ្លាំង​ឡើងនូវភាពអាចតាមដានបាននៃខ្សែច្រវាក់ផ្គត់ផ្គង់ ការប្រើប្រាស់វត្ថុធាតុដើមដែលអាចកែច្នៃឡើងវិញ ប្រសិទ្ធភាពនៃការប្រើប្រាស់ធនធាន និងភាពអនុលោមតាមស្តង់ដាបរិស្ថាន។

​លោករដ្ឋមន្ត្រី ហែម វណ្ណឌី បានស្វាគមន៍លទ្ធផលនៃការសិក្សានេះ ​និង​ស្នើឱ្យមានការ​ចូលរួមពីគ្រប់ភាគីពាក់ព័ន្ធ រួមមានក្រសួងស្ថាប័នរបស់រាជរដ្ឋាភិបាល សមាគមឧស្សាហកម្ម រោងចក្រផលិត ក្រុមហ៊ុនបញ្ជាទិញ​ និង​ដៃគូ​អភិវឌ្ឍន៍ ដើម្បីដោះស្រាយបញ្ហាប្រឈម និងចាប់យក​ឱកាសទីផ្សារ។​

លោករដ្ឋមន្រ្តីយល់ឃើញថា៖ «គោលបំណងរបស់ក្រសួង គឺកសាងសម្ព័ន្ធភាពដ៏មានប្រសិទ្ធិភាពមួយ។ ប្រសិនបើភាគីពាក់ព័ន្ធអាចឯកភាពគ្នាលើបញ្ហាប្រឈម និងកាលានុវត្តភាពនានា​ដែលវិស័យឧស្សា ហកម្ម​នឹងត្រូវ​ជម្នះនាពេលខាងមុខ យើងអាចដាក់ចេញនូវវិធានការជាក់ស្តែង ដែលពង្រឹងទាំងភាពអនុ លោម និងភាព​ប្រកួត​ប្រជែង​នៃឧស្សាហកម្ម»។​

​លោករដ្ឋមន្ត្រី​បានស្នើឱ្យរៀបចំវេទិកាពិសេសមួយរវាងស្ថាប័នរដ្ឋ តំណាងឧស្សាហកម្ម ក្រុមហ៊ុនបញ្ជាទិញ រោងចក្រផលិត និងដៃគូអភិវឌ្ឍន៍ ដើម្បីពិនិត្យផ្ទៀងផ្ទាត់លទ្ធផលនៃការសិក្សាស្រាវជ្រាវនេះ ព្រមទាំងកំណត់​​អាទិភាពសកម្មភាព និងរៀបចំផែនទីបង្ហាញផ្លូវរួមមួយ សម្រាប់ពង្រឹងការត្រៀមលក្ខណៈ​នៃវិស័យដែល​ជាក្បាលម៉ាស៊ីននាំចេញរបស់កម្ពុជានេះ។

លោក ​ហែម វណ្ណឌី ​ក៏បាន​លើកឡើងពីភាពចាំបាច់នៃការជួយជ្រោមជ្រែងឱ្យសហគ្រាសក្នុងស្រុក អាចយល់​ដឹងអំ​ពីការផ្លាស់ប្តូរតម្រូវការទីផ្សារនាពេលអនាគត និងឱកាសអាជីវកម្មថ្មីៗ ដែលកើតចេញពីការផ្លាស់​ប្តូរទាំង​នេះ ជាពិសេសក្នុងការវេចខ្ចប់ប្រកបដោយនិរន្តរភាព ការកែច្នៃឡើងវិញ និង​ប្រសិទ្ធភាពនៃការប្រើប្រាស់​ធន​ធាន​ក្នុងឧស្សាហកម្ម៕