​ហាងឆេង​មាស​ធ្លាក់​ចុះ​ក្រោម​ ៥​ ពាន់ដុល្លារ មួយតម្លឹង បន្ទាប់ពីអាមេរិកវាយប្រហារលើអ៊ីរ៉ង់ជាថ្មី

តម្លៃ​ហាងឆេង​មាស​ធ្លាក់​ចុះ​ក្រោម ​៥ ​ពាន់ដុល្លារ ​(៤៩០៣) ​ក្នុង​មួយ​តម្លឹង​ នៅថ្ងៃព្រហស្បតិ៍នេះ ​ដោយសារសម្ពាធពីធនាគារកណ្ដាលអាមេរិក​ចង់តម្លើងអត្រាការប្រាក់​ ដើម្បីទប់ទល់នឹងអតិផរណា ​បន្ទាប់ពី​ការប្រយុទ្ធគ្នារវាង​អាមេរិក ​និង​អ៊ីរ៉ង់​បាន​ផ្ទុះឡើងជាថ្មី ដែលធ្វើឱ្យតម្លៃប្រេងកើនឡើង។​

​គិតត្រឹម៉ោង​ ៩ ​ព្រឹកថ្ងៃទី ​៩ កក្កដា ២០២៦ ​ហាងឆេង​មាស​នៅ​តាម​បណ្ដា​ហាងនានា​ក្នុង​រាជ​ធានី​ភ្នំ​ពេញ​លក់​ចេញ​ ៤៩៣ ដុល្លារ ក្នុង​មួយ​ជី​។​

​អ្នកស្រី ហ៊ង រីណា ​អាជីវករផ្សារលក់មាសផ្សាធំថ្មី ​បានឱ្យដឹងថា​ បច្ចុប្បន្នអតិថិជន​មិនសូវ​ទៅលក់​មាស​ទេ ​ដោយ​​សារ​គាត់​ទិញ​ក្នុង​តម្លៃខ្ពស់ហើយយកទៅលក់វិញខាតក្នុងពេលហាងឆេងធ្លាក់ចុះ។​

​លោក ឡុង សំណាង ​​នាយក​អភិវឌ្ឍ​អាជីវកម្ម​នៃក្រុមហ៊ុន ​PP Link securities​ យល់ឃើញថា៖ «លោក​ Kevin Warsh ប្រធានធនាគារកណ្ដាលអាមេរិកថ្មី​ ចង់ដំឡើងអត្រាការប្រាក់ ដោយសារទំនិញ​នៅ​សហ​រដ្ឋអាមេរិកមានការកើនឡើងខ្លាំង ដោយសារជាប់ពន្ធ ឬក៏បញ្ហាមួយចំនួន ធ្វើឱ្យអត្រា​អតិ​ផរណាអាចកើតឡើង គេការពារការកើនឡើងអតិផរណា​ គេនឹងដំឡើងអត្រាការប្រាក់ ប៉ុន្តែចំណុច​ហ្នឹង​បើដំឡើងមែន ​មាសនឹងធ្លាក់ចុះ»។ ​

​លោក ឡុង សំណាង បន្ថែមថា ​ប្រសិនបើដំឡើងអត្រាការប្រាក់ហើយ មាសមិនធ្លាក់ចុះទៀត អាច​នឹងមានការអន្តរាគមរបស់លោក ដូណាល់ ត្រាំ ដោយសារលោកមិនចង់ឱ្យ​មានការដំឡើង​អត្រា​ការ​ប្រាក់ ​ដែល​ធ្វើ​ឱ្យ​មាន​ឱនភាពនៃការវិនិយោគ៕

អត្ថបទ៖​ ឡេង ដេត