ជោគជ័យ កសិករនៅស្រុកសេសាន ខេត្តស្ទឹងត្រែង ដាំដំណាំទុរេនបានសម្រេចហើយ

ខេត្តស្ទឹងត្រែង៖ កសិករនៅខេត្តស្ទឹងត្រែង ដែលកន្លងមកមិនធ្លាប់មានដំណាំទុរេន ពេលនេះបន្ដុំកសិករបានព្យាយាម ដំាដំណាំទុរេនសម្រេចបានជោគជ័យ ឆ្ងាញ់មិនចាញ់បណ្តាខេត្ត​នានានៅក្នុងប្រទេសកម្ពុជាឡើយ។

លោក សុវណ្ណ ពិសេដ្ឋ អភិបាលស្រុកសេសាន បានបញ្ជាក់ថា ការដាំដំណាំទុរេនបានដោយជោគជ័យនេះ ចាត់ទុកជាសមិទ្ធផលថ្មីមួយទៀតដែលប្រជាកសិករខិតខំធ្វើបានសម្រេចក្នុង​វិស័យកសិកម្ម ព្រោះដំណាំទុរេនខេត្តស្ទឹងត្រែងមិនធ្លាប់មានឡើយ។

លោកបន្តថា ក្នុងនាមអាជ្ញាធរស្រុក ចំពោះមុខកំពុងតែប្រជុំផ្សព្វផ្សាយដល់បន្តំកសិករ ប្រជាពលរដ្ឋមួយចំនួនដែលមានដីធ្លី និងមានលទ្ធភាពអាចមកមើលទីតាំងនេះ ដែលជា​កន្លែងសិក្សាជាក់ស្តែងផ្ទាល់ ដើម្បីឱ្យប្រជាពលរដ្ឋមានក្តីសង្ឃឹម និងការដាំដុះដំណាំ​ទុរេននេះ។

លោក ឃិន សុខា ម្ចាស់ចំការធុរេននៅ ឃុំកំភុន បានគាំទ្រនូវផែនការរបស់អាជ្ញាធរស្រុក ព្រោះ​បច្ចុប្បន្នកសិករភាគច្រើនបានផ្លាស់ប្តូរមុខរបស់ខ្លួន ពីការពឹងផ្អែកលើផលអនុផលព្រៃឈើ និងធ្វើនេសាទមកដាំដំណាំផ្សេងៗវិញ។

លោកបន្តថា កត្តាជោគជ័យលើការដំាដំណាំកសិកម្ម គឺភាពឧស្សាព្យាយាម ការថែទាំ និងមាន​ការ​គាំទ្រពីស្ថាប័នជំនាញ ជួយផ្នែកបច្ចេកទេស ទើបផលដំណាំផលិតបានមានទីផ្សាល្អ។

លោកបានថ្លែងថា៖ “យើងចង់​បានមន្ត្រីជំនាញគាត់ជួយថែមទៀតលើបទពិសោធន៍ ដើម្បីឱ្យទុរេនខេត្តស្ទឹងត្រែងបាននាំ​ចេញទៅកាន់ទីផ្សារដូចបណ្ដាខេត្តដទៃដែរ”។

លោក ទំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានទទួលយកការស្នើឡើងនេះ ព្រោះនៅចំពោះមុខផែនការរបស់មន្ទីរ នៅពេលប្រជាកសិករផលិតបានផលិតផល​ច្រើន ​មន្ត្រីជំនាញនឹងជំរុញផ្នែកដាំដុះ​បន្ថែម ហើយរៀបចំឱ្យមានមន្ទីរពិសោធន៍ពិនិត្យគុណភាពទៅតាមបច្ចេកទេសស្របតាមស្ដង់ដា។

សូមបញ្ចាក់ថា នេះជាលើកដំបូងហើយដែលខេត្តស្ទឹងត្រែងមានកសិករនៅឃុំកំភុន ស្រុកសេសាន​ ដាំដំណាំធុរេនទទួលបានផ្លែផ្កាល្អ និងនាំយកមកលក់នៅលើទីផ្សារ និងគ្រោងនាំចេញទៅ​លក់​​នៅតាមបណ្តាខេត្តនានា និងរាជធានីភ្នំពេញផងដែរ៕

អត្ថបទ៖ ងិន លីម