រដ្ឋាភិបាលលើកលែងពន្ធ ២ ឆ្នាំមុខទំនិញ​ជាអាហារមូលដ្ឋានប្រចាំថ្ងៃ

ក្រសួងសេដ្ឋកិច្ចនិងហិរញ្ញវត្ថុ បានចេញសេចក្តីសម្រេចលើកលែងការបង់ពន្ធអាកររយៈពេល២ឆ្នាំចាប់ពីថ្ងៃទី ១ ខែមករាឆ្នាំ២០២២ ហូតដល់ខែធ្នូឆ្នាំ២០២៣ ចំពោះមុខទំនិញដែលជាអាហារមូលដ្ឋាន ដើម្បីជួយសម្រួលជីវភាពរស់នៅប្រចាំថ្ងៃរបស់ប្រជាពលរដ្ឋ។

លោក អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានឱ្យដឹងនៅក្នុងប្រកាសចុះថ្ងៃ​ទី​១២​មករា​ថា ប្រកាសនេះមានគោលបំណងដាក់ជាបន្ទុករបស់រដ្ឋអាករលើតម្លៃបន្ថែមលើមុខទំនិញ ដែលជាអាហារជាមូលដ្ឋានដើម្បី​​ជួយ​សម្រួលជីវភាពរស់នៅប្រចាំថ្ងៃរបស់ប្រជាពលរដ្ឋ។

លោកឧបនាយករដ្ឋមន្ត្រីបានបន្តថា ប្រកាសនេះមានវិសាលភាពអនុវត្តចំពោះអ្នកជាប់ពន្ធតាមរបបស្វ័យប្រកាសដែលធ្វើការផ្គត់ផ្គង់ក្នុងស្រុកនៅ​ទំនិញដែលជាអាហារជាមូលដ្ឋាន សម្រាប់ចិញ្ចឹមជីវិតប្រជាពលរដ្ឋនៅក្នុងព្រះរាជាណាចក្រកម្ពុជា។

ការ​សម្រេច​នេះ​មិនរាប់បញ្ចូលការផ្គត់ផ្គង់ម្ហូបអាហារ ដោយភោជនីយដ្ឋានឡើយ។

អាហារជាមូលដ្ឋាន សំដៅដល់បណ្តាមុខទំនិញមួយចំនួនដែលសម្រាប់ជីវភាពរស់នៅប្រចាំថ្ងៃ ដូចជាសាច់សត្វចិញ្ចឹម មានជាអាទិ៍ សាច់គោ ក្របីពពែ ចៀម ជ្រូក មាន់ ទា ទោះបីមានលក្ខណៈជាសាច់ស្រស់ ឬកែច្នៃតាមវិធីប្រឡាក់ឬឆ្អើរ។ ស៊ុតសត្វចិញ្ចឹមគ្រប់ប្រភេទ ទោះបីមានលក្ខណះជាស៊ុតស្រស់ឬកែច្នៃតាមវិធីផ្អាប់ឬឆ្អើរ។ ត្រីទឹកសាបនិងទឹកប្រៃគ្រប់ប្រភេទ រួមទាំង បង្កង បង្គា កំពឹស ក្តាមនិងសិប្បិជាតិគ្រប់ប្រភេទ ទោះបីមានលក្ខណៈជាសាច់ស្រស់ឬកែច្នៃតាមវិធីប្រឡាក់​ឬឆ្អើរ។ ស្ករគ្រប់ប្រភេទ ដែលមិនមានលក្ខណៈជាស្ករគ្រាប់ អំបិលគ្រប់ប្រភេទ ទឹកត្រីនិងទឹកស៊ីអ៊ីវគ្រប់ប្រភេទ៕

អត្ថបទ៖ សំអឿន